Philipiko lạgitʼ Pạul apostolakʼ ciṭhi 1 - সান্তালী বাইবেল

¹ Timothi ar iń Pạul do Jisu Mạsiren golam kanaliń. Ạliń do Jisu Mạsi tulucʼ kolom mitʼ akan Isorren okoeko hoṛ do Philipi nagrahare menakʼko onkoren gupiko ar sapʼdapʼko ṭhenliń oleda.

² Aboren Isor Baba ar Probhu Jisu Mạsi do daya ar suluke dan apema.

Philipiko lạgitʼ koejoṅ

³ Iń do tinạkʼ dhao apeakʼ kathań disại unạkʼ dhaoge ińren Isoriń sarhao edekana.

⁴ Ape lạgitʼ iń koejoṅre jao ghuṛi rạskạ salakʼ iń koejoṅ kana,

⁵ ente Jisu Mạsi reaṅ bhage sombat porcar kạmire ape do etohopʼ khon ńit hạbicʼpe goṛo ạguwạń kana.

⁶ Noa pạtiạu menakʼtińạ, apeakʼ ontorre okoe bhage kạmiye ehopʼakatʼ uni do Mạsi Jisuakʼ hijukʼ din hạbicʼ onae calao iditeye mucạda.

⁷ Ape sanamko lạgitʼ ińakʼ monejoṅakʼ do nonka leka hoyokʼge lek kana, ente ape do ińren dulạṛiạko kanape. Iń do hajotreń tahen se bhage sombatreń roṛ dogokʼre hõ ona reakʼ sạritetʼ iń gohayeda, ar onate ape sanamko iń tulucʼ Isorakʼ dayaren bhạgiyạdarkope hoyokʼ kana.

⁸ Mạsi Jisuakʼ mãyã monte ape tinạkʼ iń dulạṛetʼpe ona reakʼ goha do Isorge.

⁹ Iń do noageń koejoṅ kana apeakʼ dulạṛ do jemon ạkil ar bud salakʼ hara idikʼtape.

^10-11 Enḍekhan okaṭakʼ do joto khon sạri bhageakʼkan ona bujhạukatepe bachao daṛeakʼ. Noate ape do Mạsi Jisu hotete dhorom reakʼ jotepe perejokʼte Mạsiyakʼ hijukʼ din hạbicʼ khạṭi ar bin daganpe tahẽdaṛeakʼa, ar onate Isorakʼ do ṭhonok ar sarhao hoyokʼtaea.

Jion do Mạsige

¹² E boehako, ińakʼ monejoṅakʼ do ape jemonpe baḍae daṛeakʼ, ińre oka hoyakan ona khạtirte bhage sombat porcar reakʼ kạmiko do arhõ laha idikʼkana.

¹³ Onate nonḍe raj dolanren palṭonko ar eṭakʼ sanamkoko baḍae daṛeada je, Mạsi iạte iń do hajotre minạńa.

¹⁴ Ona chaḍa noa hajotre minạń khạtirte ḍher boehakoge Probhu Isorre arhõ bạ̃ṛti ṭehãḍokʼko cetʼakada ar onate onko do begor botorokʼte Isorakʼ katha porcar lạgitʼ arhõ dilanko hoyakana.

¹⁵ Onko modre adomko do hiskạ ar dola doli monte Mạsi reaṅko porcareda, menkhan eṭakʼko do bhage monsubạtegeko kạmikana.

¹⁶ Noko hoṛkoakʼ monre dulạṛ menakʼte Mạsi reaṅko porcareda, ente onkoko baḍaea, bhage sombat reakʼ katha lạlại lạgitʼge iń doń bachao ocoakana.

¹⁷ Menkhan onko pạhil dolren hoṛko do akoakʼ sartho lạgitʼ Mạsi reaṅko porcareda, jãhãn bhage monsubạ iạte do baṅ. Onko doko monejoṅ kana, ińakʼ bondi dosare onko do jemon dukko emdaṛeạń.

¹⁸ Menkhan onate do cetʼ cekakʼa? Asol katha do hoyokʼ kana, jãhã baṅ jãhãlekatege Mạsi reaṅ porcarokʼ kan baṅ do eṛeakʼ lạgitʼ ar baṅ do sạriyakʼ lạgitʼ; onatege ińakʼ rạskạ do. Ar ińakʼ noa rạskạ do tisge baṅ mucạdokʼa,

¹⁹ ente ińiń baḍaea, iń cetanre oka hoyakan ona reakʼ mucạtʼ jo do hoyokʼ kana bańcaokʼ; ar ona do apeakʼ koejoṅ hotete ar Jisu Mạsiren Jiu hotetege hoyokʼa.

²⁰ Ińakʼ purạ biswạs menakʼtińạ je, okaṭakʼte hõ iń do bạń lajao ocokʼa, bickom dil menakʼtińạ, cetʼleka lahate iń hotete Mạsiyakʼ ṭhonok sodorokʼkan tahẽkan onkage ńitokʼ hõ hoyokʼa baṅ doń gujukʼ ar baṅ doń jiwedokʼ;

²¹ ente iń lạgitʼ jion do hoyokʼ kana Mạsige ar moron do porhotetʼ.

²² Menkhan jiwetʼgeń tahen khan enḍekhan ona do nonkan mitʼṭecʼ kạmi reakʼ ạte imạńa jemon bhage jo hoyokʼtiń. Ar okaṭakʼ iń bachao joṅa ona do bạń baḍaea.

²³ Banarge iń doe oreń kana. Iń do gujukʼte Mạsi tulucʼ tahen sanań kana, ente ona do artetʼge bhagea.

²⁴ Enhõ ape lạgitʼ bańcao tahen do arhõ bạ̃ṛti jạruṛtińa.

²⁵ Khạṭigeń baḍaea iń do jiwetʼ iń tahena ar ape sanamko sãotegeń tahena, jemon apeakʼ biswạs harakʼtape ar onatepe rạskạkʼ.

²⁶ Onate ape talare arhõń hijukʼte ape do Mạsi Jisu hotete iń khạtirte rạskạtepe perejokʼa.

²⁷ Joto khon maraṅ katha do hoyokʼ kana, ape do nonka leka jion khemaope one okaṭakʼte Mạsi reaṅ bhage sombat reakʼ lek kan. Enḍekhan iń apnarte hecʼkateń ńelpe se sạṅgiń khon apeakʼ kathań ańjom, ar iń baḍae baṅma, ape do mitʼ Jiurepe teṅgo ṭak akana mente ar bhage sombat hotete okaṭakʼ biswạs hijukʼkan ona lạgitʼ mitʼtepe khaṭaokʼ kana.

²⁸ Okoe ape upạrte menakʼko onkoakʼ okaṭakʼtege ape do alope botorokʼa. Ar noatege sạbudokʼa, onko do nosṭokʼ secʼko calakʼ kana ar ape do bańcao secʼ; ar noa bańcao do Isor ṭhen khonge hijukʼkana.

²⁹ Ape do eken Mạsirepe biswạs akante dayape ńam akada ona do baṅ, menkhan ona lạgitʼ duk jojom reakʼ daya hõpe em ocoakana.

³⁰ Cetʼleka haron kosṭo sahaope ńel akadiń ar ńitokʼ hõ ona reaṅ okape ańjometʼkan, ape hõ inạ mitʼ lekan haron kosṭoregepe jopoṛao akana.