Mapisarema 89 - Bhaibhiri Idzva rechiShona rine Dhuterokanonika

Nhetembo yaEtamu wechiEzira.

Rumbo rwenyika kana yapinda nhamo

¹ Ndichaimba ndichirumbidza mwoyochena wenyu nokusingaperi, TENZI, nomuromo wangu ndichaparidza kutendeka kwenyu kwezvizvarwa zvose.

² Nokuti mwoyochena wenyu uripo nokusingaperi. Kutendeka kwenyu kwakasimba samatenga.

³ Makati: “Ndakaita chitenderano changu newandakasarudza. Ndakatsidza kuna Dhavhidhi muranda wangu ndichiti,

⁴ ‘Ndichaita kuti zvizvarwa zvako zvivepo nokusingaperi ndigosimbisa chigaro chako choumambo pazvizvarwa zvose.’ ” Dzepfunde.

⁵ Matenga anorumbidza zvinoshamisa zvenyu TENZI uye kutendeka kwenyu mugungano ravakarurama.

⁶ Ndiani mudenga'mu angaenzaniswe nemi TENZI? Ndiani pakati pavana vamwari angaenzaniswe naTENZI,

⁷ Mwari anodederesa kune ungano yavatsvene.

⁸ TENZI Mwari wehondo nehondo ndiani ane simba semi, TENZI nokutendeka kwenyu uku muna zvose.

⁹ Imi munotonga kusimuka kwamasaisai, kana osimuka munoanyaradza.

¹⁰ Imi makapwanya Rahabhu sechitunha, makaparadza mhandu dzenyu nesimba roruoko rwenyu.

¹¹ Denga nderenyu pasiwo ndepenyu, nyika nazvose zvirimo, ndimi makazvisika.

¹² Kuchamhembe nokumaodzanyemba ndimi makakusika. Gomo reTabhori nereHeremoni anokurumbidzai norufaro.

¹³ Muno ruoko rune simba chanza chenyu chakasimba, ruoko rwenyu rworudyi rwakasimudzwa pamusoro.

¹⁴ Ururami noruenzaniso ndihwo hwaro hwechigaro chenyu chokutonga munotungamidza mwoyochena nokutendeka.

¹⁵ Vakakomborerwa zvavo vanoziva kupururudza vachifara, vanofamba muchiedza chokuvapo kwenyu TENZI,

¹⁶ vanofara nezita renyu zuva rose uye vanorumbidza ururami hwenyu.

¹⁷ Ndimi simba ravanoinzva naro; inyasha dzenyu kuti simba redu ribudirire.

¹⁸ Nhowo yedu iri mumaoko aTENZI, mambo wedu ari mumaoko omutsvene waIsiraeri.

¹⁹ Makazotaura ipapo muchioneso kune munhu wenyu wakatendeka muchiti, “Ndakapa rubatsiro rwangu kugamba, ndakasimudzira pamusoro mumwe wandakasarudza muvanhu.

²⁰ Wandakawana wacho ndiDhavhidhi, muranda wangu. Ndakamuzodza namafuta angu anoera,

²¹ zvokuti simba rechanza changu richagara maari, simba roruoko rwangu richamusimbisa.

²² Hapana muvengi achamukunda, vakaipa havachazomukurira.

²³ Ndichafanopwanya mhandu dzake ndichiuraya vanomuvenga.

²⁴ “Ndichatendeka kwaari uye ndichamuitira mwoyochena, pamusana pezita rangu simba rake richabudirira.

²⁵ Ndichaisa gungwa mumaoko ake uye nzizi dzichava muchanza chake chorudyi.

²⁶ Achandidana kuti, ‘Imi baba vangu. Mwari wangu nedombo rangu randinopona naro.’

²⁷ Ndichamuita dangwe rangu nomukuru wamadzimambo apasi.

²⁸ “Ndicharamba ndiine mwoyochena kwaari nokusingaperi. Chitenderano changu naye chicharamba chakasimba.

²⁹ Ndichaita kuti vedzinza rake, vokutonga, varambe varipo uye chigaro chake choushe chirambe chiripo sedenga.

³⁰ “Kana vana vake vakakanda pasi mutemo wangu vakarega kutevera zvandinoronga,

³¹ Kana kuti vakarega kuchengeta zvirevo zvangu, uye vakatyora mirao yangu,

³² ndichavarangira chitadzo chavo neshamhu uye uipi hwavo netsarapu.

³³ Asi handiregi kuva nemwoyochena kana kusava ndakatendeka kwavari.

³⁴ Handimbotyora chitenderano changu kana kusandura zvandakataura.

³⁵ “Ndakapika noutsvene hwangu chakamwe pasina zvokurevera Dhavhidhi nhema.

³⁶ Ndichaita kuti vedzinza rake vokutonga varambe varipo uye chigaro chake choushe chirambe chiripo chero zuva richiri kuvheneka pamberi pangu.

³⁷ Chichavapo semwedzi nokusingaperi mboo yakatendeka iri mudenga.” Dzepfunde.

³⁸ Asi imi makasiya muzodzwa wenyu mukamuramba uye makamushatirirwa.

³⁹ Makaramwa chitenderano chenyu nomuranda wenyu makaumburudza ngundu yamambo muvhu.

⁴⁰ Makapaza tsvingo dzake dzose makaparadza nhare dzake dzokuzvidzivirira nadzo muhondo kusara ava matongo.

⁴¹ Vose vanopfuura napaari vanopamba zvinhu zvake. Ava chiseko chavavakidzani vake.

⁴² Makaratidza kuti vavengi vake vakunda nokusimudza ruoko rwavo rworudyi; mukaita kuti mhandu dzake dzifare.

⁴³ Makamininutsa bakatwa rake mukaita kuti akurirwe muhondo.

⁴⁴ Makamutorera mumaoko tsvimbo yake youmambo; makaputsira pasi chigaro chake choumambo.

⁴⁵ Makamuchembedza nokukasira, makamuzadza nenyadzi. Dzepfunde

⁴⁶ Kusvikira rinhiko nhai TENZI? Mucharamba makazvivanza nokusingaperi here? Kusvika riniko hasha dzenyu dzichiviruka somoto kudai?

⁴⁷ Yeukai kupfupika kwakaita upenyu hwangu chamakasikira munhu unobva wachishaya.

⁴⁸ Ndiani angararame asingazosvika pakufa. Ndiani angazviponese kusimba renzvimbo yavakafa. Dzepfunde.

⁴⁹ Nhai, TENZI, ko mwoyochena wenyu uya wakare uripi wamakambotsidza kuna Dhavhidhi pamusana pokutendeka kwenyu?

⁵⁰ Rangarirai TENZI kushorwa kunoitwa muranda wenyu nokutakura kwandinoita mumwoyo mangu kushorwa ikoko kunobva kuvanhu vakawanda

⁵¹ kuchiitwa nemhandu dzenyu TENZI dzichishora muzodzwa wenyu pose paanofamba.

⁵² TENZI ngaarumbidzwe nokusingaperi. Ameni, Ameni.