Proverbs 18 - ბიბლია

¹ თავკერძა კაცი თავის სურვილებს მიჰყვება, ყოველ საღ აზრს ეწინააღმდეგება.

² ბრიყვი გაგებას არ ცდილობს, არამედ მხოლოდ თავისი აზრების გამოხატვა უნდა.

³ უკეთურებას გაკიცხვა მოჰყვება, და უღირსობას – შერცხვენა.

⁴ კაცის სიტყვები ღრმა მორევია; სიბრძნის წყარო კი – მორაკრაკე ნაკადული.

⁵ არ არის კარგი უკეთური კაცისადმი მიკერძოება და არც მართლის გამტყუნება სამსჯავროზე.

⁶ ბრიყვის ენა შუღლს იწვევს, მისი ბაგენი – აყალ-მაყალს.

⁷ ბრიყვის ენა მისი დაღუპვაა, და მისი ბაგე – მისი სულის მახე.

⁸ ჭორიკანას სიტყვები ნუგბარივითაა და მუცლამდე აღწევს.

⁹ გულარხეინი საქმეში დამანგრეველის ძმაა.

¹⁰ უფლის სახელი – ძლიერი გოდოლია, მართალი შეაფარებს თავს და – სამშვიდობოზეა.

¹¹ მდიდრის ქონება მისი ძლიერი ქალაქია, მაღალი დამცველი კედელივითაა.

¹² ქედმაღლობა წინ უსწრებს დამხობას, მორჩილება კი წინ უძღვის დიდებას.

¹³ ვინც კითხვის დამთავრებას არ უცდის და ისე იძლევა პასუხს, სულელია და თავს ირცხვენს.

¹⁴ კაცის სული უძლებს სენს, მაგრამ სულის შემუსვრას ვინ გადაიტანს?

¹⁵ გონიერის გული ცოდნას იძენს, და ბრძენთა ყური ცოდნას ეძიებს.

¹⁶ ძღვენი კაცს გზას უფართოებს და დიდკაცთა წინაშე მიჰყავს.

¹⁷ პირველი მოდავე მართალი ჩანს სარჩელში, მაგრამ მოდის მისი მოსარჩლე და ყველაფერი იცვლება.

¹⁸ წილისყრა ბოლოს უღებს დავას და ძლიერ მეტოქეებს არიგებს.

¹⁹ შეურაცხყოფილი ძმა გამაგრებულ ქალაქზე მიუდგომელია, და ასეთი მოდავე ციხე-სიმაგრის ურდულივითაა ჩაკეტილი.

²⁰ კაცი თავისი სიტყვების ნაყოფით ივსებს სტომაქს, თავის ბაგეთა მოსავლით ძღება.

²¹ სიკვდილ-სიცოცხლე ენის ხელშია, და ლაპარაკის მოყვარულნი იგემებენ მის ნაყოფს.

²² ვინც კარგი ცოლი ჰპოვა, მან სიკეთე ჰპოვა და უფლის მადლი მოიხვეჭა.

²³ ღარიბი ვედრებით ლაპარაკობს, მდიდარი კი უკმეხად პასუხობს.

²⁴ ზოგი მეგობრის მეგობრობა თვალთმაქცობაა, ზოგი მეგობარი კი ძმაზე ძვირფასია.