Proverbs 17 - ბიბლია

¹ ერთი ლუკმა ხმელი პური და სიმშვიდე სჯობს საკლავით სავსე სახლს, სადაც უთანხმოებაა.

² გონიერი მსახური იბატონებს ბატონის შემარცხვენელ შვილზე, და წილს დაიდებს მემკვიდრებს შორის როგორც ერთი ძმათაგანი.

³ ოქრო და ვერცხლი ბრძმედში გამოიწრთობა, გულებს კი უფალი გამოსცდის.

⁴ ბოროტმოქმედი ურჯულოთა ბაგეებს უგდებს ყურს, და ცრუ – უხამს ენას.

⁵ ვინც ღარიბს აბუჩად იგდებს, თავის გამჩენს გმობს. მოძმის უბედურებით მოხარულს სასჯელი არ ასცდება.

⁶ შვილთა შვილები მოხუცთა გვირგვინია; შვილთა დიდება – მათი მშობლებია.

⁷ უგუნურს არ უხდება რჩეული სიტყვები, კიდევ უფრო ნაკლებად ესადაგება კეთილშობილს ყალბი მეტყველება.

⁸ ქრთამი ჯოჯოხეთის გამნათებელი ჰგონია მის გამღებს: საითაც მიმართავს, წარმატების იმედი აქვს.

⁹ ვინც წყენას ივიწყებს, ის მეგობრობას განამტკიცებს, ხოლო ვინც წყენას აღრმავებს, მეგობრებს კარგავს.

¹⁰ საყვედური გონიერზე უფრო ღრმად მოქმედებს, ვიდრე ბრიყვზე ასი დარტყმა.

¹¹ ბოროტი მხოლოდ შფოთს დაეძებს, მაგრამ სასტიკი ანგელოზი გაიგზავნება მის წინააღმდეგ.

¹² სჯობს ბელდაკარგული დათვი გადაეყაროს კაცს, ვიდრე სისულელეში გახლართული ბრიყვი.

¹³ ბოროტება არ მოშორდება მის სახლს, ვინც სიკეთეს ბოროტებით იხდის.

¹⁴ დავის დასაწყისი წყლის გადმოხეთქვას ჰგავს; შეწყვიტე დავა, ვიდრე გაჩაღდება.

¹⁵ უკეთურის გამამართლებელი და მართლის გამამტყუნებელი – ორივე საძაგელია უფლის წინაშე.

¹⁶ რად უნდა ქონება ბრიყვს – სიბრძნის შესაძენად? მას ხომ მის შესათვისებლად გონება არ ერჩის!

¹⁷ მეგობარს ყოველთვის უყვარხარ და ძმა გასაჭირისთვის არის შობილი.

¹⁸ უჭკუო კაცი თავდებად უდგება მოყვასს.

¹⁹ ვისაც ჩხუბი უყვარს, ცოდვა უყვარს, ვინც მაღლა სწევს კარს, დაღუპვას ეძებს.

²⁰ ბოროტი გული სიკეთეს ვერ ჰპოვებს და ენამრუდი უბედურებაში ჩავარდება.

²¹ ბრიყვი შვილი მშობლის დარდია, სულელის მამა ვერ გაიხარებს.

²² მხიარული გული აჯანმრთელებს, დავრდომილი სული კი ძვლებს ფიტავს.

²³ უკეთური ქრთამს უბიდან იღებს, რათა სიმართლის გზები გაამრუდოს.

²⁴ გონიერი სიბრძნეს შეჰყურებს, ბრიყვი კი თვალებს ქვეყნის კიდემდე აცეცებს.

²⁵ ბრიყვი შვილი მამის დარდია და დედის მწუხარება.

²⁶ არ არის კარგი მართალის დასჯა და კეთილშობილთა ცემა სიმართლისთვის.

²⁷ სიტყვაძუნწი კაცი გონიერია, და თავშეკავებული – გაგების უნარის მქონე.

²⁸ მდუმარე სულელიც ბრძნად მოგეჩვენება, ენის მომთოკველი კი – გონიერად.