Sofonías 3 - Biblia en Quechua del norte de Conchucos

Jerusalén runakunata castigananpaq ninqan

¹ ¡Allaw mana cäsukuq Jerusalén runakuna! Qamkunam alläpa jutsasapa kayanki. Pïmaytapis alläpam sufritsiyanki.

² Qamkunaqa pï willayäshuptikipis manam wiyakuyankitsu. Corrigiyäshuptikipis manam cäsuyankitsu. Dios Yayamanpis manam confiakuyankitsu. Payta manam mañakuyllapis mañakuyankitsu.

³ Mallaqar qayaraykachaq leonkunanömi autoridänikikunapis kayan. Jueznikikunapis imayka mallaqashqa atuqkuna tullullantapis mana dëjaqnömi kayan.

⁴ Profëtaykikunapis mana respitakuq y llullakuqmi kayan. Sacerdötikikunapis sagrädu templutam impüruyätsiyan. Dios Yayapa leyninkunatapis manam cumpliyantsu.

⁵ Peru Dios Yayaqa imaypis Jerusalénchömi kaykan. Payqa manam imatapis llutankunata rurantsu. Cada alliqmi tantiyatsimantsik alli ruraq kanqanta. Peru tsaynö kaykaptinpis jutsa ruraq runakunam mana allikunata rurar penqakuyantsu.

⁶ Dios Yayam nin: <<Atska nacionkunatam ushakätsishkä. Törrinkunatapis juchutsirmi ushakätsishkä. Pipis manana puriptinmi cällinkunapis tsunyaraykan. Markankunapis llapanmi ushakashqa. Tsaychöqa manam ni pipis täkunnatsu.

⁷ Tsaypitam yarparqä: <Tsay nacionkunata ushakätsinqäta rikarmi Jerusalénchö täkuq runakuna noqapita mantsakur llutan ruraykunata dëjaskiyanqa. Cäsuyämaptinqa paykunata manam ushakätsishaqtsu>. Peru tsaynö yarpaykaptïpis paykunaqa jutsa rurayman churakashqam kayan>>.

⁸ Dios Yayam nin: <<¡Allaw tsay runakuna! Juzganä junaq imay karpis chämunqam. Llapan nacionkunata qorikaskatsirmi alläpa rabyatsiyämanqanpita castigashaq. Nina rupar imaykata ushaqnömi kay patsachö täkuqkunata ushakätsishaq>>.

Runakunata salvananpaq Dios Yaya äninqan

⁹ <<Tsaypitanam maytsaychö täkuq runakunata shutïchö alabayämänanpaq tantiyatsishaq. Tsaynöpam shumaq willanakur juk shonqulla serviyämanqa.

¹⁰ Mas karuchö täkuq runakunapis yanapanäpaqmi mañakayämanqa. Tsay runakunaqa Etiopía nacionchö mayukunapita mas karuchömi täkuyan. Tsaypitanam ofrendäkuna apayämunqa.

¹¹ Tsay witsaymi jutsata rurar kushikuqkunata qamkunapita qarqushaq. Sagrädu lömächö manam allish tukuqkuna kayanqanatsu. Tsaymi jutsata manana rurar penqakuyanqanatsu.

¹² <<Qamkuna täkuyanqaykichöqa qollmi shonqu y waktsa runakunallam täkuyanqa. Paykunam noqallamanna confiakayämanqa.

¹³ Israelchö kawaykar quëdaq runakunaqa mananam mana allikunata rurayanqanatsu. Paykunaqa mananam llullakuyanqanatsu ni pitapis engañayanqanatsu. Tranquïlu mikukuq üshakunanömi kayanqa. Manam ni pipis paykunata mantsakätsinqanatsu>>.

¹⁴ ¡Sión runakuna, cantayay! ¡Israel runakuna, kushikur qayaykachäyay! ¡Jerusalén runakuna, llapan shonquykikunawan kushikuyay!

¹⁵ Dios Yaya mananam castigayäshunkinatsu. Chikiyäshuqnikikunatam qarqunqa. Dios Yayam mandakuqniki rey. Qamkunawan kaykaptinqa manam imapitapis mantsakuyankinatsu.

¹⁶ Tsaymi Jerusalén runakunata niyanqa: <<Sión runakuna, mantsakuyanqaykipa rantin ¡valorakuyay!>>

¹⁷ Qamkunawanmi Dios Yaya kaykan. Poderösu kayninwanmi salvayäshunki. Kuyayäshurnikim mushuq kawayta qarayäshunki. Qamkunapaq alläpa kushikurmi

¹⁸ fiestata ruraqnö cantanqa. Dios Yayam nin: <<Manana ñakayänaykipaqmi yanapayäshayki. Manam penqakuypaqnatsu kayanki.

¹⁹ Tsay witsay sufritsiyäshuqnikikunatam kikï ushakätsishaq. Tsaypitam oqrakashqa üshata qorimuqnö maytsaypitapis qoriyämushayki. Pakikushqa üshata jampiqnömi jampiyäshayki. Manam ni pipis musyapäyäshunkinatsu. Masbienmi yanapayäshunki maytsaychöpis respitashqa y aläbashqa kayänaykipaq.

²⁰ Tsay witsaymi maytsaypita qoriyämushayki. Juklä nacionkunaman apayäshuqnikikuna rikaykäyaptin kutitsiyämuptiqmi pïmaypis kushikur respitayäshunki. Noqa Dios Yayam nï>>.