Philipiko lạgitʼ Pạul apostolakʼ ciṭhi 2 - সান্তালী বাইবেল

Biswạsikoakʼ mạ̃hirtetʼ

¹ Enḍekhan Mạsi tulucʼpe kolom mitʼakan iạte uskur mon ńamokʼkan khan, ar Mạsiyakʼ dulạṛ iạte jiwire juḍạsi ńamokʼkan khan, sonot Jiu ar ape talare helmel menakʼ khan, apeakʼ ontorre mãyã ar daya menakʼ khan,

² enḍekhan nonkage ińakʼ rạskạ purạutińpe, ar ape sanamkoakʼ mon mitʼakae tahenma, ape mimitʼko dupulạṛpe ar mitʼ jiwi ar mitʼ monokʼpe.

³ Apnarakʼ porho lạgitʼ se michạ bạḍạite cetʼ hõ alope cekaya, bickom nindhạn monte eṭakʼko apnar khon soros mente bujhạukope.

⁴ Eken apnar eskar lạgitʼ do alo, bickom mimitʼ hoṛ etạkʼ hoṛko lạgitʼ hõ dạndikʼpe.

⁵ Jisu Mạsiyakʼ oka monsubạ tahẽkan apeakʼ ontorre hõ ona jemon tahen.

⁶ Ente uni do Isor reakʼ rupane tahẽkanre Isor barabari tahen do luṭjoṅakʼ bae metatʼa.

⁷ Bickom uni do golam reakʼ rupe hatawante manwa lekate janamkate acʼ doe khạliyena.

⁸ Ona chaḍa manwa rup hataokate gujukʼ hạbicʼ, metakʼme kurusre gujukʼ hạbicʼe bataoketʼte uni do nindhạngeye tahẽyena.

⁹ Ar onatege Isor do sanam khon cetanreye dohokedea ar nonkan mitʼṭecʼ ńutume emadea one ona do joto ńutum khon maraṅge,

¹⁰ jemon sermarenko, dhạrtirenko ar ot latarrenko tahenkan onko mitʼke mitʼkoakʼ gunṭhi do Jisu samaṅre ikhṛumokʼtako,

¹¹ ar mitʼke mitʼ alaṅko aṅgocma, Isor Babawakʼ ṭhonok lạgitʼ do Jisu Mạsigeye Probhu Isor kana mente.

Biswạsiko do jolokʼkan marsal leka

¹² E ińren dulạṛiạ boehako, ape do jaogepe batao ạguakatʼa. Ar eken sãoreń tahẽkan oktere do baṅ, menkhan biseskaete ńit bạnuńre hõ botor ar thar tharaokʼ salakʼ apeakʼ kạmiko talate udugpe, kại khon bańcaope ńamakada mente.

¹³ Isor do apeakʼ monre nonkae kạmikana one onate uniye kusikʼ onkan kạmi reakʼ monsubạ ar daṛe hecʼape.

¹⁴ Ape do begor karacʼ kurucʼ ar begor rapṭha rạpṭhite jotowakʼ kạmipe,

¹⁵ jemon bin dusạn ar khạṭipe hoydaṛeakʼ ar niạ peṛta piṛhiren bạṛicʼ hoṛko talare Isorren niphuṭ gidrạkope hoydaṛeakʼ.

¹⁶ Ape do onko hoṛko jion reakʼ kathape neakokante noa dhạrtire ipil lekape jolokʼkana. Onate Mạsiyakʼ dinreń sarhao daṛeakʼa je, ińakʼ kurumuṭu ar mehnot do baṅ ạuṛiyakʼ akana.

¹⁷ Oka biswạs reakʼ samaṅokʼakʼte Isorpe sewawaekan onare ińakʼ mãyãm do dãṛẽ mente coḍorlen khan hõń kusikokʼa ar ape tulucʼ iń rạskạkokʼa.

¹⁸ Onkage ape hõ iń tulucʼ kusi ar rạskạre seledokʼ lek kanape.

Timothi ar Epaphraditus

¹⁹ Asokʼ kạnạń, Probhu Jisuakʼ sana hoylen khan ạḍi usạrage ape ṭhen Timothiyiń kolea, jemon apeakʼ sombat ńamkate iń hõ monre uskuriń ńam.

²⁰ Iń sãote nonkan ar okoe hõ bạnukʼkoa, one okoe do Timothi leka ape lạgitʼ sạrigeko dạndikokʼkan.

²¹ Ente eṭakʼ sanamkoge Jisu Mạsi reakʼakʼko ńam baṅkate apnar reakʼakʼgeko ńam bakʼṛakana.

²² Menkhan apepe baḍaegea, Timothi do acʼakʼ pạtiạrtetʼe sạbud akada, ente cetʼleka gidrạ do apat tulucʼe kạmiyetʼkan onkage uni do iń tulucʼ Jisu Mạsi reaṅ bhage sombat porcar kạmireye khaṭao akana.

²³ Onate ińakʼ dosa cetʼ hoyokʼa mente baḍae torage uni kolkae iń asokʼkana.

²⁴ Probhu Isorre noa pạtiạu menakʼtińạ je, iń apnar hõ usạrategeń hijukʼa.

²⁵ Iń do Epaphraditus ape ṭhen kole lạgitʼ jạruṛiń bujhạukeda. Uni do ińren pạtiạricʼ boeha kanae. Ạliń do mitʼtege liń kạmikana ar Mạsi lạgitʼ liń lạṛhại kana. Ape do sapʼdapʼicʼ lekate ińakʼ jạruṛokʼakʼko meṭao lạgitʼ unige iń ṭhenpe kolledea.

²⁶ Uni do sanamkoe uihạretʼpe kanteń kol ruạṛedekana. Ona chaḍa uniye ruạ kạhillen reakʼ kathape ańjomletʼ iạte uni do ạḍiye andesale akan tahẽkana.

²⁷ Sạrige uni do gujukʼ dạkhilgeye ruạ kạhillena, menkhan Isor do uniye mãyã akawadea ar eken uni eskargeye daya akawadea ona do baṅ, uni do iń hõe daya akawạdińa jemon duk cetan duk aloń ńam.

²⁸ Onate ạḍi jidkateń kolekana jemon unipe ńel ruạṛte arhõpe rạskạkʼ ar iń hõ aloń mon dukokʼ.

²⁹ Ona iạte Probhu Isorren hoṛ lekate ạḍi rạskạ salakʼ ataṅ daramepe, ar nonkan hoṛ do manotkope.

³⁰ Mạsiyakʼ kạmi lạgitʼ uni do gujukʼ dạkhile hoylena. Ar hạjir bape tahẽkante iń lạgitʼ oka bape ceka daṛeakatʼ tahẽkan ona lạgitʼ uni do acʼakʼ jiwi sudhạ emokʼ hõ rạjigeye tahẽkana.