Luqa 1 - Ṯarifiṯ 2020

Luqa itari i yijjen n ssiyyed qqaren-as Tufilus

¹ A si Tufilus, aṭṭas n yiwḏan ggin aḏ arin min iweqƹen ɣarneɣ.

² Urin nican ƹlaḥsab mamc ḏaneɣ xbaren ȓechuḏ ḏ ixeddamen n wawaȓ n Arebbi iǧan ḏeg umezwaru.

^3-4 A siḏi uȓa ḏ nec tɣiȓ-ayi mliḥ aḏ ggeɣ aḏ ariɣ min iweqƹen wami beḥṯeɣ ḏi marra manaya mliḥ. Aḏac ṯ ariɣ ṯa s ṯa ḥima aḏ tessneḏ ȓḥaqq n ṯmesȓayin nni iy ḏac seȓmaḏen.

Lmalak itxebbar mammec ɣa d ixȓeq Siḏna Yaḥya

⁵ Tuɣa ḏi ȓweqṯ n uzeǧiḏ Hirudus netta iḥekkmen x ṯmurṯ n Yahuḏiya ḏinni ijjen n ȓefqi netta zi lfirqa n Abyu qqaren-as Zakariya. Ɣares ijjen n ṯemɣarṯ zi ddurriṯ n Harun nettaṯ qqaren-as Ilizabet.

⁶ Zakariya ḏ Ilizabet niṯni gguren nican ak Arebbi, uȓ nsen ḏ acemȓaȓ. Teggen marra min yumar ḏ marra min iweṣṣa Siḏi Arebbi.

⁷ Walakin war ɣarsen bu iḥenjiren minzi Ilizabet war tirew ca. Ƹaweḏ niṯni s ṯnayen iḏsen mɣaren aṭṭas.

⁸ Ijjen n nhar Zakariya ṯuweḍ-d nnuba nnes aḏ ixḏem ḏi ṯemziḏa ḏ ȓefqi zzaṯ i Arebbi ak lfirqa nnes.

⁹ Ggin lqurƹa ƹlaḥsab ttaqalid nsen iy teggen ȓfuqaha. Nhar nni ṯusa-d lqurƹa ḏi Zakariya bac aḏ yaḏef ɣar ṯemziḏa ṯameqqrant n Siḏi Arebbi ḥima aḏ iceƹƹeȓ tbaxur ḏinni.

¹⁰ Wami itceƹƹaȓ tbaxur, marra ccaƹb nni iy ḏinni imunen qqimen ɣar barra i ṯemziḏa tẓaǧan.

¹¹ Ȓexddenni imeḍhar-as-d i Zakariya ijjen n lmalak n Siḏi Arebbi ibedd x ufusi n ȓmeḏbaḥ n tbaxur.

¹² Zakariya wami ṯ iẓra inexȓeƹ, iggweḏ.

¹³ Inna-as Lmalak nni: "A Zakariya war teggweḏ ca, qa istajeb-ac Arebbi ḏi min ḏas ṯettareḏ. Ṯamɣarṯ nnec Ilizabet aḏac d ṯejj ijjen n uḥenjir, aṯ ṯsemmiḏ cek Yaḥya.

¹⁴ Ssaƹḏ nnec aḏ tfarḥeḏ. Xmi d ɣa ixȓeq azzayes farḥen aṭṭas n yiwḏan

¹⁵ minzi aḏ yiȓi ḏ ameqqran ɣar Siḏi Arebbi. Aḏ tiȓi labud ƹemmarṣ aḏ isew aman n uḍiȓ niɣ ḏ waman n imendi. Aḏ yiȓi iƹemmar s Arruḥ iqeddsen ḥetta ḏeg uƹeddis n yemmas.

¹⁶ Aḏ yarr aṭṭas n Ayṯ-Israʼil ɣar Siḏi Arebbi nsen.

¹⁷ Aḏ yuyur zzaṯ i Siḏi Arebbi s yijjen n arruḥ ijheḏ am wenni n nnabi Ilyas. Aḏ ismeṣȓaḥ lwalidin ak ṯarwa nsen. Aḏ yarr yinni iƹeṣṣan ɣar ubriḏ n yinni iǧan nican ḥima aḏ isewjeḏ ccaƹb i Siḏi Arebbi aḏ iȓin wejḏen."

¹⁸ Inna-as Zakariya i lmalak nni: "Mammec ɣa ssneɣ nec manaya ḏ ṣṣaḥ? Qa nec wessareɣ, ṯamɣarṯ inu ṯewsar."

¹⁹ Indeq-d lmalak nni inna-as: "Qa nec ḏ Jibril ḏ wenni itbeddan zzaṯ i Arebbi, issekk-ayi-d Arebbi ɣarec bac akic ssiwȓeɣ aḏac iniɣ ȓexbar-a isfarraḥen.

²⁰ Ȓexxu cek aḏ tiȓiḏ ḏ azeynun. War ṯessiwiȓeḏ ca ḥetta aȓ nhar nni iy ɣa iwqeƹ manaya minzi cek war ṯumineḏ ca zeg wawaȓ inu wenni iy d ɣa iffɣen nican ḏi ȓweqṯ nnes."

²¹ Ccaƹb qqimen trajan Zakariya, tƹejjben wami iƹḍeȓ aṭṭas ɣar ḏaxeȓ ḏi ṯemziḏa ṯameqqrant.

²² Wami d iffeɣ ssenni war izemmar ca akiḏsen issiweȓ, iqqim issawaȓ akiḏsen s ifassen waha. Ssenni fehmen imeḍhar-as-d lwaḥi ɣar ḏaxeȓ ḏi ṯemziḏa ṯameqqrant iḏweȓ ḏ azeynun.

²³ Wami ƹḏun wussan n ȓxeḏmeṯ nnes iḏweȓ ɣar ṯeddarṯ nnes.

²⁴ Menbaƹd ṯeysi ṯemɣarṯ nnes Ilizabet aƹeddis ṯeqqim xems chur ṯesnuffar ixef nnes.

²⁵ Ṯeqqar: "Ḏ manaya iy ḏayi yuca Siḏi Arebbi ḏi nhar wami ḏayi ifqeḏ ḥima axafi ikkes ȓƹib n yiwḏan."

Lmalak itxebbar mamc d ɣa ixȓeq Siḏiṯneɣ Ƹisa

²⁶ Ilizabet wami ṯeǧa ḏi char wis setta, issekk-d Arebbi ijjen n lmalak qqaren-as Jibril ɣar yijjen n ubilaj ḏi ṯmurṯ n Ljalil qqaren-as Naṣira.

²⁷ Iruḥ ɣar yijjen n ṯeƹzriṯ qqaren-as Maryam ṯenni iy keḏ igga zzujiya ijjen n uryaz zi ddurriṯ n Dawed netta qqaren-as Yusef.

²⁸ Yuḏef ɣares lmalak nni inna-as: "Azul ya ṯenni iy xef irḍa Arebbi, aqa Siḏi Arebbi aqaṯ akiḏem."

²⁹ Ḏinni Maryam ṯnexȓeƹ wami ṯesȓa i wawaȓen nnes, ṯrezzu aḏ tmeyyez min iƹna sȓam nni.

³⁰ Inna-as lmalak nni: "War teggweḏ ca a Maryam, aqa cem yarḍa xam Arebbi!

³¹ Aḏ teysiḏ aƹeddis, aḏ d tejjeḏ ijjen n uḥenjir aṯ tsemmiḏ Ƹisa.

³² Aḏ yiȓi imɣar, ataf tȓaɣan-as a Mmis n Wenni Yuƹȓan. Aḏas yuc Siḏi Arebbi nnes lƹarc n jeddis ameqqran Dawed.

³³ Aḏ iḥkem x ȓqum n Yaƹqub i ȓebda, ȓmulk nnes ƹemmarṣ aḏ ifna."

³⁴ Ṯenna-as Maryam i lmalak nni: "Mammec iy ɣa yiȓi manaya? Aqa nec ƹaḏ ḏ ṯaƹzriṯ."

³⁵ Indeq-d lmalak nni inna-as: "Axam d ihwa Arruḥ iqeddsen ḏ jjheḏ n Wenni Yuƹȓan axam yarr ṯiȓi. S manayenni aḥenjir iqeddsen iy ɣa d ṯejjeḏ ataf tȓaɣan-as a Mmis n Arebbi.

³⁶ Ilizabet ṯenni iǧan zi ȓeḥbab nnem, waxxa nettaṯ ṯemɣar aqat s uƹeddis. Aqat ḏi char wis setta waxxa tȓaɣan-as yiwḏan a ṯenni war itirwen ca.

³⁷ War ṯeǧi bu can ȓḥajeṯ ṯeqseḥ ɣar Arebbi."

³⁸ Ṯenna-as Maryam: "Nec aqayi ḏ ṯaxeddant ɣar Siḏi Arebbi, arḍiɣ x wawaȓ nnec aḏayi iwqeƹ." Ssenni iruḥ xas lmalak nni.

Maryam ḏ Ilizabet

³⁹ Ḏeg wussan nni ṯekkar Maryam ṯruḥ s ṯazzȓa ɣar uḏrar ɣar yijjen n ubilaj ḏi ṯmurṯ n Yahuḏiya.

⁴⁰ Ṯuḏef ɣar ṯeddarṯ n Zakariya ṯseǧem x Ilizabet.

⁴¹ Wami ṯesȓa Ilizabet i sȓam n Maryam, inhezz useymi nni ḏeg uƹeddis nnes, nettaṯ ṯeccur s Arruḥ iqeddsen.

⁴² Ṯȓaɣa s yijjen n ṯmijja ṯejheḏ ṯenna: "Cem twabarkeḏ jar ṯemɣarin, ƹaweḏ itwabarek wenni iy iǧan ḏeg uƹeddis nnem!

⁴³ Nhara ḏ nhar ḏ ameqqran i nec wami ɣari d tusa yemmas n Siḏi!

⁴⁴ Wami d tusiḏ sȓiɣ i sȓam nnem, inhezz uƹeddis inu s ȓefraḥeṯ.

⁴⁵ A ssaƹḏ n ṯenni yumnen min ḏas inna Siḏi Arebbi aḏ yiȓi."

Maryam ṯḥemmeḏ Arebbi

⁴⁶ Uca ṯenna Maryam: "Ȓaƹmar inu iḥemmeḏ Siḏi Arebbi,

⁴⁷ arruḥ inu ifareḥ zi Arebbi iy ḏayi isnejmen.

⁴⁸ Iẓra-ayi ḏ ṯaxeddanṯ nnes ḏ ṯadriwect waha. Ssa aȓ ṯsawent marra iwḏan aḏayi ḥessben ḏ ṯamimunt,

⁴⁹ minzi wenni izemmaren igga-ayi aṭṭas n ṯmesȓayin ḏ ṯimeqqranin. Netta isem nnes ḏ ameqqran,

⁵⁰ arraḥmeṯ nnes ṯeǧa zi ljil ɣar ljil i yinni ṯ iteggwḏen.

⁵¹ Igga s ufus nnes ȓexḏayem ṯimeqqranin, icettet yinni iḥesben ixef nsen ḏ imeqqranen.

⁵² Isehwa-d izeǧiḏen zi lƹarcaṯ nsen, isgaƹƹeḏ yinni iǧan ḏ ḏrawec.

⁵³ Isejjiwen s ȓxir nnes yinni iǧuzen, issekk twajar s ifassen nsen xwan.

⁵⁴ Iƹawen Ayṯ-Israʼil iy iǧan ḏ ȓƹabḏ nnes ƹlaḥsab arraḥmeṯ nnes,

⁵⁵ mamc iwƹeḏ ȓejḏuḏ nneɣ, Brahim ḏ ddurriṯ nnes i ȓebda."

⁵⁶ Ṯeqqim Maryam ak Ilizabet can ṯeȓt chur ssenni ṯeƹqeb-d ɣar ṯeddarṯ nnes.

Ammu ixȓeq Siḏna Yaḥya

⁵⁷ Wami d ṯuweḍ ȓweqṯ n Ilizabet aḏ tarew, ṯejja-d aḥenjir.

⁵⁸ Jjiran nnes ḏ ȓeḥbab nnes farḥen akiḏes wami ɣarsen ȓexbar belli Siḏ Arebbi irḍa xas aṭṭas.

⁵⁹ Ṯeƹḏu ṯmenyam, usin-d yiwḏan ḥima aṯ ṭehharen. Rezzun aḏas semman Zakariya x yisem n babas,

⁶⁰ walakin yemmas ṯugi ṯenna-asen: "Lla, aṯ nsemma Yaḥya."

⁶¹ Nnan-as: "Uȓa ḏ ijjen zi ȓeḥbab nnem ma isemma s yisem-a."

⁶² Sseqsan babas s ifassen: "Mammec ṯexseḏ cek aṯ tsemmiḏ?"

⁶³ Ittar Zakariya ijjen n ṯaȓwiḥet yura ḏayes: "Isem nnes Yaḥya." Qqimen yiwḏan nni tƹejjben marra iḏsen.

⁶⁴ Ḏeg umcan indeq Zakariya ibḏa issawaȓ iḥemmeḏ Arebbi.

⁶⁵ Ggwḏen marra jjiran. Bḏan ssawaȓen yiwḏan x marra manaya ḏi marra iḏurar n ṯmurṯ n Yahuḏiya.

⁶⁶ Marra ug itesȓan x ṯmesȓayin-a qqaren ḏeg wuȓawen nsen, Min ɣa iḏweȓ uḥenjir-a? Minzi fus n Siḏi Arebbi aqaṯ akiḏes.

Zakariya iḥemmeḏ Arebbi

⁶⁷ Zakariya babas n Yaḥya, iccur s Arruḥ iqeddsen, issiweȓ s min iƹȓem zi Arebbi inna:

⁶⁸ "Lḥamdu lillah i Siḏi Arebbi n Ayṯ-Israʼil, ȓaḥeqqac ifqeḏ ccaƹb nnes ifekk-iṯ.

⁶⁹ Ismeḍhar-aneɣ-d wenni ḏeg iǧa jjheḏ iy ḏaneɣ ɣa isnejmen, yusa-d zi ddurriṯ n Dawed ȓƹabḏ n Arebbi.

⁷⁰ Manaya issiweȓ s yiȓesawen n lʼanbiya ṣṣaliḥin aṭṭas zeg wami,

⁷¹ aḏaneɣ isenjem zi ȓƹaḏyan nneɣ, ƹaweḏ zeg ifassen n marra yinni ḏaneɣ itƹiffan.

⁷² Aḏ d ismeḍhar arraḥmeṯ nnes iy zi iwƹeḏ ȓejḏuḏ nneɣ, aḏ iƹqeȓ x ȓƹaheḏ nnes iqeddsen.

⁷³ Yuca-as ȓƹaheḏ i jeddiṯneɣ Brahim,

⁷⁴ aḏaneɣ isenjem zeg ifassen n ȓƹaḏyan nneɣ, ḥima aṯ neƹbeḏ bȓa ṯiggwḏi,

⁷⁵ s wuȓ iṣfa ḏ acemȓaȓ i marra ṯuḏarṯ nneɣ.

⁷⁶ Y cek ay aḥenjir, aḏac tȓaɣan nnabi n Wenni Yuƹȓan, minzi aḏ tuyureḏ ɣar zzaṯ ḥima aḏ teswejḏeḏ abriḏ i Siḏi Arebbi.

⁷⁷ Ƹaweḏ aḏ tesȓemḏeḏ i ccaƹb nnes x usenjem, iƹni mamc iy ɣa twaɣfarent ȓmuƹṣiyaṯ nsen.

⁷⁸ Minzi Arebbi nneɣ ḏ araḥman ḏ araḥim, ifqeḏ-aneɣ-d zeg ujenna xmi ṯɣeǧi ṯfuct.

⁷⁹ Ḥima aḏ yuc ṯfawṯ i yinni itƹicen ḏi ṯaǧesṯ ḏi ṯiȓi n ȓmewṯ, ḥima aḏaneɣ isuyur iḍaren nneɣ ɣar ubriḏ n ȓehna."

⁸⁰ Tuɣa aḥenjir itemɣar itejhiḏ s arruḥ nnes. Izeddeɣ ḏi ȓexȓa aȓ wami d imeḍhar i Ayṯ-Israʼil.