Proverbs 9 - ბიბლია

¹ სიბრძნემ სახლი აიშენა და გათალა მისი შვიდი ბოძი,

² დაკლა სამსხვერპლო, ღვინო გააზავა და ტაბლა გაამზადა.

³ დაგზავნა თავისი მხევლები, ქალაქის მაღლობებიდან იძახის:

⁴ „უგუნურებო, აქეთ შემოუხვიეთ!“ ბრიყვებს ეუბნება:

⁵ „მოდით, ჭამეთ პური და სვით ღვინო, ჩემი შეზავებული.

⁶ დატოვეთ უგუნურება და იცოცხლებთ, და იარეთ გონიერების გზით.“

⁷ ღთისმგმობის დამრიგებელს დამცირება არ ასცდება, უკეთურის მამხილებელს – შეურაცხყოფა.

⁸ ნუ ამხილებ ურჯულოს, რათა არ შეგიძულოს; ამხილე ბრძენი და შეგიყვარებს.

⁹ დაარიგე ბრძენი და უფრო დაბრძენდება, ასწავლე მართალს და ცოდნას გაიმრავლებს.

¹⁰ სიბრძნის დასაბამია შიში უფლისა, სიწმიდის შეცნობა – გონიერება.

¹¹ რადგან ჩემით გამრავლდება შენი დღეები და სიცოცხლის წლები შეგემატება.

¹² თუ ბრძენი ხარ, შენთვის ხარ ბრძენი, და თუ ღვთისმგმობი ხარ, შენვე აგებ პასუხს.

¹³ სულელი ქალი ლაქლაქაა, უზრდელია და უვიცი.

¹⁴ ჯდება თავისი სახლის ზღურბლთან, სკამზე ან ქალაქის მაღლობებზე,

¹⁵ რათა დაუძახოს გამვლელთ, თავიანთი გზით სწორად მავალთ:

¹⁶ „ბრიყვებო, აქეთ გადმოუხვიეთ!“ უგუნურს კი ეუბნება:

¹⁷ „მოპარული წყალი ტკბილია და ჩუმად შეჭმული პური – გემრიელი.“

¹⁸ მათ არ იციან, რომ ის მათ მკვდართა აჩრდილებთან ეპატიჟება, რომ მისისტუმრები – შავეთის უფსკრულებში იმყოფებიან.