Mapisarema 75 - Bhaibhiri Idzva rechiShona rine Dhuterokanonika

Muimbisi, imbisa saUsaparadze rwiyo urwu rwaAsafu. Rumbo.

Kutonga kwaMwari

¹ Tinokutendai Mwari, tinokutendai. Tinodana zita renyu tichikurukura zviito zvenyu zvinoshamisa.

² Panguva yakatemwa yandakasarudza ndichatonga noruenzaniso,

³ pachazunguzika nyika navagari vayo vose. Ndini ndichachengeta mbiru dzayo dzakagadzikana. Dzepfunde.

⁴ Ndinoti kuna vanozvikudza, “Musazvikudze” kuvakaipa ndinoti, “Musasimudze musoro.”

⁵ Musasimudze musoro kana kuomesa musoro pakutaura.

⁶ Kusimudzirwa hakubvi kumabvazuva kana kumadokero kana kubva kugwenga,

⁷ asi Mwari ndiye anotonga, ndiye anodzikisa mumwe achisimudzira mumwe.

⁸ Nokuti muruoko rwaTENZI mune mukombe une waini inotutuma ina masanganiswa chaiwo anoidurura vakaipa vose vapasi vagoinwa namasese ose.

⁹ Asi ini ndinofara nokusingaperi ndichaparidza nokuimba ndichirumbidza Mwari waJakobho.

¹⁰ Misoro yavakaipa achaidimbura misoro yavakarurama ichasimudzirwa.