Mapisarema 9 - Bhaibhiri Idzva rechiShona rine Dhuterokanonika

Muimbisi, Rumbo urwu rwunoimbwa sezvinoitwa rweMutirabheni. Rumbo rwaDhavhidhi.

Kutenda Mwari ruenzaniso rwake

¹ Ndinotenda TENZI nomwoyo wangu wose. Ndichaparidza mabasa enyu anoshamisa;

² ndichafara nokupembera mamuri. Ndicharumbidza zita renyu imi Wokumusorosoro.

³ Kana mhandu dzangu dzopishinuka kudzoka, dzinodzadzarika dzoparara, mberi kwenyu.

⁴ Nokuti makandirwira pane zvandinokodzera nezvandinochemera, makagara pachigaro chenyu chokutonga muchitonga zvakarurama.

⁵ Makapa vechirudzi mhosva mukaparadza vakaipa, makadzimawo zita ravo narini narini.

⁶ Vavengi vakatsvairwa; vava matongo nokusingaperi. Maguta avo angove matongo zvokurangarirwa havachamborangarirwa.

⁷ TENZI anogara pachigaro chake chokutonga nokusingaperi, akadzika chigaro chake choumambo kuti atonge.

⁸ Uye, anotonga pasi pose zvakarurama anotongawo marudzi avanhu pachokwadi.

⁹ TENZI ndiye nzvimbo yokupotera yavanhu vanodzvinyirirwa ndiye nzvimbo yokupotera panguva yenhamo.

¹⁰ Vanoziva zita renyu vanovimba nemi nokuti imi TENZI hamufuratiri vanokutsvakai.

¹¹ Pururudzirai TENZI anogara muZioni. Paridzirai vanhu zviito zvake.

¹² Nokuti, iye, anotsividza ropa radeurwa, anovayeuka. Haakanganwi kuchema kwavari munhamo.

¹³ Ndinzwireiwo tsitsi TENZI. Tarisai muone zvandinotambudzwa nazvo navanondivenga. Imi munonditakanura pamuromo worufu

¹⁴ kuti ndiparidze mbiri yenyu uye kuti pamisuo yomukunda, guta reZioni, ndifarire ruponeso rwenyu.

¹⁵ Marudzi akawira mugomba ravakazvicherera vakabatwa gumbo mumambure avakaviga ivo pachavo.

¹⁶ TENZI anozviratidza agotonga, vakaipa vachiteiwa nezvavanoita namaoko avo. Moimbira pasi, Dzepfunde

¹⁷ Vakaipa vachadzokera kunzvimbo yavakafa. Marudzi ose anokanganwa Mwari.

¹⁸ Varombo havachakanganwiki nokusingaperi; chitarisiro chavatamburi hachiparari zvachose.

¹⁹ Simukai TENZI, musakundwe nomunhu; vechirudzi ngavatongwe pamberi penyu.

²⁰ Vatyisei TENZI, marudzi azive kuti vanongova vanhu. Dzepfunde.