Marcos 2 - Quechua Ancash New Testament

Jesús kachakátsin juk paralítikuta

¹ Kapernaunman yapey yeykuriptin tsey junaqkunapita, wiyey karqan wayichow keykashqan.

² Atskaq eywayarqan peyman, punkuchowpis kichkikurkuyarqan; peynam parlaparqan palabrata.

³ Tseynam shayámorqan peyman juk paralítikuta apamurnin chuskoqpa wantushqa.

⁴ I peypa nowpanman chátsita mana pwedir allápa nunakuna kaptin, Jesús keykanqan wayipa jananta kichariyarqan i uchkurirna urátsiyarqan paralítikuta kirmachow iskareykaqta.

⁵ Jesusnam peykunapa kreyikiyninta rikárir nerqan paralítikuta: —Tsuri, jutseykikuna perdonashqanam.

⁶ Judyukunapa leynin yachatsikoqkunapita wakin tseychow teykáyarqan i shonqunkunachow yarpakachar:

⁷ —¿Imanirtaq key parlan keynow? ¡Maldisin! ¿Pitaq pwedin jutsakuna perdoneyta, sinowqa juklleylla kaq, Dyos?

⁸ Kikinkunallachow yarpakachayaptin Jesús espiritunchow mákurir nerqan: —¿Imanirtaq tseynow shonqiykikunachow yarpakachayanki?

⁹ ¿Imataq mas fasil, paralítikuta ni: “Jutseykikuna perdonashqanam” ó “sharkiy kirmeykita tsarirkur i ewkiy?”

¹⁰ Peru, musyayaneykipaq Nunapa Tsurinpaqa kapunmi awtoridánin jutsakunata key patsachow perdonanampaq—paralítikuta nerqan—:

¹¹ Qamtam neq: ¡Sharkiy, kirmeykita tsararkur wayikita ewkiy!

¹² I sharkurqan, tseyllana kirmanta tsararkur ewkorqan llapanpa nowpanpita, tseynowpana llapankuna almirakuyarqan i Dyosta glorifikáyarqan nirnin: —¡Manam imeypis keytanowqa rikarqontsiktsu!

Lebípa qayeynin

¹³ Yapeynam Jesús qocha kuchumpa yarqorqan, i llapan nunakuna peyman shayámoq, i peynam yachatserqan.

¹⁴ I pasareykarnam, rikárerqan Alfeyupa tsurin Lebita, kontribusyon kobrakunachow teykaqta, i nerqan: “Qatimey.” Tseynam sharkur qaterqan.

¹⁵ Susederqan Lebipa wayinchow Jesús mesachow teykaptin, atskaq publikánukuna i jutsasapakunapis teykayarqan mésachow Jesuswan i disípulunkunawan, atskaq qatiyashqa karnin.

¹⁶ Farisewkunapa ley yachatsikoqninkuna rikáriyar publikánukunawan i jutsasapakunawan mikoqta, disípulunkunata niyarqan: —¿Imanirtaq mikun publikánukunawan i jutsasapakunawan?

¹⁷ Wiyarirnam Jesús nerqan: —Sanukunaqa wanayantsu médikuta, sinowqa qeshyaqkunallam. Manam shamorqó justukunata qayaqtsu, sinowqa jutsayoqkunata.

Ayúnupaq tapukiykuna

¹⁸ Juanpa disípulunkuna i farisewkuna ayuneykáyarqan. Jesusman eywar niyarqan: —¿Imanirtaq ayunayan Juanpa disípulunkuna i farisewkunapapis, peru disípuliykikunaqa ayunayantsu?

¹⁹ Jesusnam nerqan: —¿Akasu ayuneyta pwediyanku kasamyentuchow nobyu peykunawan keykaptin? Nobyu peykunawanraq keykaptin, manam ayuneyta pwediyantsu.

²⁰ Peru shamonqam junaqkuna nobyu qochisqa kanqa. Tsey junaqnam ayunayanqa.

²¹ Manam pipis churantsu mushoq remyenduta makwa trájiman. Juknowpaqa, mushoq remyendu makwata sutarnin, mas rachikáratsin.

²² Manam pipis mushoq bínuta winantsu makwa qarabolsakunaman. Juknowpaqa binu rachiratsin qarabolsakunata, binu i qarabolsakunapis sirwiyanqanatsu. Mas alleqa, mushoq bínuta winantsik mushoq qarabolsakunaman.

Jesús: Sabadupa Señornin

²³ Susederqan Jesús jamakiy junaqchow paseykar murushqakunapa, i disípulunkuna eywareykar espigakunata kipchuyarqan.

²⁴ Farisewkuna niyárqan: —Rikey, ¿imanirtaq rurayan sabadukunachow mana ruranata?

²⁵ I peynam nerqan: —¿Manaku imeypis leyiyashqa kayanki Dabid i peywan kaqkuna mallaqáyarnin rurashqanta;

²⁶ imanowmi Dyospa wayinman yeykorqan, Abyatar apun saserdoti keykaptin, i mikorqan Dyospa Tantata, i qorqan peywan keykaqkunatapis; mana mikuna keykaptin, sinowqa saserdotikunallapaq?

²⁷ —Tseypitanam nerqan—: Jamakiy junaqqa rurashqa karqon nunapaqmi, i manam nunatsu jamakiy junaqpaq.

²⁸ Tseymi Nunapa Tsurinqa sabadupapis Señornin.