Danieli 2 - EBBAIBBO EMBOOSI YA NASAAE

Esilooto sya Nebukadineesa

¹ Mu mwaaka kwohubiri okw'obutuki bwae, Nebukadineesa naloota ebilooto; niyeyendeherera muno mu mwooyo, mani endoolo nichihaya ohumuyira.

² Ao omutuki Nebukadineesa n'atuma balaange abalakusi bae, ab'amayia bae, neende abahiingi bae neende Abakalidaaya, ohumutuumbulira esilooto syae. Beecha beeyekesa eyiri omutuki.

³ Omutuki yababoola ati: Ndootere esilooto, mani nindeyendeherera muno olwohuba mbeere ndaha ohumanya esiindu si ndootere.

⁴ Mani Abakalidaaya nibaboolera omutuki bati: “Ewe omutuki, yiindira! Tuboolere esilooto sy'olootere, hu hwemeeo huhuboolere amahuluundu kasyo.”

⁵ Omutuki yabakobolamo ati: “Maliriire endi nimutamboolera esilooto si ndootere mani amahuluundu kasyo, njia ohubatema-tema, mani enyuumba cheeng'we choosi chisihirire.

⁶ Nae nimumboolera esilooto neende amahuluundu kasyo, njia ohubaberesa ebiyaanwa neende emikabo haandi mbahole mube ab'oluyaali lw'amaani. Mani sakira, mumboolere esilooto neende amahuluundu kasyo.”

⁷ Nabo nibakobolamo ehabi lyohubiri bati: “Ewe omutuki, tuboolere esilooto sy'olootere, naafwe fweesi huchia ohuhuboolera amahuluundu kasyo.”

⁸ Omutuki mani n'abakobolamo ati: “Bulaanu manyire obwadyeeri endi muli ohuteemaho ohusudya ebiha, olwohuba mubwene koti lu maliriire

⁹ endi nimutamboolera esilooto, mweesi muli neende omusaango nasilala. Mufukiirisaanie ohumboolera eby'ohuubbachakania neende ohuhubbakania emboosi nimusuubira muti ebiindu bichia ohukaluuhana ebiha nibibitireo. Mani mumboolere esilooto, hu manye endi munyala ohumboolera amahuluundu kasyo.”

¹⁰ Abakalidaaya nibakobola mu mutuki bati: “Abulao omuundu kata mulala hu syaalo onyala ohuhola esiindu sy'osaba. Olwohuba abulao omutuki yeesi, noomba omutuki w'oluyaali luhoongo muno, owali nasabire ow'amayia wae, oba ow'amaya wae, oba omuhingi wae, esiindu sifwaanana sityo.

¹¹ Ewe omutuki, esiindu sy'oli ohudaha, sidinyu nisyo, abulao omuundu onyala ohusihuboolera, ohutusaho banasaae, haandi banasaae haba sibamenya alala naafwe.”

¹² Ao mani omutuki n'anyoolera muno haandi niyaalabira elalira muno, mani n'alagira ati abakeraki b'amakesi boosi mu Bbabbilooni basihiriswe.

¹³ Mani elako nilituswa liti, abakeraki b'amakesi boosi bohwiitwa. Mani nibakiiya Danieli neende abaasye, bosi ohubeeta.

Nasaae yeekesa Danieli amahuluundu k'esilooto sy'omutuki

¹⁴ Mani Danieli naachia eyiri Arioki, omudumisi w'abaliindi b'omutuki, oweechia ohwiita abakeraki b'amakesi bomu Bbabbilooni.

¹⁵ Mani Danieli n'ateeba Arioki, omudumisi w'amaye k'omutuki ati: “Lwasiina omutuki atusire elako lyaalaba lityo?” Mani Arioki n'aboolera Danieli koti ebiindu lu byali.

¹⁶ Mani Danieli naachia niyekweeda omutuki amubereseho ebiha, anyale ohweekesa omutuki amahuluundu k'esilooto.

¹⁷ Mani Danieli n'akobolayo engo, n'aboolera abaasye Hanania, Misaeli, neende Asaria, ebibeereo,

¹⁸ mani n'ababoolera ati, basabe Nasaae wo muukulu, abakwiire esisa hu biindu bidiira esy'engiso sino, mani Danieli neende abaasye bahaye ohwiitirwa alala neende abakeraki b'amakesi bomu Bbabbilooni.

¹⁹ Mani esiro esyo, esy'engiso sino nisibonehera Danieli. Mani Danieli n'afumia Nasaae wo muukulu

²⁰ n'aboola ati: “Eliita lya Nasaae likiniswe endaalo choosi, olwohuba mukesi haandi w'amaani.

²¹ Niye okaluuhania ebiha neende endaalo; niye otusaho abatuki haandi niye otaao abatuki; niye oberesa abakesi amakesi neende ohumanya eyiri abo abamanyire.”

²² Niye obwiihula eby'engiso neende eby'amayia; amanyire ebiri mu siirima, haandi obulafu bwamwebodoohania.

²³ Hweebasa haandi hufumia, Ewe, Nasaae wa bakuuka yeefwe. Olwohuba wumbereese amakesi neende amaani, haandi bulaanu, omalire ohunjekesa si huhusabire. Otwekeese eyo si mutuki adaha.

Danieli aboolera omutuki esilooto neende amahuluundu kasyo

²⁴ Ao mani Danieli naachia eyiri Arioki, yi mutuki yali n'atumire ohusihirisa abakeraki b'amakesi bomu Bbabbilooni, n'amuboolera ati: “Otasihirisa abakeraki b'amakesi bomu Bbabbilooni. Njire eyiri omutuki, mani ese njia ohweekesa omutuki amahuluundu k'esilooto syae.”

²⁵ Mani bwaangu-bwaangu, Arioki naayira Danieli mu moni w'omutuki. Arioki n'aboolera omutuki ati: “Mbukaanire mulala hu Buyudaaya abanyakibwa, onyala ohuhuboolera amahuluundu k'esilooto syao.”

²⁶ Mani omutuki n'ateeba Danieli, yi liita lyae liindi lyali Bbelitesaasa, ati: “Ewe onyala ohumboolera esilooto si ndaaloota neende amahuluundu kasyo?”

²⁷ Mani Danieli n'akobolamo ati: “Ewe omutuki, esy'engiso sy'osabire, abulao omukeraki w'amakesi onyala ohusihuboolera, oba abalakusi, oba ab'amayia, oba abahiingi, oba abasomera eby'eng'iniing'ini.”

²⁸ Nae yiluwo Nasaae oli muukulu, obwiihula eby'engiso. Mani niye ohwekeese, ewe Omutuki Nebukadineesa, ebiindu bichia ohukwaao mu ndaalo chichiaayo. Esilooto syao, neende bi waboneherwa niweyaliise nibyo bino:

²⁹ “Ewe omutuki, niwali niweyaliise mu sitaanda syao, waloota ebyahakweeo, haandi Nasaae obwiihula eby'engiso, yahweekesa ebyahakweeo.

³⁰ Nae ese, esy'engiso sino simbwihuliirwe, ataali mbwe ndi omukesi ohuhiraho abaandu balamu baandi boosi, nae simbwihuliire, hu ewe omutuki, onyale ohumanya amahuluundu k'esilooto syao, haandu omanye ebibaaso byahwiichira mu mutwe kwao.

³¹ “Ewe omutuki, watingaala mani n'obona esifwaanani sihoongo, nisihweemere mu moni wao. Esifwaanani esyo syali nisineng'aneng'a muno haandi emboneha yasyo yali niyitiisa.

³² Omutwe kwasyo, kwali okw'esaabbu ndai muno. Esirifu neende amahono kasyo byali eby'efeesa. Enda yasyo neende amataango kasyo byali eby'esihomo.

³³ Amakulu kasyo kali ak'ebichuma. Ebisiisiro byasyo, esituundu siindi syali esy'ebichuma, esituundu siindi syali esy'eloba lyohuloongera.

³⁴ Mani niwali n'ositingaala, ekina hoongo lyalikuha elyeene lyoong'ne ohutula hu lwaanda, n'abulao olidiirireho, mani nilihuya ebisiisiro by'esifwaanani by'ebichuma neende eby'eloba, mani nibinyoonyoboha byoosi.

³⁵ Mani esyuuma, neende eloba, neende esihomo, neende efeesa, neende esaabbu, byoosi nibifuniha-funihamo mu bituundu-tuundu, mani nibyehola koti omuhuuchi kwohu lwaanyi mu ndaalo ch'esiminyu. Mani omuyaka nikubidumuulira elalira, nisibulao esyadoong'ao kata nabudiidi. Nae ekina hoongo lyahuya esifwaanani esyo, mani nilyehola olugulu luhoongo olwabwiiha hu syaalo syoosi.

³⁶ “Esilooto esyo syali sino. Bulaanu huchia ohuboolera omutuki amahuluundu k'esilooto esyo.

³⁷ Ewe, ewe omutuki, omutuki w'abatuki boosi, yi Nasaae wo muukulu yaberesa obutuki, obunyala, neende amaani, neende oluyaali.

³⁸ Mani haandi yata mu bunyala bwao abaandu neende ebisolo byomu siino, neende amayoni komu bbanga, yahuba obunyala bwohubituka byoosi, buli yi bimenya woosi. Ewe niiwe omutwe k'esaabbu.

³⁹ Ewe niwahatuleo, wahabeeo obutuki buundi, obutaakana neende obwao. Obwo nibuweereo, wahabaeeo obutuki bwohudatu obw'esihomo, obwahatuke esyaalo syoosi.

⁴⁰ Obutuki bwohune bwahabe obw'amaani koti esichuma, olwohuba esichuma sifunaka-funaka ebiindu boosi mu bituundu-tuundu mani syabinyonyobola. Mani koti lu sichuma sisya mani syafunaka-funaka ebiindu, obutuki obwo bwahasye mani bufunake-funake obutuki bwataangira buno boosi.

⁴¹ Haandi koti lu wabona amakulu neende ebisiisiro, esituundu siindi nisiri esy'eloba, haandi esituundu siindi nisiri esy'esichuma, obutuki obwo bwahabe obukabuhaanemo. Nae bwahabeemo amaani koti ak'esichuma, koti sa lu wabona esichuma syubbaniemo neende eloba.

⁴² Haandi koti lu ebisiisiro by'amakulu esituundu siindi syali esy'esichuma neende esituundu siindi esy'eloba, mani obutuki obwo bwahabe butyo, esituundu siindi esy'amaani, esituundu siindi esikata.

⁴³ Mani koti lu wabona esichuma syubbaniemo neende eloba, mani abatuki b'obutuki obwo bahateemeho ohwehubbania mu hudeehisania, nae haba sibahomirire alala koti lu esichuma sitanyala ohwehubbaania alala neende eloba.

⁴⁴ Mani mu ndaalo ch'abatuki, Nasaae wo muukulu yahateeo obutuki butahasihiriswe daawe; haandi obutahayiingirwe neende abaandu baandi daawe. Bwahafunake-funake mani bunyoonyobole obutuki buno bwoosi mani nibusihirisa obutuki buundi bwoosi. Mani obutuki obwo bwahayiindire endaalo choosi.

⁴⁵ Koti sa lu wabona ekina elyeene nilimekuha hu lwaanda lyoong'ene, naabulao omuundu olidiirireho, haandi koti lyafunaka-funaka esichuma neende esihomo, eloba neende efeesa, neende esaabbu. Nasaae w'Obunyala ahweekese ewe omutuki ebiindu byahabeeo mu ndaalo chichiaayo. Huboolere obwadyeeri bweene koti esilooto lu syali, haandi amahuluundu kasyo niko ako, ataali ohukana-kanaho daawe.”

Omutuki aberesa Danieli omukabo

⁴⁶ Ao mani omutuki Nebukadineesa nagunama aasi, naata obweeni bwae hu loba, mani niyeesa oluyaali mu Danieli. Mani n'alagira ati bayaanire Danieli ebiyaanwa, haandi bamunioohesere obubbaani.

⁴⁷ Mani omutuki n'aboolera Danieli ati: “Mubwadyeeri bweene, Nasaae wao niye Nasaae wa banasaae, haandi Omwaami w'abatuki, haandi omubwihuli w'ebyengiso, olwohuba onyalire ohutuumbula esy'engiso sino.”

⁴⁸ Mani omutuki n'aberesa Danieli oluyaali lw'aakulu muno neende ebiyaanwa biingi muno, mani n'amuhola ohuba omuhunuufu muno mu situndu syoosi esya Bbabbilooni, haandi n'amuhola ohuba ohulira abakeraki b'amakesi bomu Bbabbilooni.

⁴⁹ Mani Danieli n'asaba omutuki ati adoole Sadiraka, Mesaka, neende Abbedineego mani ababerese obunyala mu butuki bw'esituundu sya Bbabbilooni. Nae Danieli n'adoong'a mu dooho ly'omutuki.