MARK 2 - KENSHÜN LESÜ Naga (S) CL Bible (BSI)

Jisu Le Terothonyu Nme Thyüngwa Keshü

¹ Jon keshanyu siki Jisu le Kapernaum nyu niyülo ntsin a-le ka nme nyu bin tsekethyü mele sha gunla.

² Tson-o temi kechon le ryüo kequen kelo le gü kakhin keti-e temi bin ndila; tsontsin a-le anyugun senthyü so.

³ Tsükatsü temi mizi le terothonyu nme pen-o a-ki ryü.

⁴ Lo anyugun le temi dan genyu a-ki yüloshvu lao ka soki a-le kebin ntsen ka bophelo; tson-o terotho gü lo a-jü kesin pe Jisu mhundyü ntsen ka hoshü.

⁵ Tsontsin Jisu le temi tsüdan ketenyen hyulo njüo terotho gü ka, “A nyugü, nkemu jü pe ntsüla sele nye.”

⁶ Ai lesükeshatsin nyu dan peha le tsünyu bin-o anyugun le anyugun nyunki,

⁷ “Temi higü le nyuthyüo hihontse zo hü nla? A-le Sunggigü nkhin bin laso, Sunggigü a-me segü le me kemu jülo gwa tila?”

⁸ Tsontsin Jisu le anyugun kerüchün shalo njüo anyugun ka, “Hagun le nyuthyüo hagun nyuki hihontse kethyü rüchün hü nla?

⁹ Terothogü ka, ‘N kemu dan jüshü pe ntsüla sele,’ tsonkezo lo ‘So-o njü khisen-o tsonchülo chi,’ tsonkezo hihvu hi digü le zo nne kvu tila?

¹⁰ Ai temi kemu jü pe tsülo nrün kazü hinyu Temi Nyugü kekvu le kebin hagun no shalo kenyü genyu.” Tson-o a-le terotho gü ka,

¹¹ “Ale nka zoshü bin nyo, solo-o njü khisen-o nka ki gunlo chi!”

¹² Tsonshü ntsin a-le anyugun aphu mhundyü ka a-jü khisen chwila. Tsontsin anyugun aphu anyugun dunthyü, lo Sunggigü shwen-o, “Agun le thame kae hihontse kethyü hyu shwimvu.”

Levi Kokelo

¹³ Tsüsika a-le züda khoki ni gun zhü; lo temi dan aphu a-ki ryülo, tsontsin a-le tha zope anyugun senthyü shü.

¹⁴ Lo a-le tson gun kezhü ka, Alfia nyugü Levi le khajana keshvubin nyu kebin hyulo-o a-ka, “Asithenlo re.” Lo a-le solo njüo a-sithen tinla.

¹⁵ Lo tsüsika a-le temi tsügü ka nyu ho titseo binlo, lo tsünyu khajana keshvunyu lo kemunyu kechon le ryüo Jisu lo a-le senthyükelo nyu dan zen-o binlo; anyugun temi kechon le a-sithen kehü genyu.

¹⁶ Tsontsin lesükeshatsin nyu lo Farisinyu dan le a-le kemunyu khajana keshvunyu zen-o tyütsü kebin hyushü ntsin a-le senthyükelo ju ka, “A-le nyu thyüo khajana keshvu nyu lo kemunyu zen-o tyütsü hü nla?”

¹⁷ Lo Jisu le jotsü shalo ntsin tsüdan ka, “Kesherhün nyu le dawa keshanyu zengü thame kethyüi ndi, ai kehonyu genyu. Ale kentsen nyu mvule kemunyu kolo titse ryü.”

Nyen-o Kehikethyü Rüla

¹⁸ Johan sikethen nyu lo Farisinyu le nyen ryü; lo tsükatsü me le ryüo a-ka, “Nyuthyüo Johan sikethen nyu lo Farisinyu dan sikethen nyu dan we nyen hü, ai nsikethen nyu dan we tsühontse nyen hü mvula?” tson-o ketsoshü.

¹⁹ Jisu le anyugun ka, “Temi nme le tenulo-o ho kebin ka senhügü le anyugun zen kebin ka a-sin nyu ju no nyenlo gwa ole? Senhügü le anyugun zen kebin then tson loho.

²⁰ Ai a-gwünkho le ryü ti, lo anyugun le nyen-o rüshvu ti.

²¹ Temi nme-e phi keshün sengü phiren ge nkhvü kesin hümvu, tsonyatselo sen gü nkhvü keshü phi gü le ligü sürhenla ti, a-kon le a-keshün le a-ren sürhen lahü, tson-o nrhen nshvu kvu lahü.

²² Lo temi nme-e vain zü keshün pe thyügi tsun when ka shü hü mvu; tson yatselo thyügi tsun pvürhen lati, tson-o vain zü-e lo thyügi tsun-e nke lati; ai me le vain zü keshün pe thyügi tsun keshün ka shü hünyo.”

Senthyükelonyu Le Sabbath Jon Nyü Lopwe Nrhi Ketyü

²³ Tsüsika a-le Sabbath jon nme nyü me lojvü ki tsüjü laryü, a-le senthyükelo nyu ju le tsonchü nsen me lopwe nrhityü sola.

²⁴ Tsontsin Farisinyu dan le a-ka, “Hire, anyugun le nyuthyüo Sabbath jon nyü thyüzükemvu thyü hü nla?”

²⁵ Tsontsin a-le anyugun ka, “Nduka David le tha tyü nrün ndi kela ka lo nnyon kelo ka a-ko lo a-zen kehü nyu ju tse thyükethyü hagun le thame kae swüshwi mvu ole?

²⁶ A-le Abiathar le peshükeda thyü kebin ka Sunggigü ka nyu yüo peshü gü kemvu we tyü kethyü tejvü kemvu, pe me hi kehü tensü tyü, tson-o khipe a-zen kehünyu ju ko tsüo no tyü mvu ole?”

²⁷ Tson-o a-le anyugun ka, “Sabbath jon genyu temi thyüshü mvule, temi genyu Sabbath jon thyü keshü le.

²⁸ Tsügenyu Temi Nyugü le Sabbath jon so-e Npugü le.”