Eksodo 31 - Bhaibhiri Idzva rechiShona rine Dhuterokanonika

Mhizha dzokugadzira tendhe rinoera

¹ Tenzi akati kuna Mosesi,

² “Chionaka ndasarudza ndikadomawo nezita Bhezarieri mwanakomana waUri, muzukuru waHuri, wedzinza rokwaJudha,

³ ndikamuzadza nomweya waMwari. Ndamupa kunzwisisa uye njere kuti agone kuita mabasa ose oumhizha anoti,

⁴ kufanotara mifananidzo yezvinhu zvingade kuzopfurwa zvendarama nezvesirivha nezvendarira

⁵ nokuveza tumabwe tunokosha twokuisa pazvinhu nokuvezawo miti nokuita mamwewo mabasa oumhizha.

⁶ Ndasarudzawo Ohoriabhu mwanakomana waAhisamaki, wedzinza rokwaDhani kuti abatsirane naBhezareri. Ndapa dzimwe mhizha ungwaru hwokuti dzigone kugadzira zvose zvandakarayira kuti zviitwe zvinoti,

⁷ tendhe rokusanganira, nebhokisi rechitenderano, nehwidibiro yaro yokurikwidibirisa kwouya zvose zvomutendhe rokusanganira zvinoti,

⁸ teburu nemidziyo yayo, nechigadzikiro chomwenje chakagadzirwa nendarama chaiyo yakanakisisa pamwechete nemidziyo yacho yose neatari yokupisira rusenzi,

⁹ kwoti atari yokupisira zvibayiro pamwechete nemidziyo yayo yose, nedhishi rokushambira pamwechete nechigadzikiro charo,

¹⁰ kwouyawo hanzu dzinoera dzakanyatsorukwa dzomupristi Aroni nehanzu dzavanakomana vake dzavanopfeka pavanoita basa roupristi,

¹¹ kwozoti mafuta okuzodza, norusenzi runonhuhwira rwomunzvimbo inoera, ngazviitwe sokukurayira kwandakuita.”

Sabata, zuva rokusabata basa

¹² Tenzi akataurira Mosesi kuti,

¹³ “Iwe taurira vaIsiraeri uchiti, ‘Chengetai maSabata angu nokuti ndiwo mucherechedzo wangu nemi uchagara uripo pazvizvarwa zvenyu zvose, wokuratidza kuti ini Tenzi ndini ndakakusarudzai kuti muve vanhu vangu vatsvene.’

¹⁴ Munofanira kuchengeta Sabata nokuti izuva rinoera kwamuri. Anorin'oresa ngaaurayiwe, kuwana anoshanda pazuva iroro, ngaachekaniswe ukama navanhu wokwakwe.

¹⁵ Basa ngariitwe zvaro mumazuva matanhatu, asi zuva rechinomwe iSabata rokunyatsozorora, izuva rinoera rinoereserwa Tenzi. Kuwana anoita basa pazuva irori, anofanira kutourayiwa.

¹⁶ Saka vaIsiraeri ngavachengete Sabata pazvizvarwa zvavo zvose ngavachengete sechitenderano chokugara nokugara.

¹⁷ Iwoyo mucherechedzo wechitenderano changu navaIsiraeri narini wose wokuti ini Tenzi ndakasika denga napasi pamazuva matanhatu, pazuva rechinomwe ndikarega kuita basa ndikafurwa zvangu nemhepo.”

¹⁸ Mwari akapedza kutaura naMosesi pagomo reSinai, akabva amupa mafendefa maviri echitenderano, matombo maviri akanyorwa noruoko rwaMwari.