Efesos 3 - Saaho Cusub Cahde

Mece warehi sirri yimidhdhige

¹ Tayimhi sabbatah, anu Bawlos, Masiix kin Yeesus maxbuushsha kiyom Aki-marak sin idhdhadde kinni.

² Sinah arhxuk Yallih nicmahi masxadaadara yakkiinim yoh tomxoyeh tanem toobbiinih tannawna kitin yarhxiinim liyo.

³ Tamaa ookomeh urhurhik sinalle akah uktubeh iniyookah, Yalli amaa mashthir waxyeh yi yiyshidhdhige.

⁴ Tayim taqhriin gedda lel, anu Masiix mashthirko liyo irhga macalsittoona dhictan.

⁵ Amayim lel tamaa kado Ufayi araxah yinqiddise kaa fartottit kee nobowah akah yumbulluweekah, tamaa aki ijojhi xiyaw dhayloh maamadhdhaginna.

⁶ Ta sirri lel, Aki-mari Yahuudlih worosa, inki nabsehi karim, mece warehi araxah lel Masiix kin Yeesusudde amaa wacde yangale mara kinoonim kinni.

⁷ Anu lel kaa xaylahi abittoh yoh tomxoye Yallih nicmah muttuxuwahi araxah ta mece warehi khaddaam ekke.

⁸ Umbuka yinqiddise maraako cindha yottah, tamaa ammirmirinnixe Masiix gadda Aki-maralle warroysho, ta nicma yottah kinni tomxoyem.

⁹ Tamaa ummanna yukhluqhe Yalladde dherh waqhte sucuteh yine mashthir hi xagara aymotta kinam umman tiyah caddoyishaanam yoh tomxoye.

¹⁰ Amayim lel tamaa mango xibar le Yallih xikma, kaniisat araxah tamaa carshi makaanonulle tane reezon kee mas-uuliin yayshadhdhago ciloh kinni.

¹¹ Tayim lel tamaa umman geedit Yallih xagara balih usuk ni Maddara kin Masiix kin Yeesus araxah abaysheh yane.

¹² Nanu Yeesus kee kayyadde lino imaanah, fidbeelih thummut-nekkeyaako Yallalle namaato kino.

¹³ Amaydo, tamaa anu sinah arhxuk geya cazaab, sin nabneh kinnik, niya ciddaanamko sin essera.

Dhaaco Efesosti xiyawah

¹⁴ Tayimhi sabbatah, Abbat nifille gululluubuwa,

¹⁵ umman xawaz carshe kee baarholle yaneya migac geyam kaako kinni.

¹⁶ Tamaa kaa nabnehi gadda balih lel, ishi Ufayi araxah sinni addadde xaylah akah tatririiniikah sinak aboo.

¹⁷ Masiix lel imaanah sin afcaadodde sigo dhaaco abak aniyo. Atin lel rimid dhirhiiteenih kaxanodde tamtakkaloona,

¹⁸ umbuka yinqiddise maraalih tekkiinih lel, kaa kaxanih fidaane kee dhedhdhan, xafta kee samta ayidhdha kinam meceetih tafhamoona,

¹⁹ kee tamaa xiyaw irhgaako aganalle kin Masiix kaxano taarhagoona, umbuka Yallih migeh tammaagoona ciloh lel dhaaco abak aniyo.

²⁰ Amaydo, tamaa nottadde yashtuqhule xayla balih, inkoh nanu essernam hido naxeesebemko ziyaada yeymengeh abo dhiica kayyah,

²¹ umbuka ijolle umman gedda kee umman gedih kaniisa kee Masiix kin Yeesus araxah, nabne Yallah takkoo. Amin.