Efesios 4 - Quechua Ancash New Testament

Juklla key, qareykuna i winey

¹ Noqam, Señorchow presu, rowayaq puriyey shumaq alli qayashqa kayanqeykinow,

² llapan qollmi i manshu keywan, pasyensyanakur juknikikuna wakinnikikunawan kuyakiychow,

³ listulla Espiritupa juknowlla keyninta wardarnin yamey keychow;

⁴ juk kwerpu, i juk espiritu, qayashqa kayanqeykichow juk shuyakiyllachow akrayashqeykimannow;

⁵ juk Señor juk kreyikiy, juk bawtismu,

⁶ juk Dyos i llapankunapa Teytan, peymi llapankunapa jananchow, i llapankunapaq, i llapankunachow.

⁷ Noqantsikta jukpayanmi qomarqontsik grasyata Kristupa qarakiy tupumpa.

⁸ Tseymi nin: Raraman eywarnin, aparqan présu présu keyta, I nunakunata qorqan qareyninkuna.

⁹ I tsey eywanqanqa, ¿imataq, sinowqa puntata urashqa karqan patsapa rurinkunaman?

¹⁰ Uraq kaq, tsey kikinllam eywarqan llapan syelukuna janampa llapanta juntanampaq.

¹¹ Pey kikinmi churarqan jukkunata, apostulkuna; jukkunatana, profetakuna; wakinkunata ebangelistakuna; i wakinkunatanam, pastorkuna i yachatsikoqkuna,

¹² santukunata alliyátsinampaq ministeryu rureypaq, Kristupa kwerpun winanampaq,

¹³ llapantsik chanqantsikyaq juklleylla kreyikiyman i Dyospa tsurin reqiman, juk alli ollquman, Kristupa tamáñunman chanqantsikyaq llapanchow:

¹⁴ Wamrakunanow mana anaweykacheykar kanapaq, tukiyláya yachatsikiywan meypapis apashqa, nunakunapa engañakiynimpa ulikur inishiyan astusyawan mana allikunata,

¹⁵ sinowqa rasonpa kaqta qatir kuyakiychow, winashun llapanchow peymi peqa, keymi key, Kristu,

¹⁶ peypam llapan kwerpu, alli jukjuntakashqa i jukllawashqa kikinpura llapan moqukunapa yanapanakuyan, kikin kada myemrupa rureyninkunamannow, chaskin wineyninta winanampaq kuyakiychow.

Mushoq nunapa kaweynin Kristuchow

¹⁷ Keytam ní i muná Señorchow: ama puriyeynatsu wakin gentilkunanowqa, yarpeyninkunapa muneyninchow pureqnow,

¹⁸ káyikiyninkuna ampishqa keykaptin, Dyospa kaweynimpita tumakashqa mana musyey peykunachow kaptin, chukru shonqukeyninpa;

¹⁹ tseykuna, llapan llakipakiyta oqrarir, entregakuyarqan eytsapa muneyninman mana teqñeyta rurayananpaq tukiyláya rakchata.

²⁰ Qamkunaqa manam tseynowtsu yachakuyarqonki Kristupita,

²¹ rasonpa wiyashqa karqa, peypa yachatsishqa kayarqonki, Jesuschow rasonpa keykanqannow.

²² Uney kaweynikikunapeqqa, qotukuyey awkis nunapita, yachakashqa keykan engañakoq muneykunamannow,

²³ trokakáyey káyikiynikikunapa Espirituchow,

²⁴ bistikuyey mushoq nunawan, Dyos rurashqanmannow justisyachow, i rasonpa santu keychow.

²⁵ Tseynowpa, ulikiyta qarqurir, parlayey kada únu rasonpa kaqta nuna mayikikunawan; kastanam kantsik juknintsikkuna juknintsikkunawan.

²⁶ Piñakuyey, peru ama jutsallakuyeytsu; inti ama jeqatsuntsu piñashqa keykáyaptikiy,

²⁷ ni dyabluta lugarnin qoyeytsu.

²⁸ Suwakoq kashqa karqa, ama suwakutsunnatsu, sinowqa uryatsun, makinkunawan allita rurar, jipaqkunata rakipánampaq.

²⁹ Ama lluta parleykuna yarqamutsuntsu shimikipita, sinowqa alli kaq yanapakiy wiñeypaq, wiyaqkunata grasyata qoyáneykipaq.

³⁰ Dyospa Espiritu Santunta ama llakitsiyeytsu, peypam sellashqa kayanki salbakiy junaqpaq.

³¹ Yarqutsun qamkunapita llapan asqaq, piñaney, piñakiy, qaparipákiy i maldisikiy, llapan mana alli yarpey.

³² Mas alleqa alli kayey juknikikuna juknikikunawan ankupákoqkuna, perdonanakur juknikikuna wakinnikikunawan, imanowmi Dyospis perdonayáshurqonki qamkunata Kristuchow.