Mapisarema 76 - Bhaibhiri Idzva rechiShona rine Dhuterokanonika

Muimbisi, rumbo urwu rwunoimbwa nezvokuimbisa zvine tambo dzewaya. Rwiyo rwaAsafu. Rumbo.

Mwari anokunda

¹ Mwari anozivikanwa maJudha, zita rake iguru muIsiraeri.

² Akadzika musha muJerusaremu, akazviitira pokugara muZioni.

³ Imomo akatyora miseve yaivaima nenhoyo nebakatwa nezvombo zvehondo. Dzepfunde.

⁴ Mbiri yenyu yaishamisa zvisingatauriki pamakomo ehuhombarume hwenyu.

⁵ Magamba akatorerwa zvaainge apamba; akadzirara hope dzorufu, varwi vehondo vakatadza kushandisa maoko avo.

⁶ Pamakangotsiura imi Mwari waJakobho, mutasvi nebhiza rake vakabva vaoma pasi kuti papata.

⁷ Asi imi, munotyisa zvakanyanya, ndiani angamire pamuri kana maviruka nehasha?

⁸ Imi makatonga muri kudenga nyika yakatya ikati zii kunyarara,

⁹ Mwari paakasimuka kuti achitema kutonga kwake achinunura vose vanodzvanyirirwa panyika. Dzepfunde

¹⁰ Kushatirwa kwavanhu kunozoperera mukukurumbidzai, vanenge vasara netuhasha twavo munovaunganidza zvenyu kwamuri.

¹¹ Tsidza hako kuna TENZI Mwari wako asi uite zvawatsidza vose vari munharaunda ngavaunze zvipo kwaari, iye anofanira kutyiwa.

¹² Anoodza mwoyo yamachinda, anotyisa madzimambo apasi.