Apocalípsis 2 - Quechua Ancash New Testament

Willakiy Efesu iglesyapaq

¹ “Qellqey Efesu iglesyachow angelman: Qanchis qoyllurkuna deréchanchow katseq, órupita qanchis kandelerukunapa chowpinchow pureq, keyta nin:

² Noqa reqiymi rureynikikunata, i sasa uryeynikita i pasensiyeykita; i manam awantankitsu mana allikunata, i probarqonkim apostulmi káya neqkunata, mana keykar, i tarirqonkim uli kayanqanta;

³ i jiparqonkim, i pasensiyeykim kapushorqonki, i sasam uryarqonki jutiyta kuyarnin, i manam utirqonkitsu.

⁴ “Peru kapamanmi qampa kontreyki, punta kaq kuyakiynikitam jaqerqonki.

⁵ Tseyreykur, yarpey, meypitam ishkirqonki, i ¡wanakiy! I punta kaq rureykunata rurey; mana tseyqa, shamushaq weyrallam qanman, i kandeleríkitam jorqushaq kashqanpita, mana wanakuptikiqa.

⁶ “Peru kapushunkim key, chikinkim nikolayitakunapa rureyninkunata, tseykunatam noqapis chikiy.

⁷ “Rinriyoq kaqqa, wiyatsun iglesyakunata Espiritu nenqanta. Benseqtaqa, kaweykaq montipitam qoshaq mikunanqaq, tseymi keykan Dyospa parayisun chowpinchow.

Willakiy Esmirna iglesyapaq

⁸ “I qellqey Esmirna iglesyachow angelman: Puntakaq i qepakaq, wanushqa karqan i kawarqan, keyta nin:

⁹ Noqam reqiy rureynikikunata, i jipeynikita, i waktsa keynikita (peru qamqa ríkum kanki), judyum ká neqkunapa maldesikininkunata, i mana keykayar, sinowqa satanaspa judyukunapa eyllukáyanan wayinmi.

¹⁰ Ama imachow mantsakiytsu jipaneykita. Keymi key, dyablum churayáshunki qamkunapita wakinnikikunata karselman, probashqa kayaneykipaq, i jipakiynikikunam kanqa chunka junaqpa. Fyel key waníkamayaq, i noqam qoshqeyki kawey koronata.

¹¹ “Rinriyoq kaqqa wiyatsun iglesyakunata Espiritu nenqanta. Benseq kaqqa, manam jipanqatsu qepakaq waniyta.

Willakiy Pergamu iglesyapaq

¹² “I qellqey Pergamu iglesyachow angelman: Juk punchas espada ishkan ládupa filuyoq katseqmi, keyta nin:

¹³ Noqam reqiy rureynikikunata, i meychow yachanqekiyta, Satanaspa tronun keykanqanchow; peru tsarankim jutiyta, i kreyikiyniyta manam negarqonkitsu, ni Antipas fyel testigú qamkunachow wanunqan junaqkunapis, Satanas yachanqanchow.

¹⁴ “Peru kapamanmi ichiklla kosaskuna qampa kontreykiy: Tseychow katsinki Balaampa yachatsikininkuna katseqkunata, Balakpa yachatseqninta Israyelpa tsurinkunata ishkitsinanpaq churaq, ídulukunaman sakrifikashqakunata mikuyananpaq i lluta wátanakiykunata rurar.

¹⁵ Nikolaitakunapa yachatsikiynin tsaraqkunatapis katsinki, noqa chikinqáta.

¹⁶ Tseyreykur, ¡wanakiy! Manatseyqa, qanman shamushaq weyrallam i pelyashaq peykunapa kontran shimiypa espadanwan.

¹⁷ “Rinriyoq kaqqa, wiyatsun iglesyakunata Espiritu nenqanta. Benseqtaqa, mikutsishaq pakareykaq manápitam, i qoshaq juk yulaq ichikllan rumita, i tsey ichikllan rumichow mushoq juti qellqashqata, keyta manam pí reqintsu sinowqa chaskeq kaqllam.

Willakiy Tiatira iglesyapaq

¹⁸ “I qellqey Tiatira iglesyachow angelman: Dyospa Tsurin, nina rawreykaqnow nawinkuna kapoq, i chakinkuna tsipapatsishqanow niraq, keyta nin:

¹⁹ Noqam reqiy rureynikikunata, kuyakiynikita, kreyikiynikita, i sirwikiynikita, i pasensiyeykita, i qepakaq rureynikikuna puntakaqpeq masran kayan.

²⁰ “Peru kapamanmi ichiklla kosaskuna qampa kontreyki: Awantankiy tsey Jesabel warmita, profetísam ká neqta, yachatsin i engañan sirwimaqníkunata lluta wátanakiyman i idulukunaman sakrifikashqa kosaskuna mikiyta.

²¹ I qorqómi tyemputa wanakunampaq, peru manam wanakiyta munantsu lluta watanakiyninpita.

²² Kaq keymi, noqa jitarpú kámaman, i jatun jipakiyman peywan olteronyaqkunata, peypa rureyninkunapita mana wanakuyaptenqa.

²³ I wawankunata dañashaq wanoqpaq, i llapan iglesyakunam musyayanqa yarpeyta i shonquta noqa reqeq kanqáta; i qoyashqeyki kada únutam rureynikikunamannow.

²⁴ “Peru qamkunataqa i wakinkuna Tiyatirachow keykaqkunata, eykaqpam kayápuntsu tsey yachatsikiy, i reqiyashqatsu peykuna satanaspa yachatsikiyninkuna niyanqanta, noqam niyaq: Manam churapuyashqeykitsu juk kargata;

²⁵ Peru kapushoqnikikunataqa, tsararayey noqa shamonqáyaq.

²⁶ Benseqtaqa i ushananyaq rureyníkuna ruraqtaqa, noqam qoshaq mandakiynin nasyonkunachow,

²⁷ i mandanqa fyerru bárawan, i pakishqa kayanqa alfareyrupa básunnow; imanowmi noqapis chaskerqó Teytápita;

²⁸ I qoshaq qoya waraq qoyllurta.

²⁹ “Rinriyoq kaqqa, wiyatsun Espiritu iglesyakunata nishqanta.