Daniel 2 - Biblia en Quechua del norte de Conchucos

Mandakuq Nabucodonosor sueñunqan

¹ Ishkay watana Nabucodonosor rey kaykarmi yapay yapay tsayllata sueñurqan. Tsaymi alläpa yarpachakur puñuytapis puëdirqantsu.

² Sueñunqan imapaq kanqanta willayänanpaqmi rey qayatsirqan adivïnukunata, brüjukunata, suerti qatiqkunata y qoyllur estudiaqkunata. Llapan qayatsinqankuna puntanman qorikaskiyaptinnam

³ rey nirqan: <<Sueñunqä imapaq kanqanta mana musyarmi alläpa llakishqa kaykä>>.

⁴ Tsaymi tsay yachayyuq runakuna arameo idiömachö niyarqan: <<¡Qamlla imayyaqpis rey kaykullay! Sueñunqayki imapaq kanqanta willayänaqpaq willayämay>>.

⁵ Rey Nabucodonosornam nirqan: <<Manam willayaqtsu. Peru ima sueñunqäta y imapaq tsay sueñunqä kanqantapis mana willayämaptikiqa pedäzu pedäzu kutsuyäshunaykipaq y wajikikunatapis juchutsir ushayänanpaqmi mandashaq.

⁶ Peru mayqaykipis imata sueñunqäta y imapaq sueñunqä kanqanta willayämaptikim sïqa llapan runakuna respitayäshunaykipaq churayäshayki. Tsaynöllam imaykatapis qarayäshayki. Kanan sas willayämay imata sueñunqäta y sueñunqä imapaq kanqantapis>>.

⁷ Tsaynö niptinmi yapay niyarqan: <<Taytay rey, imata sueñunqaykitapis willayämaptikiqa sueñunqayki imapaq kanqantam willayäshayki>>.

⁸ Tsaymi rey Nabucodonosor nirqan: <<Manam willayaqtsu. Qamkunaqa tsay tumpallam tiempüta perdiykätsiyämanki.

⁹ Sueñunqäta mana willayämaptikiqa llapaykitam ushakätsiyäshayki. Qamkunam willanakuyashkanki llullatsiyämar engañayämänaykipaq. Tsay tumpallam tiempüta perdiykätsiyämanki. Kanan imata sueñunqätapis sas willayämay. Tsaynöpam musyashaq imapaq sueñunqä kanqantapis>>.

¹⁰ Tsaymi yachayyuq runakuna reyta niyarqan: <<Manam ni pipis kay patsachö kantsu imata sueñunqaykita willashunaykipaq. Mayjina poderösu reypis adivïnukunata, brüjukunata o qoyllur estudiaqkunata mañakayämanqaykinö mañakushqatsu.

¹¹ Taytay rey, alläpa ajatam mañayämanki. Tsaytaqa manam runa musyantsu, sinöqa dioskunallam. Peru paykunaqa manam noqantsikwantsu kaykäyan>>.

¹² Tsaynö niyaptinmi rey alläpa rabyar ordenarqan Babiloniachö llapan yachayyuq runakunata jankat wañutsiyänanpaq.

¹³ Ordinta ruraskirmi entëru nacionman apatsirqan llapan yachayyuq runakunata wañutsiyänanpaq. Tsaymi Danieltawan compañërunkunatapis wañutsiyänanpaq ashitsirqan.

¹⁴ Tsay ordinwanmi reyta cuidaq soldädukunapa capitannin aywarqan Babiloniachö yachayyuq runakunata wañutsinanpaq. Tsay runapa shutinmi Arioc karqan. Daniel kaqman chaykuptinmi shumaq yarpachakuskir

¹⁵ Daniel nirqan: <<¿Imatan kashqa rey apurädu tsaynö ordenananpaq?>> Tsaynam Danielta Arioc willarqan imanöpa wañutsiyta munanqanta.

¹⁶ Tsaymi Danielqa rey Nabucodonosorman aywaykur rugakurnin nirqan: <<Taytay, sueñunqayki imapaq kanqanta willanaqpaq ichikllata shuyaykamay>>.

¹⁷ Tsaypita wajinman Daniel kutiskirmi Ananíasta, Misaelta y Azaríasta willarqan rey imanir yachayyuq runakunata wañutsiyta munanqanta.

¹⁸ Tsaymi paykunata nirqan: <<Ciëluchö Dios Yayata mañakuykuyay rey imata sueñunqanta tantiyatsimänanpaq. Mana tantiyatsimaptinqa Babilonia nacionchö yachayyuq runakunata y noqantsiktam wañutsimäshun>>.

¹⁹ Tsay paqasmi Danielta Dios Yaya revelarqan Nabucodonosor imata sueñunqanta y imapaq sueñunqan kanqanta. Tsaymi Danielqa ciëluchö kaykaq Dios Yayata alabarnin

²⁰ nirqan: <<Dios Yaya, imaypis alabashqa kaykullay. Qampitam yachaypis poderpis shamun.

²¹ Qam munaptikim imaykapis päsan. Qammi tiempukunatapis kamakätsinki. Reykunatapis qammi churanki y cambianki. Yachayyuqkunatapis mas yachaytam qaranki. Yachayyuqkunatapis masmi tantiyatsinki.

²² Pipis mana musyanqantam qam tantiyatsinki. Qampaqmi llapanpis imayka aktsichönö.

²³ Unay castäkuna adorayanqan Dios Yaya, qamtam agradëcikur alabaq. Mañakunqaqta wiyamarmi yachayta qaramar shumaq tantiyatsimashkanki rey Nabucodonosor imata sueñunqantapis>>.

²⁴ Tsaypitam Danielqa Ariocwan parlananpaq aywarqan. Arioctam yachayyuq runakunata wañutsinanpaq rey ordenashqa karqan. Tsaymi payta Daniel nirqan: <<Taytay Arioc, Babiloniachö yachayyuq runakunata ama wañuykatsiytsu. Masbien reypa puntanman pushaykamay sueñunqan imapaq kanqanta willanäpaq>>.

²⁵ Tsaynö niptinmi Arioc jina höra Danielta rey kaqman pusharqan. Chaykatsirmi nirqan: <<Tayta rey, Judápita prësu apamunqantsik runakunachömi tarishkä juk yachayyuq jövinta. Paymi willashunki sueñunqayki imapaq kanqantapis>>.

²⁶ Tsaynam Beltsasar shutiyuq Danielta Nabucodonosor tapurqan: <<¿Rasunpaku qam willamanki imata sueñunqäta y imapaq sueñunqä kanqanta?>>

²⁷ Danielnam nirqan: <<Taytay rey, sueñunqaykita ¿piraq tantiyatsishunkiman? Manam yachayyuqkuna, brüjukuna, adivïnukuna ni suerti qatiqkunapis puëdiyanqatsu.

²⁸ Peru tsaynö kaptinpis ciëluchö Dios Yayam runa mana tantiyanqanta revelan. Tsaymi pay sueñuynikichö musyatsishushkanki shamuq watakuna imanö kananpaq kanqanta. Kananmi willashayki sueñunqaykichö imata rikanqaykitapis.

²⁹ <<Tayta rey, cämaykichö ujuraykarmi waray warantin ima päsananpaq kaqta yarpachakurqayki. Tsaymi puñuykaptiki imapis päsananpaq kaqta Dios Yaya revelashushkanki.

³⁰ Manam wakin kaq runakunapita mas yachayyuq kaptïtsu tsay sueñunqaykita musyatsimashqa, sinöqa imapaq kanqanta musyanaykipaqmi.

³¹ <<Tayta rey, sueñuynikichömi runanö jatun monumentuta rikashkanki. Tsay monumentum mantsaypaq chipakyarraq puntaykichö ichiraykarqan.

³² Umanmi qoripita karqan. Pëchun y rikrankunam yuraq qellaypita karqan. Pachan y titaq chankankunanam broncipita karqan.

³³ Qonqurninpita utsuputunyaqmi fiërrupita karqan. Chakinkunanam kuwashqa mituwan tallushqa fiërrupita karqan.

³⁴ <<Rikaraykaptikim illaqpita juk rumi tsay monumentu kaqman kuchpakämurqan. Pipis mana qarpaykämuptinmi tsay rumi kuchpakämurqan. Fiërrupita y mitupita rurashqa chakinman chaykurmi tsay monumentuta pakirqan.

³⁵ Tsaymi mitupita, fiërrupita, broncipita, yuraq qellaypita y qoripita monumentuta ñutuskatsirqan. Usya witsay ërachö trïguta trïllaptin polvu tikraqnömi tsay monumentupis polvu tikrarqan. Tsay polvuta wayra apaptinmi ni imapis quëdarqannatsu. Peru monumentuta ñututsiq rumim sïqa jatun jirka tikrar entëru munduman juntarqan.

³⁶ <<Tayta rey, tsaytam sueñushkanki. Imapaq kanqantam kanan tantiyatsishayki.

³⁷ Ciëluchö Dios Yayam llapan reykunapitapis mas poderösu y pïmaypitapis mas respitashqa kanaykipaq churashushkanki.

³⁸ Tsaynöllam podernikiman churamushqa maytsaychö täkuq runakunata, llapan wätakunatawan llapan päriqkunata. Dios Yayam churashushkanki paykunapa mandakuqnin kanaykipaq. Tsaymi sueñuynikichö rikanqayki monumentupa qori uman kanki.

³⁹ <<Mandakunqayki nacionkunatam juk nación venciskir poderninchö katsinqa. Peru tsay nacionmi mandakunqayki nacionpita mënus poderyuq kanqa. Tsaypitanam llapan nacionkunata mandananpaq juk nación shamunqa. Tsay nacionmi broncinö fuerti kar entëru munduta poderninchö katsinqa.

⁴⁰ Tsaypitanam juk nacionna llapan nacionkunata venciskir mandanqa. Tsay nacionmi fiërrunö fuerti kanqa. Fiërru imatapis pakir ushakätsinqannömi tsay nacionpis wakin kaq nacionkunata jankat ushakätsinqa.

⁴¹ <<Taytay rey, runanö monumentupa chakinkuna fiërrupita y kuwashqa mitupita kaykaqtam rikashkanki. Tsayqa tsay ultimu kaq nación runakuna juk yarpaywan kar rakikashqa kayänanpaq kanqanmi. Tsaynö kaykarpis fiërrunö fuertim kanqa.

⁴² Chaki dëdunkuna fiërrupita y mitupita kanqannömi tsay nacionpis abësisqa fiërrunö fuerti kanqa y abësisqa mitunö débil kanqa.

⁴³ Fiërruwan mitu chakinkuna tallukäyanqanta rikanqaykinömi tsay nacionpa mandakuqnin reykunapis poderninchö kaykaq reykunawan pactuta rurayanqa yanapanakuyänanpaq. Peru tsaynö rurarpis fiërruwan mitu mana tallukanqannömi tsay nación runakunapis tallukayta puëdiyanqatsu.

⁴⁴ <<Tsay reykuna mandakuyanqan witsaymi ciëluchö kaykaq kikin Dios Yaya mandakur qallaykunqa. Paypa mandakuyninqa manam imaypis ushakanqatsu ni paytaqa manam pipis vencinqatsu. Tsaynöllam imayyaqpis mandakuq kar wakin kaq mandaqkunata wañutsinqa.

⁴⁵ Tsaynö kananpaqmi sueñuynikichö rikashkanki jirkapita kuchpakämuq rumita. Tsay rumi pipis mana qarpaykämuptin kuchpakämurmi fiërrupita, broncipita, yuraq qellaypita, mitupita y qoripita monumentuta ñututsishqa. Taytay rey, tsaynö kananpaqmi Dios Yaya revelashushkanki. Tsaynömi päsanqa tiempu chämuptin. Tsay sueñunqaykiqa rasunpam päsanqa. Imapaq kanqanta willanqaqpis rasunpam>>.

⁴⁶ Tsaynam rey Nabucodonosor urkunpis patsaman chanqanyaq Danielpa puntanman qonqurikuykurqan. Tsaypitanam ordenarqan tsaki mikuy ofrendakunata paypaq churayänanpaq y inciensiuta qoshnïtsiyänanpaq.

⁴⁷ Nabucodonosornam Danielta nirqan: <<Servinqayki Diosmi llapan dioskunapa Diosnin y llapan reykunapapis mandaqnin rey. Llapan ima päsananpaq kaqtapis revelaq karmi imapaq sueñunqätapis willamänaykipaq revelashushkanki>>.

⁴⁸ Tsaypitanam entëru Babilonia provinciachö gobernador kananpaq Danielta rey churar imaykata qararqan. Tsaynöllam yachayyuq runakunapa mandakuqnin kananpaq churarqan.

⁴⁹ Reytam Daniel mañakurqan Sadracta, Mesacta, Abed-neguta Babilonia provinciakunachö mandäsinanpaq. Kikin Danielnam reypa palaciunchö quëdarqan.