Mateo 3 - Quechua Ancash New Testament

Juan Bawtistapa ministeryun

¹ Tsey junaqkunachow shamorqan Juan Bawtista predikarnin Judeapa chusyaqninchow,

² nirnin: “Wanakuyey, syelukunapa reynun witimushqanam.”

³ Keymi key peypaq profeta Isaias parlanqan, nenqannow: Chusyaqchow bos qayakoq: Señorpa náninta alistayey, náninkunata deréchayey.

⁴ I Juan bistishqa keykarqan kamellupa millwanpita, i kaporqan qarapita wachukun tseqllan tumareq; i mikunan karqan langostakuna i tuna mishki.

⁵ I Jerusalenpita, i llapan Judeapita, i Jordan llapan jiruroq markapita, nunakuna yarqayamorqan peyman

⁶ i peypa bawtisashqa kayarqan Jordan mayuchow, jutsankunata willakur.

⁷ Bawtisakiyninman atskaq farisewkuna i sadusewkuna shamoqta rikárirnam, nerqan: “¡Bíborakunapa kastan! ¿Pitaq yachatsiyáshorqonki safakiyta shamoq piñakiypita?

⁸ Rurayey, wanakiypa alli wayíninkunata,

⁹ i ama yarpáyeytsu kikikikunallachow: ‘Abrahamtam katsintsik teytapa.’ Noqam niyaq Dyos pwedinmi sharkatsimiyta Abrahampa tsurinkuna key rumikunapitapis.

¹⁰ Jáchapis churareykannam montikunapa jawanchow; tseymi, llapan monti mana alli wayí qoqtaqa wallushqam kanqa i ninaman jitashqa.

¹¹ Noqa rasonpam bawtisayaq yakuchow wanakiypaq; peru qepáta shamoqpata, llanqinllatapis apeyta manam meresitsu, noqapita mas pwedeqmi; peymi bawtisayáshunki Espiritu Santuchow i ninachow.

¹² Makinchowmi keykan jorkitan, i éranta pitsanqam; eyllunqam trigunta trójaman, i kayanqam pájata mana wiñey upeq ninachow.”

Jesuspa bawtisakiynin

¹³ Tseynam Jesús shamorqan Galileyapita Juanman Jordan mayuyaq, peypa bawtisashqa kananpaq.

¹⁴ Juannam munarqantsu, nirnin: —Noqam waná qampa bawtisashqa keyta, ¿i qam shamunki noqaman?

¹⁵ Peru Jesusnam yaskirqan peyta: —Kananqa jaqi, tseynowmi konbyenin llapan justisya kumplinantsik. Tseynam jaqirerqan.

¹⁶ I Jesús, bawtisashqa kanqanpitana, yakupita witsarqan; i kaq key syelukuna kichakárerqan, i rikarqan Dyospa Espiritunta palumanow urámoqta, i peyman shamorqan.

¹⁷ I juk bos syelupita, nimurqan: “Keymi key kuyey Tsuriy, peychowmi kushikiyni kapaman.”