Proverbs 31 - ბიბლია

¹ სიტყვანი მეფე ლემუელისა, მისნისა, რომლებსაც ასწავლიდა დედამისი:

² რაო, ჩემო შვილო, რაო, შვილო ჩემი მუცლისა? რაო, შვილო ჩემი აღთქმებისა?

³ ნუ შეალევ ქალებს შენს ძალას და შენს გზებს – მეფეთა დამღუპველ დიაცებს!

⁴ მეფეებს არ შეჰფერით, ლემუელ, მეფეებს არ შეჰფერით ღვინის სმა, და არც მთავრებს – თაფლუჭზე მიძალება,

⁵ თორემ დალევენ და დაივიწყებენ კანონებს, გაამრუდებენ ჩაგრულთა სამართალს.

⁶ მიეცით ძლიერი სასმელი მომაკვდავს და ღვინო – გამწარებულს.

⁷ დალიოს და დაივიწყოს თვისი სიღარიბე და თავისი სატანჯველი აღარ გაიხსენოს.

⁸ გახსენი პირი მუნჯებისთვის, ყველა მიტოვებულისთვის სამართლის გასაჩენად.

⁹ გახსენი პირი, განსაჯე სამართლიანად და დაიცავი ღარიბ-ღატაკთა უფლებები.

¹⁰ ვინ იპოვის გამრჯე ცოლს? ობოლ მარგალიტზე ძვირია მისი ფასი.

¹¹ ენდობა მას მისი ქმრის გული და არ მოაკლდება შემოსავალი.

¹² ის მთელი სიცოცხლე სიკეთეს მიაგებს ქმარს და არა ვნებას.

¹³ მატყლს და სელს მოიპოვებს და ბეჯითად მუშაობს საკუთარი ხელით.

¹⁴ სავაჭრო ხომალდივით არის იგი – შორიდან ეზიდება საზრდოს.

¹⁵ გათენებამდე დგება და საკვებს უმზადებს ოჯახს და საქმეს უნაწილებს მხევალთ.

¹⁶ შეარჩევს მიწას და შეიძენს, თავისი ხელით აშენებს ვენახს.

¹⁷ ძალას შემოირტყამს წელზე და მკლავს გაიმაგრებს.

¹⁸ ხედავს თავისი შრომის ნაყოფს და ღამით არ ქრება მისი სანთელი.

¹⁹ ჯარას აბრუნებს და თითისტარს ატრიალებს.

²⁰ გლახაკთან ხელგაშლილია და მკლავს აშველებს დავრდომილს.

²¹ არ აშინებს ყინვა, რადგან მთელი ოჯახი თბილად ჰყავს შემოსილი.

²² ფარდაგებს იკერავს და სელითა და ძოწეულით იმოსება.

²³ მისი ქმარი ცნობილია კარიბჭესთან და ქვეყნის უხუცესებს შორის ზის.

²⁴ სელის სამოსს კერავს და ყიდის; სარტყლებს ვაჭრებს ატანს გასაყიდად.

²⁵ ძალით და ღირსებით არის მოსილი და ხვალინდელ დღეს ღიმილით ხვდება.

²⁶ პირს სიბრძნით ხსნის და მადლიან დარიგებებს წარმოსთქვამს მისი ენა.

²⁷ კარგად უძღვება საოჯახო საქმეებს და მუქთა პურს არ ჭამს.

²⁸ დგებიან მისი შვილები და ლოცავენ დედას; ქმარიც დგება და აქებს მას:

²⁹ „მრავალი ქალი მოქცეულა სანაქებოდ, მაგრამ შენ ყველას გადააჭარბე!“

³⁰ მაცდურია მშვენიერება და ამაოა სილამაზე, უფლის მოშიში ქალი კი ქებულია.

³¹ მიაგეთ მას მისი გარჯის ნაყოფი და მისი საქმეები განადიდებენ მას კარიბჭეებთან.