နိဒါန်း
စာရွီးဆရာ အကြောင်း
စာရွီးဆရာ နာမည် ပေါလု ဖြစ်ပါရေ (ဖိလိပ္ပိ ၁:၁)။ စာရွီးဆရာ အကြောင်းကို အလှပ သိချင်ရေဆိုကေ ရောမဩဝါဒ စာစောင် နိဒါန်းမာ ကြည့်ပါ။
စာရွီးစာ အချိန်န နေရာ
ခရစ်သက္ကရာဇ် ၆၁-၆၂ နှစ်အထဲတွင်းမာ ရောမမြို့ထောင်ထဲကနီရို့ ပေါလု ဒေ စာစောင်ကို ရွီးလီပါရေ။
စာရွီးဆရာ၏ ရွယ်မှတ်ချက်
ဖိလိပ္ပိမြို့ အသင်းတော် သူ့ကို အကူညီပီးလီရေအတွက်န ဝမ်းသာရို့ သူရို့ကို ကျေးဇူးတင်ဖို့အတွက် ပေါလု ဒေ စာစောင်ကို ရွီးလီပါရေ။ အရာ ကျုံသူရို့ ညှဉ်းဆဲခြင်းကို ခံရရေအချိန်မာ စိတ်မပျက်ဘိုင်းန တတိုင်းမမြိုင်း နီဖို့နိုင်လတ်အောင် သူရို့ကို စိတ်အားပီးဖို့အတွက် ဒေ စာစောင်ကို ရွီးလီပါရေ။ အရာ သူစာ ထောင်ကျခြင်းကနီရို့ ထာဝရဘုရား သူ့ကို အောင်မြင်ခြင်း ပီးဗျာဆိုစာကို ပြောပြဖို့အတွက်လည်း ဒေ စာစောင်ကို ရွီးလီစာ ဖြစ်ပါရေ။
စာအုပ် ခွဲခြားမှု
ဒေ စာစောင်ကို ဝမ်းသာခြင်း၏ စာစောင် ဟို့ ခေါ်နိုင်ပါရေ၊ အကြောင်းကား ဒေ စာစောင်မာ အစကနီရို့ အဆုံးတိုင်အောင် ပေါလု ဝမ်းသာခြင်း အကြောင်းကို ဖေါ်ပြလီပါရေ။ အရာ ဒေ စာစောင်မာ ခရစ်တော်ကို ချီမွမ်းရို့ တေးခြင်း တစ်ပုဒ် ရွီးလီပါရေ (ဖိလိပ္ပိ ၂:၅-၁၀)။ ခိုက်ဟောင်းက အသင်းတော်တိ သတင်းဝင်ရေခါ ဒေ တေးခြင်းကို ဆိုလီကတ်တေ ဟို့ တစ်ချိုးလူရို့ ကျုံကတ်ပါရေ။ အရာ ခရစ်တော်၏ လူအနေန ဇာ အခြေအနေမာပင်မဆို နှစ်သက်ခြင်းစိတ်န ဝမ်းသာရို့ နီထိုင်ရဖို့ဆိုစာကိုလည်း ဂရုစိုက်ရို့ ရွီးလီပါရေ (ဖိလိပ္ပိ ၄:၄)။
သမိုင်း အကြောင်း
ဖိလိပ္ပိမြို့စာ ရောမအစိုးရ အုပ်ချုပ်စာ မာကေဒေါနိပြည်နယ်မာ မြို့ကြီးတစ်မြို့ ဟိလီပါရေ။ ဒေ မြို့မာ လူပေါင်း လေးငါးသိန်းလှောက် နီထိုင်ရို့ ဟိလီပါရေ။ ဒေ မြို့မာ ယုဒလူမျိုး၊ ရောမနိုင်ငံသား အရာ ဂရိလူမျိုးလည်း နီထိုင်လီကတ်ပါရေ၊ ယေကေလည်း ဂရိလူမျိုး အများကြီး ဟိလီကတ်ပါရေ။ ဒေ မြို့သားရို့စာ ကောင်းကောင်း သူဌေး ဟိလီကတ်ပါရေ။ ဒေ မြို့မာ လုဒိနာမည်န မိန်းမတစ်ယောက်၊ ထောင်ဗိုလ်ကြီး အရာ သူ့မာ အိမ်သား အားကုံးသူ ခရစ်တော်ကို ပထမ ကျုံလီပါရေ (တမန်တော် ၁၆:၁၃-၁၅၊ ၃၁-၃၄)၊ အရာ အသင်းတော် တည်ဆောက်လီပါရေ။ ဒေ ဖိလိပ္ပိမြို့ အသင်းတော်စာ ဥရောပတိုက်မာ ပေါလု တည်ဆောက်လီစာ ပထမ အသင်းတော် ဖြစ်ပါရေ။
အကြောင်းအရာ အကျဉ်းချုပ်
(က) နှုတ်ဆက်ခြင်း၊ ချီမွမ်းခြင်း အရာ ဆုတောင်းခြင်း ၁:၁-၁၁
(ခ) တမန်တော် ပေါလု ကိုယ်တိုင် တွိကြုံရစာ အကြောင်း ၁:၁၂-၂၆
(ဂ) ခရစ်တော်ပိုင် နီထိုင်ခြင်း ၁:၂၇-၂:၁၈
(ဃ) တိမောသေန ဧပဖြောဒိတ် အကြောင်းကို ပုံဥပမာ တင်ပြခြင်း ၂:၁၉-၃၀
(င) မှားယွင်းစာ ဆရာရို့ အကြောင်းနပတ်သပ်ရို့ သတိပီးခြင်း ၃:၁-၄:၉
(စ) ဖိလိပ္ပိမြို့ အသင်းတော် ကူညီရေအတွက်န ပေါလု ကျေးဇူးတင်ခြင်း ၄:၁၀-၂၀
(ဆ) အဆုံးခေါက် နှုတ်ဆက်ခြင်းန ပဿိပီးခြင်း ၄:၂၁-၂၃
