Danieli 4 - EBBAIBBO EMBOOSI YA NASAAE

Esilooto sya Nebukadineesa syohubiri

¹ Chino nicho emboosi chi mutuki Nebukadineesa yatumira abaandu b'oluyia lwoosi, abomu byaalo byoosi, neende ab'enimi choosi, abali mu syaalo syoosi, n'aboola ati: “Omuleembe kwemeede ohusalaana mweeng'we.

² Mbweene endi silai nisyo ohubeekesa obulolero neende eby'amayia bi Nasaae w'Aakulu Muno bi yaaholera.”

³ Obulolero bwae buhoongo, eby'amayia bae by'amaani! Obwaami bwae bw'endaalo choosi, haandi obutuki bwae haba sibwohwakama daawe.

⁴ “Ese, Nebukadineesa, ndali nindewuluuhira mu nyuumba yaange, ni ndi mu muleembe mu dooho lyaange.

⁵ Mani ndoota esilooto syandiisa muno. Neende ebyo byoosi ebyeecha mu bibaaso byaange, neende ebyo ebyambonehera, byandeeyendeheresa muno.”

⁶ Mani sakira ndatusa elako endi abakeraki b'amakesi bomu Bbabbilooni boosi beeche mani baamboolere amahuluundu k'esilooto esyo.

⁷ Mani abalakusi, neende ab'amayia, neende Abakalidaaya, neende abahiingi, neende abasomera eby'eng'iniing'ini nibeecha, mani nimbaboolera esilooto syaange. Nae abulao owanyala ohumboolera amahuluundu k'esilooto esyo.

⁸ Nae luunyuma, Danieli niyeecha mu moni waange. Danieli oyo, yali niyakulihwa eliita liindi mbwe, Bbelitesaasa, koti lu nasaae waange yali n'alaangwa, haandi yalimo omusaambwa kwa banasaae boolerefu. Mani nimuboolera esilooto si ndaloota, nimboola endi:

⁹ “Ewe Bbelitesaasa, omuhuluundu b'abalakusi, manyire endi olimo omusaambwa kwa banasaae boolerefu, haandi sibulao esy'engiso sihuhaya ohumanya.” Bulaanu mboolere esilooto syaange; haandi wumboolere amahuluundu kasyo.

¹⁰ “Ebyambonehera nindali nindeyaliise hu sitaanda byali biti; ndatingaala, mani niimbona omusaala nikuli akatikaati w'esyaalo; omusaala okwo kwali omuleeyi muno.”

¹¹ Mani omusaala okwo nikuhula nikuba okw'amaani, mani nikuleeya nikwoola aakulu hu bireesi, mani kwali nikubonehana hu syaalo syoosi.

¹² Amasaafu kakwo kali amalai muno, haandi ebyaamo byakwo byali ebiingi muno, ebinyala ohuliisa esyaalo syoosi. Ebisolo byomu siino byeyikamaanga mu siiniha syakwo, haandi amayoni nikoombaha ebiyu byako mu masaga kakwo. Haandi buli siindu silamu syoosi esiri neende omubiri byalichaanga hu musaala okwo.

¹³ Ebyambonehera nindeyaliise mu sitaanda syaange, nimwo mundaboneherwa wamwaanda mwoolerefu, niyeeha n'atula muukulu.

¹⁴ Yalomalomera mu kono ly'aakulu n'aboola ati: “Temao omusaala okwo, obaanjuleho amasaga kakwo, ohuuhumuleho amasaafu kakwo mani osalaanie ebyaamo byakwo. Yirusa ebisolo bitule aasi wakwo, neende amayoni katule mu masaga kakwo.

¹⁵ Nae leha esisina neende emisi chakwo mu loba, nisiboyereho esichuma neende esihomo ohusyebodoohaniaho, mu muboka. Mani leha olume lutula mu kulu ludose omuundu oyo. Leha amenyeenge alala neende ebisolo byomu siino.

¹⁶ Leha omuundu oyo amalwehwo ebibaaso by'omuundu, mani abereswe ebibaaso by'ebisolo, ohumala embaka y'emyaaka kitaanu-na-kibiri.

¹⁷ Elyo nilyo elako li bawamwaanda boolerefu bataao, haandi esyo nisyo esiindu sibaheengao. Mani lehe abaandu boosi buli abuundu bamanye bati, Oyo ow'Aakulu Muno niye otuka obwaami bw'abaandu, haandi niye obuberesa oyo yeesi ohiramo ohuba omuloonga.”

¹⁸ “Sino nisyo esilooto si ese omutuki Nebukadineesa ndaloota. Mani ewe, Bbelitesaasa, mboolere amahuluundu kasyo, olwohuba abakeraki b'amakesi bomu bwaami bwaange boosi, bibahaire ohumboolera amahuluundu kasyo, nae ewe onyala, olwohuba mwooyo wa banasaae boolerefu ohulimo.”

Danieli atuumbula amahuluundu k'esilooto

¹⁹ Mani Danieli, eliita lyae liindi olaangwa ati, Bbelitesaasa, yamala embaka hooho niyeyendehereere, n'abula esy'ohuboola. Mani omutuki n'amuboolera ati: “Bbelitesaasa, esilooto neende amahuluundu kasyo, leha bihaye ohuhweyendeheresa daawe.” Bbelitesaasa mani n'akobolamo ati: “Omwaami waange, leha esilooto esyo sibe esy'abaandu batahudaha, haandi amahuluundu kasyo kabe ak'abasuku bao.”

²⁰ Omusaala ku obweene, okuhulire mani kaaba okw'amaani, omuleeyi ohwoola aakulu hu bireesi, haandi okwali nikobonehanira hu syaalo syoosi,

²¹ haandi amasaafu kakwo kali amalai muno, neende ebyaamo byakwo byali ebiingi muno, ebinyala ohuliisa esyaalo syoosi. Ebisolo byoomu siino byeyikamaanga mu siniha syakwo, haandi amayoni nikoombahaanga ebiyu byako mu masaga kakwo.

²² Omusaala okwo nikwo ewe omutuki. Ohulire mani nooba ow'amaani; oluyaali lwao lwemeedere mani nilwoola hu kulu, haandi obwaami bwao nibusalaana hu syaalo syoosi.

²³ Nae koti omutuki lu wabona wamwaanda mwoolerefu mweene, niyeeha aasi n'atula muukulu mani n'aboola ati, “Temao omusaala mani okusihirise, nae oleheo esisina neende emisi chakwo mu loba, n'oboyereho esichuma neende esihomo ohusyebodoohania, mu muboka; mani olehe olume lutula muukulu ludose omuundu oyo; haandi leha amenyeenge neende ebisolo byoomu siino, ohumala embaka y'emyaaka kitaanu-na-kibiri.”

²⁴ “Ewe omutuki, amahuluundu niko ako. Sino nisyo si Oyo ow'Aakulu Muno, si alagiire ati sihuhwooleho, ewe omutuki, omwaami waange.

²⁵ Ochia ohwiiruswa otule mu baandu, mani ochia ohumenyaanga alala neende ebisolo byomu siino; ochia ohulichaanga obunyaasi koti endaawu, haandi ochia ohudoswaanga neende olume lutula muukulu, ohumala embaka y'emyaaka kitaanu-na-kibiri. Ohwoola lu wahamanye oti Oyo ow'Aakulu Muno niye otuka obwaami bw'abaandu, haandi niye obuberesa oyo yeesi yaaba naadaha.

²⁶ Haandi koti lu ahulagiire ohulehao esisina neende emisi ch'omusaala okwo, obwaami bwao buchia ohuhukoboserwa, niwahamale ohumanya oti Ekulu nilyo elituka.

²⁷ Mani sakira, ewe omutuki, fukiirira ohukeraka hwaange; mu bweyaango bw'ebyonoono bi obeere n'ohola, hola ebiluungifu, yakama ebyonoono byao mani wekese esisa eyiri abo abafwiinyirirwa, mani awuundi onyala ohumeeda ohuba obulai.”

²⁸ Mani bino byoosi byakwa hu Mutuki Nebukadineesa.

²⁹ Emyoosi ehumi neende chibiri nichabitao, omutuki yali n'akeenda hu sirama sy'edooho lyae lya Bbabbilooni,

³⁰ mani n'aboola ati: “Bona koti Bbabbilooni siri esihoongo, si ndoombaha neende amaani kaange, neende obunyala bwaange, haandi neende oluyaali lw'obuhuluundu bwaange, ohuba edooho ly'obutuki bwaange.”

³¹ Omutuki niyali n'asilomalomaanga, mani ekono nilitula muukulu niliboola liti: “Ewe omutuki Nebukadineesa, tekeeresa bi huboolera: Obutuki buhutusirweho,

³² mani ochia ohwiiruswa otuswe mu baandu, mani ochia ohumenyaanga neende ebisolo byomu siino; haandi ochia ohulichaanga obunyaasi koti endaawu, ohumala embaka y'emyaaka kitaanu-na-kibiri, ohwoola lu wahamanye oti Oyo ow'Aakulu Muno niye otuka obwaami bw'abaandu haandi abuberesa oyo yeesi yaadaha.”

³³ Hu siha syeene esyo, ni emboosi echo choolerera abweene hu Nebukadineesa. Yeeruswa ohutula mu baandu, mani yaaya obunyaasi koti eng'oombe ndaawu, haandi omubiri nikudoswa neende olume ohutula muukulu ohwoola lu bwooya bwae bwahula bwaaba koti amooya k'eeswi, haandi amadete kae nikaleeya koti ak'eyoni.

Nebukadineesa afumia Nasaae

³⁴ Ebiha ebyo nibyawa, ese Nebukadineesa, nitingaala aakulu, mani amakesi nikaangobolamo, mani ndeebasa Oyo ow'Aakulu Muno, mani niimufumia haandi nimwiisamo oluyaali, Oyo Oyiindira endaalo choosi; olwohuba obutuki bwae, butuki bw'endaalo choosi, haandi obwaami bwae, buyiindira endaalo choosi;

³⁵ Abaandu bohu syaalo boosi, ababona koti abataaliwo daawe. Haandi ohola koti lu adaha mu eye lyo muukulu neende mu baandu bohu syaalo. Haandi abulao onyala ohukayira oba ohumuteeba ati, “Ohola siina

³⁶ Ebiha byeene ebyo, ni amakesi kaangobolamo; neende oluyaali lwaange lw'obutuki, neende obuhuluundu, neende efuma yaange, nibiingobolera”. Ababeresi b'amakesi baange, neende abaami baange nibaangoonya, nibaangobosao hu bwaami bwaange, mani obuhunuufu bwaange nibwemeedaho muno ohuhiraho koti lu bwali hale.

³⁷ Bulaanu ese, Nebukadineesa, fumia haandi nginia haandi njisa oluyaali mu Omwaami w'ekulu. Olwohuba buli sy'ahola siluungifu haandi syadyeeri; haandi aloongoyasa buli muundu yehuduumbasa.