Mapisarema 86 - Bhaibhiri Idzva rechiShona rine Dhuterokanonika

Munamato kana zvinhu zvaipa

Munamato waDhavhidhi.

¹ Rerekerai nzeve yenyu TENZI mundipindurewo, nokuti ndiri murombo uye handina chokubata.

² Ndichengetedzeiwo nokuti ndiri munamati wenyu. Ndinunureiwo ini muranda wenyu anovimba nemi, ndimi Mwari wangu.

³ Ndinzwireiwo ngoni TENZI, nokuti ndinochema kwamuri zuva rose.

⁴ Ndinyevenutseiwo mwoyo ini muranda wenyu, nokuti ndinochema kwamuri, TENZI

⁵ nokuti imi, TENZI, makanaka uye munoregerera, munoitira mwoyochena vakawanda kuna vanodana kwamuri.

⁶ Rerekerai nzeve yenyu TENZI kumunamato wangu inzwaiwo chichemo changu.

⁷ Pazuva rokutambudzika kwangu ndinodanidzira kwamuri nokuti imi munondipindura.

⁸ Hapana akaita semi, TENZI pakati pavamwari, kana mabasa akaita seenyu.

⁹ Marudzi ose amakasika achauya achizokugwadamirai TENZI achirumbidza zita renyu;

¹⁰ nokuti imi muri mukuru uye munoita zvinoshamisa, imi moga ndimi Mwari.

¹¹ Ndidzidziseiwo nzira dzenyu TENZI kuti ndifambe muchokwadi chenyu; ndipeiwo mwoyo mumwechete pakutya zita renyu.

¹² Ndinokutendai TENZI Mwari wangu nomwoyo wangu wose uye ndicharumbidza zita renyu nokusingaperi

¹³ nokuti mwoyochena wenyu kwandiri wakawanda; makandinunura pasi pasi munzvimbo yavakafa.

¹⁴ Vanhu vanozvikudza vandimukira Mwari, chikwata chamadzenga chinoda kundiuraya havana hanya nemi.

¹⁵ Asi imi TENZI muri Mwari ane tsitsi, ane mwoyo wakanaka. Mune mwoyo murefu; mune mwoyochena wakawanda uye makatendeka.

¹⁶ Tendeukirai kwandiri mundinzwirewo ngoni. Ndisimbaradzeiwo ini muranda wenyu. Mundinunurewo ini mwana womurandakadzi wenyu.

¹⁷ Ndiitireiwo chinoratidza kuti munofadzwa neni kuitira kuti vanondivenga vazvione vanyadziswe, nokuti imi TENZI munondibatsira nokundinyaradza.