Mapisarema 3 - Bhaibhiri Idzva rechiShona rine Dhuterokanonika

Munamato wamangwanani wokukumbira rubatsiro

Rwiyo rwaDhavhidhi paaitiza mwana wake Abhusaromu.

¹ Nhai TENZI, kuwanda here ikoko kwakaita mhandu dzangu! Vazhinji vavakundimukira.

² Vazhinji vari kunditi, “Mwari haambomubatsira.” Dzepfunde

³ Asi kwandiri imi TENZI ndimi nhoo yangu. Ndimi mbiri yangu, uye ndimi munoita kuti ndisimudze musoro.

⁴ Ndinodaidzira nezwi rangu kuna TENZI? Iye achandipindura ari mugomo rake rinoera. Dzepfunde

⁵ Ndinongoti pasi rarei ndobva ndakotsira. Ndozomukazve nokuti TENZI anondichengeta.

⁶ Handityi zviuru zvavanhu zvakazanirana, zvavanhu varongana vakandikomba, vanoda kundirwisa.

⁷ Simukai TENZI, ndinunureiwo Mwari wangu nokuti imi, munorova mhandu dzangu dzose padama. Vakaipa munovagura meno.

⁸ TENZI ndiye anonunura. Chikomborero chenyu ngachive pavanhu venyu. Dzepfunde