Eksodo 15 - Bhaibhiri Idzva rechiShona rine Dhuterokanonika

Rwiyo rwaMosesi

¹ Mosesi navaIsiraeri vakabva vaimbira Tenzi rwiyo urwu vachiti: “Ndichaimbira Tenzi nokuti akurira zvino mukurumbira, ngoro dzehondo navachairi vadzo, azviti mugungwa bvuva bvuva.

² Tenzi ndiye simba rangu, ndiye rwiyo rwangu, ndiye mununuri wangu, iyeyu Mwari wangu wandinorumbidza, Mwari wababa vangu wandinopemberera.

³ Tenzi igamba rehondo, Tenzi ndiro zita rake.

⁴ “Akakandira mugungwa ngoro dzehondo, ngoro dzaFarao nehondo yake, nyanzvi dzamasoja ake mugungwa Dzvuku akadzindondomesa

⁵ mvura zhinji ikavanyudza vakanyura pasi pasi kuti vido sebwe!

⁶ Rudyi rwenyu Tenzi, ruoko rune simba rinotyisa. Rudyi rwenyu Tenzi, runopwanya-pwanya vavengi.

⁷ “Noumambo hwenyu huno mukurumbira, munobwadutsira pasi mhandu dzenyu. Hasha dzenyu dzinovavirukira dzichivaroromesa samashanga.

⁸ Nehasha dzenyu makangoti furidzei, mvura ndiye unga unga kuungana. Mvura yegungwa yakati dzuu kumira sechidziro. Mvura zhinji pakati pegungwa yakanyatsoti twi kumira.

⁹ Muvengi akati, ‘Regai ndivatevere ndivabate, ndigoveranise zvandinenge ndapamba, ndichitorawo zvandinoda. Ndichavaburitsira muhara bakatwa rangu, ndivakatakazhe noruoko rwangu, vanyatsopera kuti dhuu.’

¹⁰ Asi imi makafuridza gungwa rikanyudza vaIjipiti, vakanyura somutobvu mumvura zhinji.

¹¹ Pana vamwari vose, ndiani angaenzaniswe nemi Tenzi? Ndianiko ano mukurumbira woutsvene semi, ano mukurumbira unotyisa ukadai, muiti wamabasa anoshamisa?

¹² Makatambanudza ruoko rwenyu rworudyi, nyika ikamedza vavengi vedu.

¹³ Vanhu vamakanunura munovatungamirira, munovatungamirira nomwoyochena wenyu. Munovatungamirira nesimba renyu munovaperekedza kunyika yenyu inoera.

¹⁴ Ndudzi dzavanhu dzakazvinzwa dzikadedera zvikuru, vaFirisitia vabatwa nokutya kukuru.

¹⁵ Vakuru vakuru veEdhomu vadumbirwa nokutya. Machinda avaMoabhu ari kudedera, vanhu vomuKanani vaparara nokutya.

¹⁶ Zvava kungoti kutya zvikati kudedera vadumbirwa nazvo vachiti nazvo papata sedombo nokutya, pamusana pesimba renyu guru, kusvikira vanhu venyu Tenzi vapfuura pavari, kusvikira vanhu venyu vamakanunura muuranda, vapfuura pavari.

¹⁷ Muchaenda navo mugovasima pagomo renyu. Ndiyo nzvimbo yamakasarudza imi Tenzi kuti ive musha wenyu, Nzvimbo Inoera yamakagadzirira namaoko enyu.

¹⁸ Tenzi achatonga kusvikira narini narini.”

¹⁹ Ngoro dzehondo dzaFarao dzamabhiza navachairi vadzo padzakapinda mugungwa, Tenzi akavati fuse fuse nemvura, asi vaIsiraeri vakayambuka vachitsika zvavo pasi pakaoma.

Rwiyo rwaMiriamu

²⁰ Muprofita Miriamu, hanzvadzi yaAroni, akatora katambureni kake, vanhukadzi vose vakabva vamutevera vachiridzawo tambureni dzavo vachitamba.

²¹ Miriamu akashaura vachiti; “Imbirai Tenzi nokuti akurira, akurira zvino mukurumbira, ngoro dzehondo navachairi vacho azviti mugunwa bvuva bvuva.”

II: RWENDO RWAVAISIRAIERI MURENJE Mvura yapaMara yaikarakata kuvava

²² Mosesi akatungamirira vaIsiraeri kubva paGungwa Dzvuku vachienda kurenje reShuru. Vakafamba mazuva matatu vari murenje iroro vasina pavakawana mvura.

²³ Vakazosvika kuMara asi vakatadza kunwa mvura yepo nokuti yaikarakata kuvava. Saka pakatumidzwa zita rokuti Mara.

²⁴ Ipapo vaIsiraeri vakapopotera Mosesi vachiti, “Zvino tonwei?”

²⁵ Mosesi akanamata kuna Tenzi. Tenzi akamuratidza chimwe chigwenzi Mosesi akachikanda mumvura, mvura iya ikabva yanaka. Ipapo Tenzi akavapa murao nomutemo achida kuona kuti vaIsiraeri vanoteerera here

²⁶ akati, “Kana mukazogara muchinyatsonditeerera ini Tenzi, Mwari wenyu muchiita zvinondifadza, muchichengeta mitemo nemirao yangu, handizokurovai neshamu yezvirwere yandakarova nayo vaIjipiti nokuti ini Tenzi ndini murapi wenyu.”

²⁷ Vakazondosvika kuErimu paiva namatsime gumi namaviri. Paivawo nemiti yomurara makumi manomwe. VaIsiraeri vakadzika matendhe avo ipapo paiva nemvura.