Mapisarema 85 - Bhaibhiri Idzva rechiShona rine Dhuterokanonika

Muimbisi, urwu rwiyo rwavana vokwaKora.

Kunamatira nyika kuti ive norugare noruenzaniso

¹ Mwari makafadzwa nenyika yenyu, makadzorera vokwaJakobho zvavakangavari.

² Makaregerera vanhu venyu uipi hwavo mukavakanganwira zvivi zvavo zvose. Dzepfunde

³ Makazvipodza kuhasha dzenyu dzose mukazvidzora pakushatirwa kwenyu kwakanyanya.

⁴ Tiiteiwo zvatanga takaita kare, Mwari mununuri wedu chiregai kuva nehasha nesu.

⁵ Mucharamba makatishatirirwa narini here? Mucharebesa hasha dzenyu kuzvizvarwa zvose here?

⁶ Hamuchatimutsiridzazve here kuti vanhu venyu vafare nemi?

⁷ Tiitireiwo mwoyochena, TENZI mutiponesewo.

⁸ Ndichanzwa zvichataurwa naTENZI Mwari nokuti achataura zvorugare kuvanhu vake, kuna vatsvene vake. Dai vakangorega zvavo kupindukira kuupenzi.

⁹ Hongu ruponeso rwake rwuri padyo kuna vanomutya; mbiri yokuvapo kwake ichagara munyika medu.

¹⁰ Mwoyochena nokutendeka zvichasangana, ururami norugare zvichambundirana.

¹¹ Kutendeka kuchakura kuchibva pasi; ururami huchatarisa pasi huri kudenga.

¹² TENZI achapawo zvakanaka; nyika yedu ichaberekawo zvakawanda.

¹³ Ururami huchatungamira pamberi pake huchimugadzirira paanozofamba napo.