Sofonías 2 - Biblia en Quechua del norte de Conchucos

¹ Mana penqakuq Judá runakuna, jutsa rurayta dëjayänaykipaq llapayki qorikaykur yarpachakuyay.

² Dios Yaya rabyanqan junaq manaraq chämunqanyaq jutsa rurayta dëjayay. Mana dëjayaptikiqa imayka päjata wayra apar ushakätsinqannömi ushakätsiyäshunki.

³ Kay patsachö qollmi shonqu runakuna, Dios Yayata llapayki ashiyay. Mandamientunkunata cäsukuqkuna, mana allish tukurlla pay munanqannö kawakuyay. Tsaynö kawakuyaptikiqa talvezchi Dios Yaya rabyanqan junaq salvayäshunkiman.

Filisteo runakunata castigananpaq ninqan

⁴ Gaza markapis mana imakaq tsunyam tikranqa. Ascalón markapis jankatmi ushakanqa. Asdod markachö täkuqkunatam junaqpa suwapuyanqa. Ecrón markachö täkuqkunatam chapapita jachata tronqueaqnö jitariyanqa.

⁵ ¡Allaw! ¡Lamar kuchunchö täkuq filisteo runakuna, llakipaypaqmi kayanki! Castigayäshunaykipaqmi Dios Yaya nin: <<¡Canaánchö täkuq filisteo runakuna, chipyatmi ushakätsiyäshayki!

⁶ Lamar cercan chakrakunam wätakunata mitsikuyänan pastu tikranqa. Tsaychö üsha majädakunallanam kanqa>>.

⁷ Kawaykar quëdaq Judá runakunatam sïqa librina kawakuyänanpaq Dios Yaya yanapanqa. Paykunapaqna tsay chakrakuna kaptinmi wätankunata tsaychö mitsikuyanqa. Ascalónchö kaykaq wajikunachömi puñuyanqa.

Moabita y amonita runakunata castigananpaq ninqan

⁸ Dios Yayam nin: <<Noqam wiyashkä Moab nación runakuna y Amón nación runakuna kuyanqä runakunata asharnin qayapäyanqanta. Tsaynöllam wiyashkä kuyanqä runakunata allqutsakuyanqanta. Paykunaqa Judá runakunapa chakrankunata qechuskirmi rïcuyäyashqa>>.

⁹ Israel runakunata kuyaq y llapanta mandaq Dios Yayam jurar nin: <<Sodoma markanömi Moab nacionpis ushakanqa. Gomorra markanömi Amón nacionpis ushakanqa. Chakrankunachöpis kashallanam juntanqa. Wakin kaq chakrankunapis jankatmi qachpayanqa. Desiertunömi imaypis kanqa. Kawaykar quëdaq kuyanqä Israel runakunam paykunapa imaykankunatapis apayanqa. Allin kaq chakrankunatapis qechuskirmi tsaychö täkuyanqa. Tsay ninqäqa rasunpam kanqa>>.

¹⁰ Tsaynömi paykunata päsanqa alläpa allish tukuyanqanpita. Paykunam llapanta mandaq Dios Yaya kuyanqan Israel runankunata allqutsäkuyashqa.

¹¹ Kay patsachö adorayanqan dioskunata Dios Yaya ushakätsirmi Moab nación runakunata y Amón nación runakunata alläpa castiganqa. Tsaymi karu islakunachö täkuq runakunapis markankunachö Dios Yayatana adorayanqa.

Etiopía runakunata castigananpaq ninqan

¹² <<Etiopía runakuna, qamkunatapis espädäwanmi wañutsiyäshayki>>.

Asiria runakunata castigananpaq ninqan

¹³ Tsaynöllam Dios Yaya norti kaqlächö Asiria nación runakunatapis ushakätsinqa. Nínive markachö täkuq runakunata ushakätsiptinmi tsunya quëdanqa.

¹⁴ Tsay partim wätakunata mitsikuyänanllapaqna kanqa. Tukuyläya chucaru wätakunam tsaychö pärayanqa. Tukuwan akakallanam terantikunachö puñuyanqa. Tsaykuna waqanqanpis ventänapam wiyakämunqa. Punkukuna ushakaptinmi cedru tablawan entablayanqanpis rikakanqa.

¹⁵ Tsay markachö täkuq runakuna ima desgracia päsananpaq kanqanta manam ni ichikllatapis yarpäyantsu. Tsaymi shonqullankunachö niyan: <<Noqantsikpita masqa ¿piraq kanman?>> Tsaynö nikäyaptinpis markankunata ushakätsiptinmi chucaru wätakuna pärayänan raqällana kanqa. Tsayta rikarmi marka cercankunapa päsaqkunapis makinkunata taqllarraq kushipäyanqa.