فئلئپئلیلره 4 - کتاب مقدس به زبان آذربایجانی جنوبی - نسخه ادبیافضل اولانلاری دوشونون 1 بلهجه، سوگئلئلرئم، حسرتئنی چکدئیئم قارداشلار، سوئنجئم و باشیمین تاجی، ربده بو جور ثابئت دورون، سوگئلئلرئم. 2 یودئیا و سئنتئخئیه یالواریرام کی، ربده همفئکئر اولسونلار. 3 سندن ده، ای حقئقی یولداشیم، خاهئش ادئرم کی، ائنجئلئن خئدمتئنده منئمله چالیشان بو خانیملارا کؤمک اِدهسن؛ هم ده کلِمِنته و اؤزگه همکارلاریما دا کی، آدلاری حیات دفترئندهدئر. 4 همئشه ربده شادلیق ادئن. بئر ده دئیهجهیم: شادلیق ادئن! 5 قویون سئزئن حلئملئیئنئز بوتون ائنسانلارا معلوم اولسون. رب یاخیندیر. 6 هچ بئر شی اوچون نئگاران اولمایین، آمّا هر شیده خاهئشلرئنئزی دوعا، ائستئغاثه و شوکورله تارییا بئلدئرئن. 7 و تارینین هر فهمدن افضل اولان باریشی، مسئح عئسادا، اورَکلرئنئزی و فئکئرلرئنئزی موحافئظت ادهجک. 8 نهایت، قارداشلار، هر نه کی، دوغرو، حؤرمتلی، دوز، پاک، سِومهلی و اعتئبارلیدیر، اگر فضئلتلی، اگر تعرئفه لایئق بئر شی وار، فئکرئنئزی بونلارین اوستونه قویون. 9 و منده اؤیرندئیئنئز، قبول اتدئیئنئز، اشئتدئیئنئز و گؤردویونوز شیلری یرئنه یتئرئن و باریش تاریسی سئزئنله اولاجاقدیر. 10 ربده چوخ سوئنئرم کی، ائندی نهایت منئم حاقّیمدا چکدئیئنئز قیدی تزهلهدئنئز؛ دوغرودان دا منئم قیدئمه چوخ قالمیشدینیز، لاکئن فورصت سئزه ال ورمئردی. 11 بونلاری احتئیاج اوزوندن دمئرم، چونکی اؤیرنمئشم کی، هر حالدا اولسام، نجه قَناعت ادم. 12 اسکئکلئکده یاشاماغی بئلئرم، آرتیقلیقدا یاشاماغی دا بئلئرم. هر شیده و هر حالدا توخ قالماق و آج قالماق، آرتیقلیقدا یاشاماق و احتئیاج ائچئنده عذاب چکمهیئن سئرّئنی اؤیرنمئشم. 13 منه قووّت ورن مسئحله هر شیه قادئرم. 14 آمّا یاخشی ائش گؤردونوز کی، منئم ذئلّتئمده منئمله شرئک اولدونوز. 15 سئز اؤزونوز فئلئپئلیلر بئلئرسئنئز کی، ائنجئلئن خوش خبری ائلک وعظ اولوناندا، مقدونئیّهدن چیخدیغیم زامان، سئزدن باشقا هچ بئر کئلئسا، ورمک و آلماق خئدمتئنده منئمله شرئک اولمادی. 16 حتّا تسالونئکده اولدوغوم زامان دا، سئز بئر-ائکی دفه منئم احتئیاجیم اوچون گؤندَردئنئز. 17 بو او دمک دیئل کی، من هدئیّه آختاریرام. من آنجاق سئزئن حسابینیزا چوخالان ثمرهنی آختاریرام. 18 هر شی کامئل اَلئمه گلئب چاتیب و بول-بول واریم. اِپافرودئتوس اَلی ائله گؤندَردئیئنئز شیلر اَلئمه یتئشئب کی، تارینی خوشنود ادن، خوش بئر رایئحه و مقبول بئر قورباندیر. 19 و منئم تاریم، مسئح عئسادا اؤز شؤوکتئنئن وارلیلیغینا موطابئق، سئزئن بوتون احتئیاجلارینیزی فراهم ادهجک. 20 ائندی تاری و آتامیزا ابددن ابدهجک شؤوکت اولسون. آمئن. 21 مسئح عئسادا اولان هر موقدّسه سالام یتئرئن. منئمله اولان قارداشلار دا سئزه سالام گؤندَرئرلر. 22 بوتون موقدّسلر، خوصوصَن ده قیصرئن اِوئندن اولانلار سئزه سالام گؤندَرئرلر. 23 رب عئسا مسئحئن فیضی سئزئن روحونوزلا اولسون. |
@ 2022 Korpu Company