Mateo 2 - Quechua Ancash New Testament

Mágukunapa adorakiynin

¹ Judea Belenchow Jesús yuririptin rey Eródispa junaqninkunachow, inti ya rqamunanpita shayámorqan Jerusalenman mágukuna,

² nishpa: —¿Judyukunapa reynin yurishqa, meychowtaq keykan? Inti yarqamunanchowmi qoyllurninta rikáyarqó, i shayámorqó adoraqnin.

³ Keyta wiyarirna, rey Eródis turbakárerqan, i tseynow Jerusalenchow nunakunapis.

⁴ I llapan prinsipal saserdotikuna qayatsishqa, i judyukunapa leynin yachatsikoqkuna, peykunata tapurqan Kristu meychow yurinan kanqanta.

⁵ Peykunam niyarqan: —Judea Belenchow; tseynowmi qellqashqa keykan profetapa:

⁶ I qam, Belen, Judá markapita, Manam ichikllantsu kanki Judápa pweblunkunachow; qampitam yarqonqa juk pushakoq, Israyel pweblútam mitsenqa.

⁷ Tseynam Eródis, mágukunata pakeyllapa qayarir, allillapa tapuparqan peykunata qoyllur imey yurishqanta;

⁸ i Belenman kacharirna nerqan: —Eywayey washata i alleqpa tapupakayámiy wamrapaq; i taririrna, musyatsiyamey, noqapis adoraq eywanápaq.

⁹ Peykuna, reyta wiyarirna, ewkuyarqan; kaq keymi inti yarqamunanchow rikáyashqan qoyllur peykunapa nowpanta eywaq, chárirna, wamra keykanqanchow párarerqan.

¹⁰ I qoyllurta rikárir, kushikuyarqan jatun kushikiywan.

¹¹ I wayiman yeykurirna, rikáriyarqan wamrata maman Maryatawan i qonquriykurna, adorayarqan; i tesorunkunata kicharirna, qareykunata qoyarqan: óruta, insensyuta i mírrata.

¹² Sweñíninkunachow rikátsikiypa willashqa kar Eródisman mana kutiyananpaq, kutikuyarqan markanta juk nánipa.

Egiptuman safakiy

¹³ Peykuna ewkuyanqanchownam, kaq key Señorpa juk angelnin Joséta yuriporqan sweñíninchow i nerqan: “Sharkiy, wamrata i mamanta apey, i Egiptuman safakiy, i tseychow key noqa nenqaqyaq; Eródismi ashinqa wamrata wanutsinanpaq.”

¹⁴ I pey, riyarkurna, ampipa wamrata i mamanta aparkur, ewkorqan Egiptuman,

¹⁵ i tseychow karqan Eródis wanunqanyaq; profetapa Señor nenqan kumplikánanpaq, nenqannow: Egiptupitam qayarqá Tsuriyta.

Wamrakuna wanutsi

¹⁶ Tseynam Eródis mágukunapa engañashqa rikakurir, piñakurkorqan allápa, i Belenchow i llapan jiruroqninkunachow ishkey watayoqpita ureypa kaq llapan wamrakunata wanutsiyánanpaq mandarqan, mágukunata tapunqan tyempumannow.

¹⁷ Tseynam tinkurerqan profeta Jeremias nenqan, nishqannow:

¹⁸ Ramáchow bos wiyashqa karqan, jatun llakikiy, waqey i jiwey; Rakel wawankunapaq waqan, i shoqashqa keyta munarqatsu, wanushqana kayaptin.

Egiptupita kuti

¹⁹ Eródis wanurenqanchowna, kaq key Señorpa juk angelnin sweñíninchow yuriporqan Joséta Egiptuchow,

²⁰ nirnin: “Sharkiy, apey wamrata mamantawan, i ewkiy Israyel markaman, wanuyashqanam wamrata wanutsi munaqkuna.”

²¹ Tseynam pey sharkurqan, i wamrata mamantawan aparkur, shamurqan Israyel markaman.

²² Teytan Eródispa rantin Judeachow Arkelao reynékanqanta wiyarirna, mantsarqan washaman eyweyta; peru sweñuchow rikátsikiypa willashqa kar, ewkorqan Galileya ládupa,

²³ i shamorqan i yacharqan Nasaret jutiyoq markachow, profetakunapa nishqan tinkunanpaq, nasarenu jutishqa kananpaq.