أيث-فيليـپـي 2 - ثريفيث 2020

أَرَّاي نّغ اَذ يذْوڒ اَم اَرَّاي ن لْمَسِيح

¹ مڒَا كنِّيو تْوَاشجّْعم س لْمَسِيح نِغ ثتْهِلَّام ذِي ڒمْحِبّث نّس نِغ ثْشَرّْشم اَك أَرُّوْح نّس، نِغ ثُوْفِيم ذَايس اَرَّحْمث ذ لْحَنَانَا،

² أَتَاف يتْخصَّا اَذ تْكمّْڒم إِ ڒفْرَاحث ينُو اَغَارْوم يِيڒِي اَرَّاي ذ يجّن ذ ڒمْحِبّث ذ يشْتن، كنِّيو اَذ تِيڒِيم ذ يجّن اَغَارْوم ثِيڒِي يجّن ن لْفِكْرَا.

³ وَار تݣّم وَالُو زِي لْأَنَانِيَا نِغ زِي تَّكبُّر. بْڒَا تَّكبُّر وقَّرم ينّغْنِي حْسن زݣ يِيخف نْوم.

⁴ ئِتْخصَّا كُڒ يجّن زَّايْوم وَار يخزَّر شَا مِين ث يتْهِيمَان وَاهَا. ئِتْخصَّا-ث عَاوذ اَذ يخْزَر مِين يتْهِيمَان إِ يِنّغْنِي.

⁵ أَرَّاي نْوم يتْخصَّا اَذ يِيڒِي اَم اَرَّاي ن عِيْسَى لْمَسِيح.

⁶ نتَّا اَقَاث ذ صِّفث ن أَربِّـي، وَلَكِن وَامِي يمْقُدَّا اَك أَربِّـي وَار ينْوِي شَا اَذ يطّف ذِي مَانَاينِّي.

⁷ لَّا، نتَّا يَارَّا يخف نّس ذ وَالُو يطّف يجّن ن صِّفث اَم يِيسْمغ، يعْنِي يخْڒق-د اَم صِّفث ن بْنَاذم.

⁸ وَامِي د يمظْهَار اَم صِّفث ن يِجّن ن بْنَاذم، ئِسهْوَا-د يخف نّس يطَاع حتَّا وَامِي يمُّوْث يجّن ن ڒْموْث ذِي صَّلِيب.

⁹ خ مَانَاينِّي يسْݣَعّذ-يث أَربِّـي غَار وجنَّا قَاع، يݣَّا-ٱس يسم نِّي إِي يدْجَان ذݣ وجنَّا خ يِيسمَاون مَارَّا.

¹⁰ بَاش خ يِيسم نِّي ن عِيْسَى اَذ ركْعن مَارَّا خ يفَادّن نْسن، يِنِّي يدْجَان ذݣ وجنَّا ذ يِنِّي يدْجَان ذِي ثْمُوْرْث ذ يِنِّي يدْجَان سْوَادَّاي ن ثْمُوْرْث.

¹¹ أَذ يعْتَرف كُڒ يِيڒس اَذ يِينِي خ عِيْسَى لْمَسِيح قَا نتَّا ذ سِيذِيثْنغ اَزَّايس يسمْغَار أَربِّـي بَابَاثْنغ.

إِڒِيث اَم يِيثْرَان ن وجنَّا يرقّن خ ثْمُوْرْث

¹² إِذن آي يمْعِيزّن ينُو، مَامش تُوْغَا ثتْطَاعَام ڒبْدَا زِي قْبڒ وَامِي تُوْغَايِي اَكِذْوم، أَمنِّي عَاوذ إِي غَا ذَايِي ثْطَاعم وَامِي خَاوم غَابغ. يعْنِي اَذ تقِّيمم تݣّم لْمجْهُوْد بَاش اَذ تْكمّْڒم مْلِيح ذݣ وسنْجم نْوم س يِجّن ن ثِيݣّْوْذِي ذ يِجّن ن تَرْجِيجِي.

¹³ مِينْزِي ذ أَربِّـي إِݣ يسْخدَّامن اَرَّاي نْوم ذ ڒخْذَايم نْوم بَاش اَذ تݣّم لْغَرَض نّس ذ اَصبْحَان.

¹⁴ ݣّث مَارَّا ثِمسْڒَايِين بْڒَا مَا ٱذ تْشثْشَام بْڒَا مَا ٱذ تْمنْغم.

^15-16 أَمُّو اَذ تِيڒِيم بَرِئِن بْڒَا ڒْعِيب ذِي ڒْوسْط ن يِوْذَان ن ڒْوقْث-أَ يعوّْجن يخَروْضن. ذَايْسن إِي ثْرقّم اَم يِيثْرَان ذِي دُّنشْت-أَ خْمِي ذَاسن تْقدَّامم اَوَاڒ ن ثُوْذَارْث. أَمنِّي اَذ فْتَخَرغ ذِي نْهَار نِّي ن لْمَسِيح نش وَار ؤُزِّيڒغ شَا وَار خْذِيمغ شَا ذِي ڒْخَاوِي وَاهَا.

¹⁷ نش فَرّْحغ اَكِذْوم س يِجّن ن ڒفْرَاحث مَعْلِيش مڒَا فرّْغن-اَيِي-د وَاهَا اَم يِجّن ن صّذْقث ن يذَامّن خ دْبِيحث نْوم إِي تْقدَّامم كنِّيو س لْإِيمَان نْوم.

¹⁸ أَمنِّي عَاوذ ؤُڒَا ذ كنِّيو يتْخصَّا اَكِذِي ثْفَرْحم س يِجّن ن ڒفْرَاحث.

أَرَّسُوْل بُوْلُس يتْوصَّا خ تِيمُوْتَاوُس ذ پَـارْفُوْلِيتُس

¹⁹ تْمنِّيغ س عِيسَى لْمَسِيح اَذَاوم د سّكّغ تِيْمُوْتَاوُس ذغْيَا بَاش خْمِي ذَايِي د غَا يَارّ ڒخْبَار خَاوم اَذَايِي يسْفَرح.

²⁰ وَار غَارِي ذَا حَدّ اَم نتَّا تْهِيمَا-ث لْحَالَا نْوم.

²¹ مَارَّا رزُّوْن مِين ذَاسن يتْهِيمَان إِ يِيخف نْسن وَاهَا، مَاشِي مِين يتْهِيمَان إِ عِيسَى لْمَسِيح.

²² أَمَّا تِيْمُوْتَاوُس نتَّا ثسّْنم-ث ملْتَازم س يِيخف نّس، ئِخدّم اَكِذِي ذِي لْإِنْجِيل اَم يِجّن ن وحَرْمُوْش يخدّم اَك بَابَاس.

²³ خ مَانَايَا، تْمنِّيغ اَذَاوم ثِيذ سّكّغ وَلَكِن تْرَاجِيغ اَذ ࢲرغ مَامش غَا عْذُوْنْت لْمَشَاكِل ينُو.

²⁴ أُو نش اَقَايِي مْتيّْقن ذِي سِيذِيثْنغ اَغَارْوم د اَسغ ذغْيَا ؤُڒَا ذ نش.

²⁵ شُوْف، تْوَاڒِيغ لَابُد اَذَاوم د اَرّغ ؤُمَا پَـارْفُوْلِيتُس ونِّي إِي كِذِي يتمْعَشَارن اَم شَا ن ومْجَاهذ. نتَّا ذ اَمسخَّار نْوم ونِّي إِي ذَايِي د تسّكّم بَاش اَذَايِي يتْهِيلَّا.

²⁶ ئِتْوحَّاش-يكنِّيو اَطَّاس مَارَّا إِذْوم، ييْسِي خَاوم اَمْنُوْس عَاوذ وَامِي د ثَارِّيم ڒخْبَار تُوْغَا يهْڒش.

²⁷ وَاه، تُوْغَا يهْڒش ذ صَّح. تُوْغَا عْڒَاين يمُّوْث وَلَكِن أَربِّـي يرْحم-يث. وَار يدْجِي شَا نتَّا وَاهَا، يرْحم-اَيِي ؤُڒَا ذ نش بَاش وَار خَافِي يتْمَارْنِي ڒْهمّْ خ ڒْهمّْ.

²⁸ خ مَانَاينِّي اَذَاوم ثِيذ سّكّغ ڒخُّو ذ اَبْرِيذ بَاش اَذ تْفَرْحم خْمِي ث غَا ثࢲرم أُو عَاوذ وَار ذَايِي يتِيڒِي بُو ومْنُوْس.

²⁹ رحّْبم-ث س سِيذِيثْنغ س يِجّن ن ڒفْرَاحث ذ تَمقّْرَانْت، وقَّرث يرْيَازن اَم نتَّا.

³⁰ مَايمِّي؟ تُوْغَا عْڒَاين يمُّوْث عْلَاحْسَاب ڒْخذْمث ن لْمَسِيح مِينْزِي يغَامَر س ثُوْذَارْث نّس وَامِي يرزُو اَذ يخْذم مِين وَار ثْزمَّرم شَا اَذ تْخذْمم كنِّيو زِي لْوَاجِب نْوم غَارِي.