Genesi 35 - Bhaibhiri Idzva rechiShona rine Dhuterokanonika

Mwari anokomborera Jakobho paBhetieri

¹ Mwari akataurira Jakobho kuti, “Chisimuka uende kuBhetieri ugareko, undigadzirire atari ikoko ini Mwari nyakuzviratidza kwauri panguva yawakatiza mukoma wako Esau.”

² Jakobho ndokuudza mhuri yake navose vaaive navo kuti, “Rasai vamwari vamunavo vasirivo, mushambe mupfeke dzimwe hanzu.

³ Tichaenda kuBhetieri kundogadzira atari yokunamatira Mwari akandinzwa akandibatsira pandaitambudzika. Aiva neni kwose kwandaienda.”

⁴ Vakabva vapa Jakobho vamwari vasirivo vavakanga vainavo, nemhete dzaiva munzeve dzavo. Jakobho akazvicherera pasi pomuti womuoku waiva pedyo neShikemu akazvifushira.

⁵ Kuzoti vapinda munzira, vanhu vamaguta omunharaunda iyoyo vakabatwa nokutya kwakabva kuna Mwari zvokuti havana kudzingirira vanakomana vaJakobho.

⁶ Jakobho navanhu vake vose vaaiva navo vakazosvika kuguta rainzi Ruzi kana kuti Bhetieri riri munyika yeKanani.

⁷ Akavaka atari ipapo akapatumidza zita rokuti Eribhetieri nokuti Mwari akanga azviratidza kwaari ipapo panguva iya yaakatiza mukoma wake.

⁸ Ipapo ndipo pakafira Dhebhora akarera Ribheka. Akavigwa pasi pomuoku kumaodzanyemba kweBhetieri. Saka muti wacho wakatumidzwa zita rokuti Muoku Wokuchema.

⁹ Jakobho paakanga adzoka kuMesopotamia Mwari akazviratidzazve kwaari akamukomborera.

¹⁰ Mwari akati kwaari, “Handiti zita rako ndiJakobho, kubvira zvino hauchanzi Jakobho, wava kunzi Isiraeri.” Naizvozvo akatumidzwa zita rokuti Isiraeri.

¹¹ Mwari akamutizve, “Ndini iye Aripagomo. Bereka vana, muwande. Mumhuri yako muchabuda ndudzi dzavanhu muchabudawo madzimambo.

¹² Nyika yandakanga ndapa Abhurahamu naIsaki ndinokupa iwe, ndinopawo nyika iyoyo kuzvizvarwa zvako zvichauya.”

¹³ Mwari akazobva paakanga achitaura naye oenda zvake kudenga.

¹⁴ Jakobho akamisa ibwe refu rechiyeuchidzo panzvimbo apa pakataura Mwari naye, akadururira pamusoro paro mupiro wechokunwa akadururirawo mafuta pariri.

¹⁵ Jakobho akatumidza nzvimbo iyi zita rokuti Bhetieri.

Rufu rwaRakeri

¹⁶ Vakabva kuBhetieri vosimudzira rwendo rwavo voenda. Asi vachiri chinhambwe nokusvika munyika yeEfurati nguva yaRakeri yokusununguka yakasvika. Rakeri akatambura chaizvo pakusununguka kwake.

¹⁷ Zvaakanga ari pahata akatambura zvikuru, vanyamukuta vakati, “Usatye zvako wapiwa zvakare chimwe chikomana.”

¹⁸ Rakeri akataura achitandadza kuti zita romwana rinonzi Bhenoni. Asi baba vake vakamutumidza zita rokuti Bhenjamini.

¹⁹ Rakeri akafirapo akavigwa panzira inoenda kuEfurati kana kuti Bheterehemu.

²⁰ Jakobho akamisa ibwe refu kumusoro kweguva rake. Ndiro ibwe refu repaguva raRakeri riripo nanhasi uno.

²¹ Isiraeri wakareyo Jakobho akabvapo osimudzira rwendo rwake akandodzika matendhe ake ave panzvimbo yokunge tapfuura shongwe yeEdheri.

Vanakomana vaJakobho

²² Isiraeri paaiva agereko Rubheni dangwe rake rakatadza naBhiriha murongo wababa vake, Isiraeri ndokuzvinzwa. Jakobho aiva navana vakomana gumi navaviri.

²³ Vanakomana vaRea ndiRubheni dangwe rake, naSimeoni naRevhi naJudha naIsakari naZebhuruni.

²⁴ Vanakomana vaRakeri ndiJosefi naBhenjamini.

²⁵ Vanakomana vaBhiriha muranda wechikadzi waRakeri ndiDhani naNafutari.

²⁶ Vanakomana vaZiripa muranda wechikadzi waRea ndiGadhi naAsheru. Ivava ndivo vanakomana vaJakobho vakaberekerwa kuMesopotamia.

Rufu rwaIsaki

²⁷ Jakobho akandoona baba vake Isaki kuMamure kana kuti guta reAribha ndiro rimwechetero rinonzi Hebhuroni. Kwakambogara Abhurahamu naIsaki.

²⁸ Isaki akagara zana namakumi masere amakore.

²⁹ Isaki akazochembera zvake akakwegura zvokugutsikanawo ndokufa zvake oendawo kwakaenda vamwe vokwake vachakabvu. Esau naJakobho vana vavo vakavaviga.