Ester 2 - Teyta Diospa Willakïnin

Esterta reina kananpaq churanqan

¹ Piñakïnin pasariptinnam rey Asueruqa shonqupis nanëparaq warmin Vastipaq yarpakurkurqan. Jina yarparqanmi nöpanman Vasti mana witinanpaq juk leyta rurashqantapis.

² Tsënö llakikushqanta musyarirmi yanapaqninkuna kënö niyarqan: <

³ Mandakushqëki cada provinciakunachö nunakunata churashun tsë shipashkunata akrëkur pushayämunanpaq. Susaman chëkatsimur pushayätsun podernikichö këkaq warmikuna täräyashqan palasyïkiman. Tsëchönam confiakushqëki eunucu Hegaipa makinman churashun wakin warmikikunata cuidashqannölla pëkunatapis cuidananpaq. Tsë shipashkuna mas kuyëllapaq kayänanpaq ima wanashqantapis Hegai alistaputsun.

⁴ Pëkunapitam mëqan shipashtapis kuyëllapaq kaqta akranki Vastipa rantin reina kananpaq>>. Tsënö niyaptinnam rey Asuero kushikur käyitsiyashqannölla shipashkunata apayämunanpaq ordenarqan.

⁵ Susa markachömi Israel nuna Jairpa tsurin Mardoqueo täkurqan. Jairpa tëtanmi karqan Simei. Simeipa tëtanmi karqan Cis. Pëkunaqa Benjamín trïbu nunakunam kayarqan.

⁶ Mardoqueutam atska nunakunatawan rey Nabucodonosor prësu apakurqan Jerusalénpita Babilonia nacionman. Pëkunatawanmi Judá nacionpa reynin Jeconíastapis prësu apakurqan.

⁷ Mardoqueupam prïma panin karqan Hadasa shutiyuq shipash. Pëpa juk kaq shutinmi karqan Ester. Pëqa kuyëllapaq alli shipashmi karqan. Esterpa tëtan y mamänin wanukïkuptinmi Mardoqueuqa legitimäkur tsurintanö wätakurqan.

⁸ Rey Asuero ninqannöllam Susa markaman shipashkunata ëllïkur reypa palaciunman apayarqan. Tsëpitanam tsë shipashkunata y Estertapis Hegaipa makinman churayarqan cuidananpaq.

⁹ Esterwan yachanänakurmi Hegaiqa mas kuyëllapaq kananpaq ima wanashqankunatapis alistaparqan y alli mikïkunata qararqan. Tsëpitanam mas confiakushqan qanchis warmikunata ordenarqan Esterta shumaq atiendiyänanpaq. Tsë qanchis warmikunata y Estertam pusharqan palaciuchö këkaq mas allin kaq cuartukunaman tsëchö täräyänanpaq. Tsë cuartukuna karqan reypa warminkuna y concubïnankuna täräyashqan palaciuchömi.

¹⁰ Mardoqueo willapashqa kaptinmi Esterqa willakurqantsu Israel warmi kashqanta.

¹¹ Ester imanö këkashqantapis musyananpaqmi warmikuna täräyashqan palaciu patiu punkuman Mardoqueo ëwaraq.

¹² Tsë palaciuchömi llapan shipashkunata kuyëllapaq kayänanpaq juk wata shumaqyätsir altsapäyaq. Tsënöllam mïrrawan takushqa aceitiwan joqta killa llushikuyaq. Tsëpita joqta killa masmi crëmakunawan y perfümikunawan llushikuyaq. Tsëpitanam turnunkuna chäriptin rey Asueruman ëwayaq.

¹³ Täräyashqan wayipita reypa palaciunman ëwayaptinmi mas shumaqllan kayänanpaq ratashkunatapis y alhäjakunatapis alistayäpuq.

¹⁴ Rey Asueruwan punushqanpita waränin qoyanam reypa concubïnankuna täräyashqan kaq cuartukunamanna shipash ëwaq. Tsëchömi Saasgaz shutiyuq eunucu nunana pëkunata atiendiq. Pëqa rey markäkushqan nunam karqan. Mëqan shipashpis rey Asueruman manam kutiyaqtsu kikin mana qayatsiptinqa. Kuyashqan kaqllatam mëqan shipashtapis qayatsiq.

¹⁵ Tsëpitanam Mardoqueupa prïma panin Esterta tocarqan rey Asuerupa nöpanman ëwananpaq. Esterqa Abihailpa tsurinmi karqan. Tsënö ëwarmi mas shumaqllan kananpaq Esterqa yakakurqan eunucu Hegai ninqan kaqkunallata. Alli shipash kaptinmi Estertaqa llapanpis kuyayaq.

¹⁶ Qanchis watana rey këkaptinmi chunka kaq killachö Esterta apayarqan rey Asuero kaqman. Tsë killapa shutinmi Tebet.

¹⁷ Esterta rikëkurmi rey Asueruqa alläpa kuyëkurqan. Pëtanöqa manam mëqan shipashtapis kuyarqantsu. Tsëmi Estertana Vastipa rantin reina kananpaq corönata yakatsirqan.

¹⁸ Reina kananpaq Esterta churarmi rey Asueruqa fiestata rurarqan. Tsë fiestamanmi yanapaqninkunatapis y sirwiqninkunatapis qayatsirqan. Kushikurmi mandakushqan provinciakunachö impuestutapis bäjatsirqan. Tsënöllam atska qarëkunata nunakunata qararqan.

¹⁹ Concubïnankuna täkuyänan cuartukunachö täräyänanpaq shipashkunata pushëkashqan witsanmi reypa yanapaqninkuna täräyashqan punkuchö Mardoqueo tëkarqan.

²⁰ Mardoqueo yachatsishqannöllam Esterqa willakurqantsu Israel warmi kashqanta. Mardoqueupa makinchö këkar cäsushqannöllam imëpis Esterqa pëta cäsukuq.

Rey Asuerupa contran trätuta rurayanqanta Mardoqueo musyarinqan

²¹ Juk kutinam reypa yanapaqninkuna täräyashqan punkuchö tëkar Mardoqueo musyarirqan rey Asueruta wanuratsiyänanpaq ishkaq nunakuna alläpa piñashqa parlëkäyashqanta. Tsë nunakunaqa kayarqan Bigta y Teresmi. Pëkunaqa kayarqan tsë punku täpaq soldädukunapa capitanninkunam.

²² Tsënö parlayashqanta musyarirmi Mardoqueuqa Esterta willarqan. Tsëtanam Esterqa rey Asueruta willar nirqan: <>.

²³ Tsënö parlayashqanta shumaq musyarirnam rey Asueruqa tsë ishkaq nunakunata wanuratsir qeruman ayanta turkutsirqan. Tsëpitanam tsëkuna pasakushqanta rey qellqatsirqan acta libruman.