फिलिप्पियनमन 1 - सादरी नवाँ नियम

¹ इ चिट्ठी यीशु मसीह केर दास मोंय पौलुस आउर तीमुथियुस बटले हेके। मोंय इ चिट्ठी फिलिप्पी शहर में रहेक वाला परमेश्‍वर केर सोउब पवितर आदमीमन, अगुवामन आउर सेवकमन केर नाँव में लिखाथों, जेमन मसीह यीशु केर हेकैं।

² हमर आबा परमेश्‍वर आउर प्रभु यीशु मसीह केर किरपा आउर शांति तोहरेमन के मिलते रहोक।

पौलुस केर प्रार्थना आउर धन्यबाद

³ मोंय जब-जब तोहरेमन के याइद करोना, तब-तब अपन परमेश्‍वर के धन्यबाद देवोना।

⁴ आउर अपन प्रार्थना में खुशी से तोहरे सोउब केर लगिन सोउब बेरा बिनती करोना।

⁵ काले कि तोहरेमन आदमीमन के यीशु मसीह केर बारे में शुभ समाचार बताएक में मोर मदइत काइर हा। इ काम के तोहरे जे दिन यीशु मसीह केर बारे में शुभ समाचार उपरे बिसवास करला सेहे दिन से कराथा, आउर एखन तक करते आवाथा।

⁶ आउर मोके इ गोइठ केर भरसा अहे कि परमेश्‍वर जे तोहर में बेस काम शुरु काइर हे, ओहे उके यीशु मसीह केर घूइर आवेक दिन तक पूरा करी।

⁷ तोहर लगिन मोर इ बिचार सही हेके काले कि मोंय तोहरेमन से ढेइर प्रेम करोना, काले कि जब मोंय जेहेल घर में अहों, चाहे शुभ समाचार केर रक्षा कराथों आउर इके साबित कराथों, तो तोहरे मोर इ किरपा में शामिल होई जावाला जेके परमेश्‍वर मोर उपरे काइर हे।

⁸ इकर बारे में परमेश्‍वर मोर गवाह हेके कि मोंय मसीह यीशु केर जइसन प्रेम काइर के तोहरे सोउबमन के देखेक लगिन तरसाथों।

⁹ आउर मोंय इ प्रार्थना करोना कि एक दोसर लगिन तोहर प्रेम, गेयान आउर सोउब रकम केर भितरी समझ सहित बढ़ते हें जाओक।

¹⁰ ताकि तोहरेमन इ चुनाव करेक केर लायक बाइन जबा कि कोन रकम केर काम करेक उचित अहे, ताकि मसीह केर दोबारा घूइर आवेक दिन तक पवितर आउर निरदोष बनल रहबा, आउर ठोकर नी खाबा।

¹¹ आउर उ धरमी बनेक केर फार मतलब बेस गुणमन से जे यीशु मसीह देवेक पारेला, भरपूर होते जबा, जेकर से परमेश्‍वर केर महिमा आउर स्तुति होते रहोक।

पौलुस केर जेहेल जाएक से शुभ समाचार केर बढ़ती

¹² हे भाईमन, मोंय चाहोना कि तोहरेमन इ जाइन लेवा कि मोर उपरे जे बीत हे, उकर से शुभ समाचार के हें फैलेक में मदइत मिल हे।

¹³ हिंयाँ तक कि रोमी महाराजा केर राइज में समूचा पलटन आउर बचल सोउब आदमीमन में इ साबित होई जाय हे कि मोंय मसीह केर सेवक होवेक केर चलते जेहेल में अहों।

¹⁴ आउर मोर जेहेल में रहेक केर चलते ढेइर बिसवासी भाई बहिनमन के पोक्ता बिसवास होलक। उमन प्रभु में भरसा राइख के पहिले से एतना बगरा साहसी बाइन गेलैं कि बेगर कोनों डार केर परमेश्‍वर केर बचन के सुनाएक लगलैं।

¹⁵ थोरेक आदमीमन तो हमरे से हिसिंगा आउर झगरा केर चलते मसीह केर परचार करैना मगर थोरेक आदमीमन भला बिचार से परचार करैना।

¹⁶ जेमन भला बिचार से परचार करैना, उमन मोर से प्रेम करेक केर चलते करैना, काले कि उमन जानैना कि मोंय शुभ समाचार केर रक्षा करेक केर चलते जेहेल में अहों।

¹⁷ आउर थोरेक आदमीमन तो सीधा मन से निहीं मगर हमरेमन से हिसिंगा करेक केर चलते मसीह केर परचार करैना, इ सोइच के कि एइसन करेक से जेहेल में मोर दुःख आउर बगरा बढ़ोक।

¹⁸ तो का होलक? हिसिंगा से चाहे भला बिचार से, मसीह केर शुभ समाचार केर परचार तो होवाथे, आउर मोंय इकर से खुश अहों, आउर खुश हें रहमूँ।

मोंय खुशी मनाते हें रहमूँ

¹⁹ मोंय जानोना कि तोहर प्रार्थनामन केर चलते, आउर यीशु मसीह बटले आवेक वाला पवितर आत्मा केर मदइत से मोंय छुटकारा पाय जामूँ।

²⁰ मोर दिल केर इच्छा आउर आसरा इ हेके कि मोंय कोनोवें गोइठ में नी लजामूँ, मगर मोके मसीह केर बारे में बोलेक केर हिम्मत होवोक, जइसन मोंय आगे हों काइर रहों। चाहे मोंय जिंदा रहमूँ चाहे मोइर जामूँ, मोर पूरा जिंदगी से मसीह केर बड़ाई सोउब बेरा करते रहमूँ।

²¹ काले कि अगर मोंय जिंदा रहमूँ तो मसीह लगिन रहमूँ, आउर अगर मोइर जामूँ तो इ मोर लगिन आउर हें भला होवी काले कि मोंय मसीह केर संगे रहमूँ।

²² मगर, अगर काया में जिंदा रहेक हें मसीह केर काम करेक लगिन फायदा अहे, तो मोंय नी जानोना कि कोन के चुनमूँ।

²³ मोंय दुयो केर माझे असमंजस में अहों; जीव तो चाहेला कि मोइर के मसीह ठिना जाय के रहमूँ, काले कि इ ढेइर हें बेस हेके।

²⁴ मगर काया में रइह के तोहरे केर मदइत करेक लगिन आउर हें जरुरी अहे।

²⁵ इ लगिन मोके इकर पूरा भरसा अहे, आउर मोंय जानोना कि मोंय जिंदा रहमूँ, आउर तोहरेमन केर संगे रहमूँ, जेकर से तोहरेमन बिसवास में मजबूत आउर खुश रहबा।

²⁶ ताकि जब मोंय फिन से तोहरे केर संगे रहेक लगिन आमूँ तो तोहरेमन मोर चलते मसीह यीशु केर बारे में आउर हें बगरा घमंड करेक पारबा।

²⁷ तोहरे सिरिफ एतना करा कि तोहर चाइल-चलन मसीह केर शुभ समाचार केर लायक होवोक। चाहे मोंय आय के तोहरेमन के देखमूँ, चाहे नी हों आमूँ, तो तोहरे केर बारे में एहे सुनमूँ कि तोहरेमन एक हें मन होई के स्थिर अहा, आउर एक संग मिल के शुभ समाचार में बिसवास लगिन मेहनइत करते रहाला।

²⁸ आउर कोनों गोइठ में बिरोधीमन से नी डराला। तोहरे केर साहस उमन लगिन नाश होवेक केर चिन्हा हेके, मगर तोहर लगिन इ परमेश्‍वर बटे से छुटकारा केर चिन्हा हेके।

²⁹ इ सोउब दया मसीह केर चलते तोहर उपरे होलक कि तोहरे ना सिरिफ उकर उपरे बिसवास करा, मगर उकर लगिन दुःख हों उठावा।

³⁰ तोहरेमन के हों ओइसनेहें दुःख उठाएक अहे जइसन तोहरेमन मोके दुःख उठाते देइख रहा, जब मोंय तोहर संगे फिलिप्पी शहर में रहों, आउर एखन हों जे दुःख मोके जेहेल में होवाथे उके सुनाथा।