Mapisarema 99 - Bhaibhiri Idzva rechiShona rine Dhuterokanonika

Mwari Mambo wapasi pose

¹ TENZI ndimambo vanhu vanodedera anogara pachigaro chake choushe, pakati pamakerubhi. Nyika inodengendeka.

² TENZI mukuru muguta reZioni mukuru mukuru pavanhu vose.

³ Ngavarumbidze zita renyu guru rinotyisa. Iye anoera.

⁴ Mambo wesimba munoda ruenzaniso. Imi makamisa nduramo. Ndimi makaita kuti muna Jakobho muve noruenzaniso noururami.

⁵ Rumbidzai TENZI Mwari wedu, mugwadamirei pachitambarariko chake. Iye anoera.

⁶ Mosesi naAroni vaiva vamwe vavapristi vake uye Samueri aiva mumwe wevaidana zita rake, vaidana kuna TENZI iye achivapindura.

⁷ Aitaura navo ari mugore, ivo vakachengeta mirao yake nemitemo yaakavapa.

⁸ Imi TENZI Mwari wedu maivapindura, maiva kwavari Mwari anoregerera asi muchiranga zvavainge vatadza.

⁹ Rumbidzai TENZI Mwari wedu mumunamate pagomo rake rinoera nokuti TENZI Mwari wedu anoera.