Daniel 1 - Pathian Lekhabū Ānthiang

Daniel lē a Mal ngāi Pathian Hetelna

¹ Zuda rēng Zehoiakim a rēng changa kum anthum changnāna han, Babulon rēng Nebukadnezar chu Zerusalem-a a hong a, a hong āhuol a.

² Pumā'n Zuda rēng Zehoiakim le Pathian ina tinratuo senkhat ngāi le han a kuta a pēk a. Amā'n hava ngāi chu Sinar rama a pathian ina a hong chōi a. Amā'n hava tinratuo ngāi chu a pathian in sasiara a hong chōi a.

³ Hatuka rēngin a dorbōndompū ngāi ruoipū, Aspenaz chu Israel nāi ngāi kār ātā, rēng chī senkhat le milian senkhat,

⁴ demkāilui ruothar, mēlsā, hianna tin āmang thei, riatna dōn, ariat len thei, rēng-ina dorbōndom ranga ānding ngam mī a hong āruoi ranga le rēngin ama chu Kaldia ngāi chong lē ānziak chong ei manchū theina rang chong a pēk a.

⁵ Rēngin amāni ranga rēng nēksāk le theirapomningtī ei nēk chachak ātā anikhuo'n tina a chang-āi u chu a mansūk chachak a. Kum anthum anchūna om u'n tia, hava hun a hek suona han amāni chu rēng matona dorbō a dom u'n ti.

⁶ Amāni ngāi kāra han Zuda nāi ngāi ātā Daniel, Hanania, Misael lē Azaria a ni u na.

⁷ Rēng dorbōndompū ngāi ruoipū'n a raming u ngāi a phuo na, Daniel chu Beltesazar, Hanania chu Sadrak, Misael chu Mesak lē Azaria chu Abednego tī na a phuo na.

⁸ Tenchu Daniel-in rēng nēksāk mo ole a theirapomningtī ei buong chachak ngāi le han a ninga ānnim nōk ranga a malung a lei ānsin a. Hasikhan rēng dorbōndompū ngāi ruoipū kōma a ninga ei ānnim nōkna ranga a mathēm a.

⁹ Pathianin Daniel chu hava rēng dorbōndompū ngāi ruoipū kōma ditbingna lē lungkhamna a manchang a.

¹⁰ Rēng dorbōndompū ngāi ruoipū'n Daniel a kōma, “Na nēksāk u le nei buong u rang a nā'n sūkpē u, ka puma rēng chu kā chī. Hong sik mo kum nei ānruolpui u ruothar ngāi māi nēka na māi u ngāi chu asiat uola ei na mū u rang? Hatuka rēng matona ka lū chu anchī oma rē na ti,” a tī na.

¹¹ Hantin han rēng dorbōndompū ngāi ruoipū'n Daniel, Hanania, Misael lē Azaria ngāi āenpū ranga ei rē pū kōma, Daniel-in,

¹² “Lungkhama, na suok ngāi hi ni sōm thia ro, amānī'n āsāk rang anna le ānēk rang tī rong na pēk u rase.

¹³ Hatuka koini na mēl ngāi le rēng nēksāk asāk ruothar ngāi mēl chu na matona anthiana om rase. Hantin han nei mū anga han, na suok ngāi chunga thō ro,” a tī na.

¹⁴ Hantin han hiva ruia chu a zōtpui a, ni sōm amāni chu a thiana.

¹⁵ Ni sōm suona han rēng nēksāk āsāk ruothar ngāi mēl nēka han amāni mēl chu asāna lē taksā amara anlang u na.

¹⁶ Hantin han kiavāngpū'n a nēksāk u lē ei buong u rang theirapomningtī chu a khāipē chachak a, amāni chu anna a pēk chachak a.

¹⁷ Hiva ruothar manli ngāi hi chu, Pathianin amāni chu riatna, ānziak lekhabū tina theina lē hianna a pēk a. Daniel chu anlārna le ramang dōra riattheina chu a dōn a.

¹⁸ Rēngin amāni chu a hong ānlūt ranga chong ei pēkna nikhuo a hong āhek le han, rēng dorbōndompū ngāi ruoipū'n amāni chu Nebukadnezar a matona a hong ruoi a.

¹⁹ Hatuka rēngin amāni chu a chongpui a, amāni ngāi dōra kāra han Daniel, Hanania, Misael lē Azaria anga han anman mak a. Hasikhan amāni chu rēng matona dorbō a dom u na.

²⁰ Rēngin kong tina amāni ei thianāna han hiannāna le riattheināna, a rēngram pumpuia dōithei ngāi lē dōichong athei ngāi nēka amāni chu thep sōm āsā u tī na a mū thei a.

²¹ Hantin han Daniel-in rēng Kores a rēng changna kum khatna tenpei hava han a om a.