Mapisarema 94 - Bhaibhiri Idzva rechiShona rine Dhuterokanonika

Mwari mutongi wavose ano ruenzaniso

¹ TENZI muri Mwari anotsiva, imi Mwari anotsiva, zviratidzei.

² Simukai imi mutongi wapasi mupe vanozvikudza zvavanokodzerana nazvo.

³ Nhai TENZI ko ivo vakaipa vachasvikira riniko kusvikira rini vakaipa vachizvitutumadza.

⁴ Vanorutsa kutaura mashoko okuzvikudza. Vaiti vezvakaipa vose vanozvitutumadza.

⁵ Vanopwanya vanhu venyu TENZI vanorwadzisa nhaka yenyu.

⁶ Vanoponda kuuraya chirikadzi nomutorwa vachiuraya zvavo nherera.

⁷ Vanoti TENZI haazvioni Mwari waJakobho haatarisi.

⁸ Nzwisisaiwo imi matununu avanhu imi mapenzi muchangwara rinhiko?

⁹ Ko iye akaita nzeve haakwanisi kunzwa here? Iye akaumba ziso angatadze kuona here?

¹⁰ Iye anoranga marudzi haarangi here, iye anodzidzisa vanhu ruzivo?

¹¹ TENZI anoziva pfungwa dzavanhu kuti dzinongova femo zvaro.

¹² Akakomborerwa zvake munhu wamunoranga TENZI, wamunodzidzisa nemitemo yenyu.

¹³ Kumupa zororo panguva yepfumvu kusvikira guva rachererwa vakaipa.

¹⁴ Nokuti TENZI haafuratiri vanhu vake haangarasi nhaka yake.

¹⁵ Ruenzaniso runodzokerazve mukutonga kunoitwa, vose vari pachokwadi vanozvitevedza.

¹⁶ Ndiani zvake akambosimuka kuti andirwire kuna vakaipa? Ndiani angandimiririrewo kurwisa vaiti vezvakaipa?

¹⁷ Dai ndisina kutozobatsirwawo zvangu naTENZI ndingadai ndavakutogara kunyika yorunyararo.

¹⁸ Pandaifunga kuti ndavakutsvedza, makandisimbisa nemwoyochena wenyu.

¹⁹ Kana zvinondinetsa mumwoyo mangu zvawanda kundinyaradza kwenyu kunondifaranutsa.

²⁰ Mungaite ushamwari navatongi vakaipa here vanoita kuti zvisina ruenzaniso zvive zviri pamutemo?

²¹ Vanoita chirwirangwe kurwisa mururami vachipa mururami asina mhosva yokuti auraiwe.

²² Asi TENZI ndiye akava nzvimbo yangu yokuzvidzivirira nayo muhondo uye Mwari wangu akava nhare yangu.

²³ Achavadzorera uipi hwavo achavatsvaira pamusana pokusarurama kwavo TENZI Mwari wedu achavatsvaira.