Mapisarema 80 - Bhaibhiri Idzva rechiShona rine Dhuterokanonika

Muimbisi, imbisa rumbo urwu rwechapupu chaAsafu sezvinoita ane chokuimbisa chine tambo dzokukungisa Rwiyo.

Munamato wokukumbirira nyika kuti idzorerwe kune zvayakanga yakaita.

¹ Teererai imi mufudzi weIsiraeri imi munotungamirira vokwaJosefi sedanga rehwai, imi mune chigaro chenyu choumambo pamaKerubhi, bwinyai

² kune vokwaEfuremu novokwaBhenjamini nokune vokwaManase. Kokai simba renyu muuye kuzotinunura.

³ Tiiteiwo zvatakanga takaita kare, Mwari, chiso chenyu ngachipenye kuti tiponeswe.

⁴ TENZI wehondo nehondo, kusvikira rinhiko makashatirwa neminamato yavanhu venyu.

⁵ Kuchema ndiko kwava chokudya chavo, makavapa misodzi kuti vanwe zvokutogondwa.

⁶ Munoita kuti vavakidzani vatirwirane vavengi vedu vachitotiseka pakati pavo.

⁷ Tiiteiwo zvatakanga takaita kare Mwari wehondo nehondo. Chiso chenyu ngachipenye kuti tiponeswe.

⁸ Makauya nomugirepisi kubva kuIjipiti mukadzinga vechirudzi mukausima.

⁹ Makaugoborera ukadzika midzi yawo ukazadza nyika.

¹⁰ Makomo akafukidzwa nomumvuri wawo nemiti yomusidhari yakafukidzwa namapazi awo.

¹¹ Mapazi awo akatandavara kusvika kugungwa uye mabukira awo akasvika kurwizi rweYufuretesi.

¹² Ko zvino makagopazireiko tsvingo dzayo zvokuti vose vanopfuurawo zvavo nenzira vanotanha michero yawo.

¹³ Nguruve yomusango inoutsika-tsika zvayo, zvose zvinofamba musango zvinoudya.

¹⁴ Dzokaizve Mwari wehondo nehondo mutarire muri kudenga muone zvenyu, ivai nehanya nomugirepisi uyu.

¹⁵ Nzvanzvana yomugirepisi yamakadyara nesimba roruoko rwenyu rworudyi dungira ramakaita kuti rive renyu.

¹⁶ Vakaupisa nomoto; vakautema, ngavaparare nokungoona uso hwenyu hunotsiura hoga.

¹⁷ Simba roruoko rwenyu ngarive pamusoro pomunhu ari kurudyi rwenyu Mwanakomana womunhu wamakazvisimbisira pachenyu.

¹⁸ Ipapo hatizombofa takakufuratirai, tipeiwo upenyu isu tinodaidza zita renyu.

¹⁹ Tiiteiwo zvatakanga takaita kare TENZI Mwari wehondo nehondo. Uso hwenyu ngaupenye mutiponese.