PROVERBIOS 3 - Diospa Simin Qelqa

Kasukuq kanapaq anyakuykuna

¹ Churilláy, ama yachachikuy simiykunata qonqapuychu, kamachikuyniykunata sonqoykipi waqaychay,

² chaymi unayta kawsanki, anchatapunin t'ikarinki.

³ Munakuynillayoqpuni kashay, cheqaqllapipuni kashay, chay hina kawsaytaqa rikuchishallaypuni, chaykunataqa sonqoykipi yuyashallaypuni.

⁴ Hinan allin qhawarisqapas “allinmi” nisqapas kanki, Diospa ñawpaqenpipas runakunaq qayllanpipas.

⁵ Tukuy sonqoykiwan Señor Diosman hap'ipakuy, amataq qan kikiykiq yuyayniykimanqa k'askakuychu.

⁶ Tukuy ruwasqaykikunapi Señor Diosta yuyariy, paymi cheqan ñanninta pusasunki.

⁷ Ama yuyaykuychu yachaysapa kasqaykita, Señor Diosta manchakuspa mana allinmanta t'aqakuy.

⁸ Cuerpoykipaqmi hampi kanqa, tulluykikunapaqmi qhali-kay kanqa.

⁹ Señor Diosta tukuy kaqniykikunawan yupaychay, hinallataq chakraq rurusqan ñawpaq hoqarisqaykikunawanpas,

¹⁰ chaymi taqeykikunaqa mikhuywan hunt'a kanqa, vino waqaychanaykikunapas phoqchinqaraq.

¹¹ Churilláy, Señor Diospa wanachiynintaqa ama pisichaychu, amallataq anyaykuyninwanpas amikuychu.

¹² Payqa pitachus munakusqantan wanachin, imaynan huk taytapas munakusqan churinta wanachin hinata.

¹³ Kusisamiyoqmi yachayta tariq runaqa, allin yuyaytapas tariq runaqa.

¹⁴ Yachayqa qolqeq interesninmantapas aswanraqmi, qorimantapas aswantaraqmi qhapaqyachin.

¹⁵ Umiñakunamantapas aswan chaniyoqmi yachayqa, manan ima munasqaykipas yachaymanqa aypanmanchu.

¹⁶ Paña makinwanmi unay kawsayta haywarimusunki, lloq'e makinwantaq qhapaq kaytapas samitapas haywarimusunki.

¹⁷ Yachayqa sumaq ñanninkunatan pusasunki, payqa thak-kaypin kawsachisunki.

¹⁸ Yachayqa kawsay sach'a hinan chayta chaskikuqkunapaqqa, kusisamiyoqmi yachayman k'askakuqkunaqa.

¹⁹ Señor Diosqa yachaywanmi kay pachata teqsicharqan, yuyaywanmi hanaq pachata allinta sayachirqan.

²⁰ Yachayninwanmi lamar-qochata rakirqan, phuyumantapas iphuchimurqan.

²¹ Churilláy, allin reparayta allin yuyaykukuyta waqaychay, ama chaykunataqa qonqapuychu,

²² allintan kawsachisunki, kunka walqana hinataqmi sumaqchasunki.

²³ Chaypachan mana manchaspa purinki, manataqmi misk'akunkipaschu.

²⁴ Puñuspaykipas manan manchakunkichu, siriykuspaykipas misk'itan puñunki.

²⁵ Aman qonqaylla mancharichiqta manchakunkichu, amallataq millay runakunaman muchuna chayamuqtinpas manchakunkichu,

²⁶ Señor Diosmi qayllaykipi kashanqa, paymi mayt'ukunaykimanta waqaychasunki.

²⁷ Yanapayta atispaykiqa yanapana runata yanapaykuy.

²⁸ Imachus qonaykipaq makiykipi kashaqtinqa, ama runamasiykita niychu: Ripuy, kutimunkiña, paqarinña qosqayki, nispaqa.

²⁹ Wasimasiyki qayllaykipi tiyaspa qanpi hap'ipakuqpaqqa ama pay contra mana allinkunata yuyaykuychu.

³⁰ Ama pitapas yanqapuniqa quejaychu, manataq pipas mana allinta ruwashasuqtiykiqa.

³¹ Ama envidiakuychu runa maqaq runata, amataq imaynatachus kawsasqanta hinaqa kawsaychu.

³² Señor Diosqa waqllisqa runakunatan millakun, chanin runakunawantaq sonqota tupachin.

³³ Señor Diosqa millay runaq wasintan ñakan, chanin runaq familiantataq saminchan.

³⁴ Señor Diosqa burlakunmi burlakuqkunamanta, k'umuykukuqkunatan ichaqa sumaqta qhawarin.

³⁵ Señor Diosmi yachayniyoqkunata hatunchan, mana yuyayniyoqkunatataq p'enqachin.