Proverbs 12 - ბიბლია

¹ ვისაც წვრთნა უყვარს, ცოდნაც უყვარს, უგუნურს კი სძულს მხილება.

² კეთილი უფლის მადლს მოიხვეჭს; ავის განმზრახველს კი შეაჩვენებს ის.

³ უკეთურებით ადამიანი ვერ დაფუძნდება, მართალთა ფესვი კი შეურყეველია.

⁴ ღირსეული ქალი ქმრის გვირგვინია, შემარცხვენელი კი ხრწნაა მის ძვლებში.

⁵ მართალთა ფიქრები სამართლისკენაა, უკეთურთა ზრახვანი კი ვერაგობისკენ.

⁶ უკეთურთა სიტყვები ბოროტი მახეა, მართალთ კი მათი პირი იხსნის.

⁷ დაემხობიან უკეთურნი და აღარ იქნებიან; მართალთა სახლი კი იდგება.

⁸ გონიერებისათვის აქებენ კაცს, გულმრუდი კი სძაგს ხალხს.

⁹ ათვალწუნებული, მაგრამ მსახურიანი კაცი ჯობს თავმომწონეს, მაგრამ ულუკმაპუროს.

¹⁰ მართალს პირუტყვიც ებრალება; უკეთურთა გული კი სასტიკია.

¹¹ ვინც თავისას ხნავს და თესავს, არ დაიმშევა; უაზრო მიზნების მადევარი კი უგუნურია.

¹² უკეთურის წადილია უკეთური ნადავლი; მართალთა ფესვი კი ნაყოფს გამოიღებს.

¹³ ბოროტეულს თავისი ბაგენი უგებენ მახეს; მართალი კი გასაჭირს დააღწევს თავს.

¹⁴ თავის ბაგეთა ნაყოფი კაცს სიკეთით გააძღობს, და ხელით გარჯა აუნაზღაურდება მას.

¹⁵ ბრიყვს თავისი გზა სწორი ჰგონია, ბრძენი კი რჩევას უსმენს.

¹⁶ ბრიყვი გაბრაზებას ვერ მალავს, გონიერი კი ფარავს წყენას.

¹⁷ პატიოსანი კაცის სიტყვა სიმართლეა სამსჯავროში; ცრუმოწმის სიტყვა კი ცბიერებაა.

¹⁸ ზოგი ფუჭსიტყვა ისე ლაპარაკობს, თითქოს მახვილით გჩხვლეტდეს; ბრძენთა ენა კი კურნებაა.

¹⁹ მართალი ბაგეები მარად რჩება, ცრუ ენა კი წამიერია.

²⁰ ცბიერებაა ავკაცთა გულში, მშვიდობისმყოფელთ კი სიხარული აქვთ.

²¹ ზიანი არ მოუვა მართალს, უკეთურთ კი უბედურება ავსებთ.

²² ცრუ ბაგენი სძულს უფალს, ერთგული კი სასურველია მისთვის.

²³ გონიერი ადამიანი ფარავს ცოდნას, უგუნური გონება კი სისულელეებს მოჰფენს ქვეყანას.

²⁴ ბეჯითი ხელი იბატონებს; ზარმაცს კი ბეგარა დაედება.

²⁵ დარდი გულს ამძიმებს, კეთილი სიტყვა კი ახარებს მას.

²⁶ მართალი მოყვასის გზის მანათობელია, უკეთურთა გზა კი მაცდუნებელია.

²⁷ ზარმაცი სარგებელს ვერ ნახავს, ბეჯითი კი გამდიდრდება.

²⁸ სიმართლის გზაზე სიცოცხლეა და ამ ბილიკებზე არ არის სიკვდილი.