Mapisarema 22 - Bhaibhiri Idzva rechiShona rine Dhuterokanonika

Muimbisi rumbo urwu runoimbwa mayimbiro “enondo yamambakwedza.” Rumbo rwaDhavhidhi.

Kurwadziwa nechivimbo chomururami

¹ Mwari wangu, Mwari wangu mandisiireiko; muri kure kure seiko pakundibatsira uye kumazwi okugomera kwangu.

² Mwari wangu, ndinochema masikati asi hamupinduri uye nousiku asi handiwani zororo

³ asi imi muri mutsvene, pakurumbidzwa, ndimi makagadzwa umambo chaihwo muIsiraeri.

⁴ Madzibaba edu akavimba nemi, vakavimba, imi mukavanunura.

⁵ Vakachema kwamuri vakanunurwa vakavimba nemi vakasanyadziswa.

⁶ Asi ini ndiri honye, handisi munhu ndinoshorwa navanhu, ndinozvidzwa navanhu.

⁷ Vose vanondiona vanondisveeredza, vanondimonyera muromo vachizunguza musoro.

⁸ “Akazviturira kuna TENZI, ko ngaachimuponesa, ngaachimununuraka nokuti anomuda.”

⁹ Asi imi ndimi makandiburitsa munhumbu mukandichengeta zvakanaka pandaiyamwa.

¹⁰ Ndakapirwa kwamuri kubvira pakuberekwa kwangu. Kubvira pandakaberekwa naamai vangu ndimi manga muri Mwari wangu.

¹¹ Musave kure neni nokuti nhamo iri padyo uye hapana wokundibatsira.

¹² Handira zhinji dzakandikomba, handira dzakasimba dzokuBhashani dzakandikomberedza.

¹³ Dzinondishamira muromo kwazvo seshumba dzinouraya dziri kudzvova.

¹⁴ Ndadururwa semvura, mapfupa angu asvodogoka, mwoyo wangu waita senamo, wanyongodeka mudundundu mangu.

¹⁵ Simba rangu rakatooma kuti papata sezenga. Rurimi rwangu rwavakutonamira kumatadza, matonditi rapata muguruva rorufu.

¹⁶ Imbwa dzakandikomberedza, chikwata chavakaipa chakanditenderedza; vabaya maoko angu namakumbo angu,

¹⁷ ndavakutokwanisa kuverenga mapfupa angu ose; vanondinan'anidza vachinyatsondiongorora.

¹⁸ Vari kugoverana zvavo zvipfeko zvangu; hanzu dzangu varikutodziitira chin'ange.

¹⁹ Asi imi TENZI regai kuva kure; imi simba rangu kurumidzai kuzondibatsira.

²⁰ Ndinunureiwo kubakatwa mununure upenyu hwangu kusimba rembwa.

²¹ Ndinunureiwo kumuromo weshumba, ndipindureiwo, ndiri parumano rwenyanga dzenyati.

²² Iniwo ndichaparidza zita renyu kuhama dzangu, mukati mesangano ndichakurumbidzai.

²³ “Imi munotya TENZI murumbidzei, imi mose vana vokwaJakobho, murumbidzei. Mudederei imi vana vokwaIsiraeri

²⁴ nokuti haana kuzvidza kana kusema nhamo yavatamburi. Haana kuvanza uso hwake kwaari asi akamunzwa paakachema kwaari.”

²⁵ Zvokuti ndikurumbidzei mugungano guru, zvinotobva kwamuri, zvandakatsidza ndichazviita ndiri muvanhu vanokutyai.

²⁶ Varombo vachadya vakaguta vanomutsvaka vacharumbidza TENZI, dai mukangorarama nokusingaperi.

²⁷ Nyika dzapasi pano dzicharangarira dzigodzokera kuna TENZI mhuri dzose dzamarudzi avanhu dzigwadame pamberi penyu

²⁸ nokuti umambo ndohwaTENZI uye anotonga pamusoro pevechirudzi.

²⁹ Vose vanozvikudza vapanyika vachamugwadamira vose avo vachapinda muguva navose vasingagoni kuzviraramisa vachatozomupfugamira chete.

³⁰ Zvizvarwa zvichauya zvichamushumira zvizvarwa zvinotevera zvichataurirwa nezvaTENZI

³¹ zvichauyawo zvigoparidza ururami hwake kuvanhu vachatozozvarwa kuti, “TENZI akazviita.”