Philipiko lạgitʼ Pạul apostolakʼ ciṭhi 4 - সান্তালী বাইবেল

¹ E boehako, iń do apeń dulạṛetʼpea ariń uihạretʼpea. Apege ińakʼ rạskạ do, ar apege ińakʼ jitạukʼ reakʼ mala do. E dulạṛiạko ape do Probhu Isorre teṅgo ṭak akae tahenpe.

Sopolha

² E Euodiạ ar Suntukh, iń do biseskaete noań nehõraben kana, Probhu Isor tulucʼ ben kolom mitʼ akante aben do mitʼ mon akae jemon ben tahen.

³ E sạri juri arãṛtiń am hõń nehõram kana, am do nukin maejiu goṛowạkinme. Unkin do Mạsi reaṅ bhage sombat iạte iń tulucʼ, ar Klement ar ińren eṭakʼ são kạmiyạko tulucʼ kosṭokin sahao akada. Nokokoakʼ ńutum do jion reakʼ puthire olakana.

⁴ Probhu tulucʼpe kolom mitʼ akante ape do jaoge rạskạkʼpe. Arhõń mena, rạskạkʼpe baṛe.

⁵ Apeakʼ mạ̃hirtetʼ do sanamko ṭhen baḍaeyokʼma. Probhu Isor do usạrageye daraekana.

⁶ Ar jãhãnakʼ reakʼge alope dandokʼa, bickom apeakʼ joto arojakʼko do koejoṅ ar nehõrate gunmanao johar salakʼ Isor baḍae ocoyepe.

⁷ Ona iạte, Isorakʼ okaṭakʼ suluk reakʼ katha manwa do hudiskate hõ bako bujhạu daṛeakʼkan, ona suluk do Mạsi Jisu hotete apeakʼ mon ar ontore rukhiyạitapea.

⁸ E boehako, mucạtʼre noageń mena, okaṭakʼ sạriyakʼkan, okaṭakʼ do lek anakʼkan, okaṭakʼ do niphuṭ ar khạṭige, okaṭakʼ do mońjge, okaṭakʼ do manot ńam lek kan, metakʼme okaṭakʼ do bhageakʼkan ar sarhao ńamokʼ, onako secʼ moneyakʼpe.

⁹ Ape do iń ṭhen khon okaṭakʼpe cetʼakatʼ ar bhage mentepe ataṅ akatʼ ar ińre okaṭakʼpe ńelakatʼ, ar ińakʼ mocate okaṭakʼpe ańjomakatʼ, onkage kạmipe. Enḍekhan sulukren Isor do ape tulucʼe tahena.

Dan iạte sarhao

¹⁰ Probhu Isorre ạḍitetʼgeń rạskạkʼ kana, ente ḍher din tayom ape do arhõpe disạ ruạṛkedińa. Sạrige ape do iń lạgitʼ jaogepe dạndikʼkan tahẽkana, menkhan ona ńel ocoytape lạgitʼ ạt do bape ńamleda.

¹¹ Ińakʼ jãhãn ṭonṭa iạte noa kathań roṛeda ona do baṅ, ente jãhã dosaregeń tahen inạrege kusi tahen iń cetʼ akawana.

¹² Ṭonṭare ar sareṛokʼre hõ iń do sanamakʼren hitạu akan hoṛ kạnạń. Jombikʼre ar reṅgejokʼre, sareṛokʼre se ṭonṭakʼre hõ cetʼleka kusi tahen jạruṛ ona doń baḍaegea.

¹³ Ar okoe daṛeye imạńkan uni hotetege iń do jotowakʼiń kạmi daṛeakʼ kana.

¹⁴ Enhõ ape do ińakʼ duk sasetre bhạgiyạdarpe hoyakante ạḍipe bhage akada.

¹⁵ E Philipi manḍerren hoṛko, ape hõpe baḍaegea, bhage sombat lại jạhir reakʼ etohopʼre Makedoniạ khoniń oḍok calaolenre, ape eskar chaḍakate oka manḍerrenko hõ emokʼ ar hatao babotre iń tulucʼ bako bhạgiạrilena.

¹⁶ Ar Thessalonikiạreń tahẽkanre hõ ape do mitʼ bar dhaope goṛowạdiń tahẽkante ińakʼ reṅgecʼpe purunletʼtińạ.

¹⁷ Jãhãn daniń khojokʼ kana ona do baṅ, menkhan nonkan jogeń asokʼ kana one oka do ape ńutumte doho jarwa idikʼ.

¹⁸ Ińakʼ jotogeń ńam caba akada. Ar ińakʼ oka jạruṛ ona khon hõ bạ̃ṛti menakʼtińạ. Ephaphroditus tite apeakʼ daniń ńamketʼte ińakʼ do ḍher hoyakantińạ. Noa danko do mońj so reakʼ mahkaokʼ ar samaṅokʼakʼge,

¹⁹ ar noate Isor doe kusikʼkana. Ińren Isor do acʼakʼ ṭhonokte perecʼ dhon lekate Mạsi Jisu hotete apeakʼ joto ṭonṭakoe cabaetapea.

²⁰ Aboren Baba ar Isorakʼge ṭhonok hoyokʼtae ma jug cetan jug hạbicʼ. Amen.

Mucạtʼ katha

²¹ Mạsi Jisu tulucʼ jopoṛao menakʼko Isorren mimitʼ hoṛ ińakʼ johar emakope. Iń soṅgere okoe boehako menakʼko onko hõ apeko joharape kana.

²² Isorren sanam hoṛko okoe do nonḍe menakʼko, asokaete Kạisạr oṛakʼren hoṛko do apeko joharape kana.

²³ Probhu Jisu Mạsiyakʼ daya apeakʼ ontorre baṛe tahenma.