DANIEL 2 - Diospa Simin Qelqa

Rey Nabucodonosorpa mosqokusqan

¹ Iskaykaq watapi kamachikushaspanmi Nabucodonosorqa mosqokurqan, hinaspan hawapi-ukhupi sonqoyoq karqan, manañataq puñuypas aysarqanchu.

² Chaymi reyqa waqyachimurqan yachayniyoqkunata, watuqkunata, layqakunata, ch'askata qhawaspa watuqkunatawan, mosqokusqanta payman sut'inchanankupaq. Paykunan hamuspa reypa ñawpaqenpi sayaykurqanku.

³ Reytaq paykunata nirqan: –Mosqokusqaymantan, hawapi-ukhupi sonqoyoq kashani, chay mosqokusqaytan yachayta munashani, nispa.

⁴ Hinan ch'askata qhawaspa watuqkuna arameo rimaypi reyta rimapayarqanku: –¡Wiñaypaq reyqa kawsachun! Mosqokusqaykita kamachiykikunaman willawayku, ñoqaykutaq imachus kasqanta sut'inchapusqaykiku, nispa.

⁵ Reytaq paykunata nirqan: –Allintañan yuyaykuni, manachus mosqokusqayta willawankichis, imachus kasqantapas manachus sut'inchapuwankichis chayqa, kuchurqarisqan kankichis, wasiykichispas thunisqan kanqa.

⁶ Ichaqa mosqokusqaytachus willawaspaykichis sut'inchapuwankichis chayqa, qokuykunatan premiokunatawan qosqaykichis, anchatan hatunchasqaykichispas. Chhaynaqa, imatachus mosqokusqayta willawaychis sut'inchapuwaychistaq, nispa.

⁷ Hinan paykunaqa huktawan nirqanku: –Mosqokusqaykita willawayku, ñoqaykutaq sut'inchasqata willasqaykiku, nispa.

⁸ Reytaq paykunata nirqan: –Ñoqaqa reparashaykichispunin tiempo pasachiy munasqaykichista, yachankichisñan allintaña yuyaykusqayta.

⁹ Manachus mosqokusqayta willawankichis chayqa, llapaykichispaqmi kaqkama muchuchiy kashan. Cheqaqtapunin rimanakushankichis llullakuspa q'otuwanaykichispaq, imapas kaqtin qollunanta suyaspaykichis. Chhaynaqa, mosqokusqayta willawaychis, ahinapin yachasaq sut'inchapuwayta atisqaykichista, nispa.

¹⁰ Ch'askata qhawaspa watuqkunataq reyman kutichirqanku: –Manan kay pachapiqa runa kanchu reypa mañakusqanta sut'inchayta atinanpaq. Manallataqmi mayqen reypas, munayniyoqña atiyniyoqña kaspapas chay hinataqa tapurqanchu mayqen layqatapas, watuqtapas, ch'askata qhawaspa watuqtapas.

¹¹ Reypa mañakusqanqa sinchi sasan, manan pipas kanchu reypa chay mosqokusqanta sut'inchayta atinanpaq, aswanpas dioskunallan atinman, chaykunaqa manan runa ukhupichu tiyanku, nispa.

¹² Chaymi reyqa k'araktapuni phiñakurqan, hinaspan kamachikurqan Babilonia suyupi chay yachayniyoqkunata llapanta wañuchinankupaq.

¹³ Yachayniyoqkunata wañuchinapaq kamachikuy simi unanchasqa kashaqtintaq, Danieltapas amigonkunatapas wañuchinankupaq maskharqanku.

Reypa mosqokusqanta Danielpa sut'inchasqan

¹⁴ Reypa guardia capitannin Arioc Babiloniapi yachayniyoqkunata wañuchinanpaq lloqsiqtinmi, Danielqa payta yachaywan allin yuyaywan rimapayarqan:

¹⁵ –¿Imanaqtinmi reyqa chay hina kamachikuyta usqhaylla kamachikun? nispa. Chaymi Ariocqa Danielman sut'inta willarqan.

¹⁶ Hinan Danielqa reypata rispa valekurqan suyaykunanpaq, ahinapi reypa mosqokusqanta payman sut'inchananpaq.

¹⁷ Hinaspan Danielqa wasinta ripuspa amigonkuna Ananiasman, Misaelman, Azariasmanwan chayta willamurqan.

¹⁸ Hinaspan paykunata nirqan usqhaylla mañakunankupaq. Hanaq Pacha Diosqa khuyapayaspa reypa mosqokusqanta sut'inchananpaq. Ahinapi Danielpas amigonkunapas chay wakin Babilonia yachayniyoqkunawan kuska mana wañuchisqa kanankupaq.

¹⁹ Hinan Diosqa rikhuriypi chay tuta Danielman reypa mosqokusqanta sut'incharqan, chaymi Danielqa Hanaq Pacha Diosta yupaychaspa

²⁰ nirqan: –Diospa sutinqa wiñay-wiñaypaq yupaychasqa kachun, payqa yachayniyoqmi atiyniyoqmi.

²¹ Paymi tiempokunatapas mitakunatapas chayachimun, paymi reykunataqa wikch'unpas churanpas. Paymi yachayniyoqkunamanpas yachayta qon, yuyayniyoqkunamanpas yuyayta qon.

²² Paymi sasa yachaykunatapas pakasqakunatapas sut'inchan, paymi imachus laqhayaqpi kaqtapas yachan, payqa k'anchaypin kashan.

²³ Ñawpa taytaykunaq Diosnin, qantan agradecekuykipas yupaychaykipas, yachaytan kallpatan qowarqanki. Kunanmi mañakamusqaykuta yachachiwanki, reypa mosqokusqantan rikuchiwankiku, nispa.

²⁴ Reyqa Arioctan kamachisqa Babiloniapi yachayniyoqkunata wañuchinanpaq, hinan Danielqa Ariocpata rispa nirqan: –Yachayniyoqkunataqa ama wañuchiychu, reyman pusaway, ñoqan paypa mosqokusqanta sut'inchapusaq, nispa.

²⁵ Hinaqtinmi Ariocqa Danielta reyman usqhaylla pusarqan, hinaspan reyta nirqan: –Judamanta apamusqakuna ukhupin huk qharita tarimuni, paymi mosqokusqaykita sut'inchapusunki, nispa.

²⁶ Hinan reyqa Beltsasar nisqa Danielta nirqan: –¿Atiwaqchu mosqokusqayta willawayta sut'inchapuwayta? nispa.

²⁷ Chaymi Danielqa reyta nirqan: –Reypa pakasqa yachay munasqantaqa yachayniyoqkunapas, watuqkunapas, layqakunapas, ch'askata qhawaspa watuqkunapas manan willayta atinkumanchu.

²⁸ Ichaqa pakasqa yachaykunata sut'inchaq Diosmi hanaq pachapi kashan, paymi willarqasunki qhepa p'unchaykunapi imaynachus kananta. Puñushaspa mosqoyniykipi rikusqaykikunatan willasqayki.

²⁹ Reyníy, puñunapi kashaspaykin yuyaykusqanki qhepa tiempopi imaynachus kananta, hinan pakasqa yachaykunata sut'inchaqqa imaynachus kananta rikuchirqasunki.

³⁰ Ñoqamantaq chay pakasqa yachayta Diosqa sut'inchawan, manan runamanta aswan yachayniyoq kasqayraykuchu, aswanpas qanman sut'inchasqata willanaypaqmi, sonqoykipi yuyaykusqaykikunata yachanaykipaqwanmi.

³¹ Qanmi, reyníy, hatunkaray runa rikch'ay ruwasqata ñawpaqeykipi sayashaqta rikushasqanki, chayqa k'anchashaqtaq sinchi manchakuytaqmi karqan.

³² Chaypa umanqa ch'uya qorimantan karqan, qhasqonwan makinkunawantaq qolqemanta, wiksanwan teqninkunawantaq broncemanta,

³³ chakankunan fierromanta, chakinkunataq wakin fierromanta wakintaq kanasqa t'urumanta.

³⁴ Qhawashaqtiykin huk ch'eqtasqa qaqa urmaykamurqan, ichaqa manan runaq ch'eqtasqanchu karqan, hinan fierroyoq kanasqa t'uruyoq chakinkunaman chayaspa ñut'urparirqan.

³⁵ Ñut'usqallataqmi karqan fierropas, kanasqa t'urupas, broncepas, qolqepas, qoripas. Hinan eray tiempopi ñut'u pajata hina wayraqa chaykunata phukurparirqan mana yupillankupas qhepanankama. Chay qaqataq teqsimuyuntinman hunt'aykuq orqo kapurqan.

³⁶ Chaymi chay mosqokusqaykiqa, kunantaq imachus kasqanta sut'inchapusqayki.

³⁷ Qanmi, reyníy, reykunaq reynin kanki. Hanaq Pacha Diosmi qorqasunki munaychakuyta, kamachikuyta, atiyta, hatunchasqa-kaytapas.

³⁸ Llapa runatapas uywakunatapas, phalaq animalkunatapas qanmanmi qorqasunki, tukuypi kamachikunaykipaqmi churarqasunki. Qanmi chay qori umaqa kanki.

³⁹ Qanpa qhepaykitan atiyniykimanta pisipacha atiyniyoq hatun suyu sayarimunqa. Hinamantataq bronce hina kinsakaq hatun suyu sayarimunqa, chay suyun kay pachantinta kamachinqa.

⁴⁰ Chay qhepatataq tawakaq hatun suyu fierro hina ch'ila kanqa. Imaynan fierroqa tukuyta p'akin ñut'un, ahinatan tukuy suyukunata p'akinqa ñut'unqa.

⁴¹ Fierroyoq kanasqa t'uruyoq chakinkunata dedonkunata rikurqanki chayqa, t'aqanasqa suyun kanqa. Imaynan fierrota kanasqa t'urutawan chhaqrusqata rikurqanki hinan, chay suyuqa kallpayoq kashaspapas manan fierro hina kallpayoqchu kanqa.

⁴² Chaki dedokuna fierroyoq kanasqa t'uruyoq kasqanrayku chay suyuqa wakin kallpasapa wakintaq pisi kallpayoq kanqa.

⁴³ Imaynan fierrota kanasqa t'urutawan chhaqrusqata rikurqanki, chay hinan casarakuy rimanakuykunawan huñukunqaku, ichaqa manan k'askanakunqakuchu, imaynan fierrowan kanasqa t'uruwan mana k'askanakunkuchu hinata.

⁴⁴ Chay reykuna kamachikushaqtinmi, Hanaq Pacha Diosqa mana hayk'aq thunikuq suyuta sayarichinqa, manataqmi wak suyuqa chayta kamachinqachu, aswanpas llapa suyukunatan ñut'uspa tukunqa, wiñaypaqtaq kanqapas.

⁴⁵ Rikurqankin mana runaq ch'eqtasqallan urmaykamuq qaqata, chay qaqan ñut'urqan fierrota, bronceta, kanasqa t'uruta, qolqeta, qoritawan. Chhaynatan Hatun Diosqa qanman rikuchirqasunki imaynachus qhepaman kananta. Mosqokusqaqa cheqaqmi, sut'inchasqapas cheqaqllataqmi, nispa.

⁴⁶ Hinaqtinmi rey Nabucodonosorqa qonqoriykukuspa Danielman pampakama k'umuykukurqan, hinaspan kamachikurqan sacrificiokunatapas payman haywanankupaq, inciensowanpas q'apachinankupaq.

⁴⁷ Hinaspataq Danielta nirqan: –Cheqaqtapunin Diosniykichisqa dioskunaq Diosnin, reykunaq Señornin, pakasqa yachaykunatapas sut'inchaq, atirqankin kay pakasqa yachayta sut'inchayta, nispa.

⁴⁸ Hinaspanmi reyqa Danielta qollana kamachikuqta churarqan, askhallaña qokuykunatapas qollarqantaq. Hinaspan payta churarqan, Babilonia provinciata kamachinanpaq, chay suyupi yachayniyoqkunaq qollanan kananpaqwan churarqan.

⁴⁹ Danielmi reyta valekurqan, chaymi reyqa Babilonia suyu kurak provinciapi kamachikuq kanankupaq churarqan Sadracta, Mesacta, Abed-negotawan. Danieltaq reypa kamachikunan wasipi wakin oficialninkunawan kasharqan.