Efesios 5 - Quechua Ancash New Testament

¹ Kayey, Dyospa yachakoqnin kuyashqa tsurikunanow.

² Kuyakiychow puriyey, Kristu kuyamashqantsiknow i noqantsikkunapaq kikin entregakurqan, qarey i jipey Dyospaq pukutaq.

³ Peru lluta wátanakiy i llapan rakcha, ó mallaqákoq, ama jutitsayeyllapistsu qamkunachow; santukunata konbyenenqannow.

⁴ Ni mana alli parleykuna, ni upa keykuna, ni lluta parleykuna, mana konbyeneqkuna, mas alleqa grasyas rureykuna.

⁵ Keytaqa musyayankim, manam pí lluta wátanakoq, o rakcha o mallaqákoq, idulu kuyaq, erensyan kapuntsu Kristupa i Dyospa reynunchow.

Aktsipa tsurinkunapa portakiynin

⁶ Ama pipis engañayashiytsu mana báleq parleykunawan, keykunapam Dyospa piñakiynin shamun mana wiyakoq tsurikunaman.

⁷ Ama peykunawan ruraq kayeytsu.

⁸ Juk tyempuchow ampeqkuna kayarqeyki; kananqa aktsim kayanki Señorchow; puriyey aktsipa tsurinkunanow

⁹ (Espiritupa wayíninqa llapan alli keychow, rasonpa i alli rurey),

¹⁰ Señor gustashqanta probarnin.

¹¹ Ama partisipayeytsu mana wayíyoq ampeq rureykunachow, mas alleqa piñapáyey;

¹² penqakiypaqmi parleyllapis peykuna pakeyllapa rurayanqankuna.

¹³ Llapankuna, aktsipa rikakáratsishqa kaptin, rikakárayamun; aktsiqa rikátsikun llapantam.

¹⁴ Tseymi nin: “¡Riyakiy, qam punoq, i shárikiy wanushqakunapita, i Kristum aktsishunki!”

¹⁵ Rikáyey, yacheywan imanow puriyaneykita, ama upakunanowqa sinowqa yachéyoqkunanow,

¹⁶ tyemputa alleq probechar, junaqkuna mana alli kaptin.

¹⁷ Tseymi ama upakuna kayeytsu, sinowqa Señorpa muneynin reqeq.

¹⁸ Ama machayeytsu bínuwan, tseychowqa liryakimi kan; mas alleqa kayey Espiritupa juntashqa,

¹⁹ salmukunawan parlar, imnukunawan i espiritwal kantukunawan, kantashpa i alabashpa Señorta shonqiykikunachow;

²⁰ llapanchow imeypis Dyos i Teytata grasyasta qor, Señornintsik Jesukristupa jutinchow.

²¹ Sujetakuyey juknikikuna juknikikunawan Dyospa mantsakiyninchow.

Kristiyanu kastachow alli portakiy

²² Kasádakuna sujetakuyátsun kikinkunapa qowankunaman, Señormannow;

²³ qowaqa warmipa peqanmi, imanowmi Kristu iglesyapa peqan, i peymi kwerpun, i peymi, Salbadornin.

²⁴ Tseymi, imanowmi iglesya sujetashqa keykan Kristuman, tseynow kasádakunapis kayátsun qowankunaman llapanchow.

²⁵ Qowakuna, kuyayey warmikikunata, Kristu iglesyata kuyanqannow, i kikin entregakurqan peypaq,

²⁶ santifikánampaq, limpyuyáratsir yakuchow paqeypa palabrapa,

²⁷ kikimpaq chátsinampaq, gloryosu iglesyata, mana manchayoqta ni qentikashqata ni tsey rikoqta, sinowqa santata i manchannaqta.

²⁸ Tseynow qowakunapis warminkunata kuyayanman kikinkunapa kwerpunkunatanow. Warminta kuyaqqa, kikinmi kuyakun.

²⁹ Manam pipis kikimpa eytsanta ni imey chikishqatsu, sinowqa sirwinmi i kuydanmi, tseynowmi Kristupis Iglesyata,

³⁰ kwerpumpa miyemrunkunam kantsik, eytsampa i tullunkunapa.

³¹ Keyreykurmi ollqu jaqirenqa teytanta i mamanta, i warminman juntakanqa, ishkannam juk eytsalla kayanqa.

³² Jatunmi key pakaraq; noqaqa keyta ní Iglesyapaq i Kristupaqmi.

³³ Tseynow, qamkunapita kada únu kuyatsun warminta kikintanow; i warmi respetatsun qowanta.