Efesios 2 - Quechua Ancash New Testament

Grasyapa salbashqa

¹ Jutseykikunachowmi wanushqa keykáyarqeyki,

² tseykunachowmi puriyarqeyki juk tyempuchow, key mundupa muneyninta qatir, byentuchow apun mandakoqmannow, tsey espiritum kanan ruran mana wiyakoqkunachow,

³ keykunachowmi kawarqantsik noqantsikpis juk tyempuchow eytsantsikpa muneyninchow, eytsapa muneyninta rurar yarpeykunapita i Dyospa piñakiyninman churashqa karqantsik nuna keynintsikchow, wakinkunanow.

⁴ Dyosqa, kapoqyoqmi ankupákiychow, jatun kuyakiyninwan kuyamarqontsik,

⁵ noqantsik jutsachow wanushqa keykashqapis, kaweyta qomarqontsik Kristutawan. ¡Grasyapam salbashqa kayanki!

⁶ Peytawanmi kawaritsimarqontsik, tseynowlla tátsimarqontsik syelu markakunachow Kristu Jesuswan,

⁷ shamoq tyempukunachow rikátsikunampaq grasyampa atska kapoqninta noqantsikta allikeyninpa Kristu Jesuschow.

⁸ Grasyapam salbashqa kayanki kreyikiypa; keyqa manam qamkunapitatsu, Dyospa qareyninmi;

⁹ manam rureykunapatsu, pipis mana sumákunampaq.

¹⁰ Kikimpa rureyninmi kantsik, Kristu Jesuschow rurashqa alli rureykunapaq, keykunatam Dyos alistarqan uneypita tseykunachow purinapaq.

Kristuchow mushoq eyllukey

¹¹ Tseymi, yarpáyey juk tyempuchow qamkuna yuriyanqeykipita gentilkuna kayarqeyki. Mana sirkunsidashqa nishqa kayarqeyki judyukunapa peykunam sirkunsidashqa kayan. Sirkunsisyonpaq parlayanqanta nunakunam rurayan.

¹² Taqey tyempuchow Kristunnaqmi kayarqeyki, karupashqa Israyelita keypita i mana musyaq ánikiy paktukunapita, shuyakiyninnaq i Dyosninnaq munduchow.

¹³ Peru kananqa Kristu Jesuschow, qamkuna juk tyempu karuchow kayarqeyki, Kristupa yawarninpa witiykushqa kayarqeyki.

¹⁴ Kristum apamushqa yamey keynintsik, judyukunata i gentilkunata juk pweblullaman rurar, waniyninwan juchurqan rakeqninkuna perqata, keymi ninan chikinakiyta.

¹⁵ Judyukunapa leyninkunata ushakátserqan mandamyentunkunata rureyninkunatawan. Ishkey pweblupita jukllaman rurarqan peywan kayánanpaq. Tseynowmi rurarqan yamey keyta.

¹⁶ Kruspa amishtatsir Dyostawan ishkanta juk kwerpullaman, chikinakiykunata tseychow wanuratsir.

¹⁷ Shamorqan i willakorqan yamey keypa alli willakiyninkunata qamkuna karuchow keykaqkunapaq, i amánuchow kaqkunatapis;

¹⁸ peypam juknintsikkuna i wakinnintsikkunapis kapamantsik yeykiynintsik juk Espiritullapa Teytaman.

¹⁹ Tseymi manam jaqnatsu ni chámushqallatsu kayanki, sinowqa santukunapa markamayin, i Dyospa kastanchow myemrunkuna,

²⁰ profetakuna i apostulkuna perqakáyey perqa qallashqanman, kikin allikaq eskina rumi Jesukristu karnin,

²¹ peychow llapan wayi, alli churashqa, winan Señorchow santu templu kananpaq;

²² peychowmi qamkunapis perqashqa kayanki, Espirituchow Dyos yachananpaq.