Levítico 2 - Ñawpaq Testamento Apurímac Llaqtanchispaq Este nisqa Lawpaq

Kawsaykunata cosechaspa ofrendanankumanta

¹ (Señor Diosqa Moisestan nillarantaq khaynata): —Sichus pipas cosechasqanku kawsaykunamanta Señor Diosman ofrendata apamunqa chayqa, fino harinatan apamunan. Hinaspan chay fino harinamanqa churanan aceiteta hinallataq inciensotawan ima.

² Hinaspan chay ofrendataqa Aaronpa wawan *sacerdotekunaman apamunan. Chaymi sacerdoteqa chay chapusqa ofrendamanta orqonqa huk hapt'ay fino harinata, aceiteta hinallataq llapallan inciensotawan ima. Hinaspan sacerdote k'ananqa *altarpi. Chay ofrendaqa yuyarinapaq ofrendan. Hinaspapas chay ofrendaqa mishk'i q'apariq ofrendan noqa Señor Diospaqqa.

³ Chay ofrendamanta puchuqqa Aaronpaq hinallataq wawankunapaqwan iman kanqa. Chay puchuq ofrendaqa wakin k'anasqa ofrendakunamanta ancha ch'uyan, noqa Señor Diospaq sapaqchasqa kasqanrayku.

⁴ Sichus pipas hornopi ruwasqa ofrendata, noqa Señor Diosman apamuwanqa chayqa, fino harinamanta aceitewan chapuspa mana levadurayoq tortatan apamuwanan. Saynallataqmi mana levadurayoq galletastapas aceitewan llusisqata apamuwanan.

⁵ Sichus pipas sartenpi theqtechisqa ofrendata noqa Señor Diosman apamuwanqa chayqa, fino harinamanta ruwasqa tortillatan apamuwanan. Chayqa kanan aceitewan chapusqan mana levadurayoq.

⁶ Hinaspapas chay tortillataqa ashkaman partiruspan aceitewan hawanman hich'aykunayki. Chay ofrendaqa cosecha kawsaykunamanta ofrendan.

⁷ Sichus pipas mankapi ruwasqa tortilla ofrendata noqa Señor Diosman apamuwanqa chayqa, chay ofrendaqa fino harinamanta ruwasqan kanan aceitewan chapusqa.

⁸ Saynata preparaspan chay ofrendaykitaqa noqa Señor Diosman apamuwanki. Hinaspan sacerdoteman entreganki. Paymi chay ofrendataqa altarman apanqa.

⁹ Chaymantan sacerdote llapallan chay ofrendamanta huk chikanta orqospa altarpi k'ananqa. Chay ofrendaqa yuyarinapaq ofrendan. Hinaspapas chay ofrendaqa mishk'i q'apariq ofrendan noqa Señor Diospaqqa.

¹⁰ Chay ofrendamanta puchuqmi Aaronpaq hinallataq wawankunapaqwan ima kanqa. Chay ofrendaqa k'anasqa ofrendakunamanta ancha ch'uyan, noqa Señor Diospaq sapaqchasqa kasqanrayku.

¹¹ Noqa Señor Diosman ofrecemuwasqaykichis ofrendaqa mana levadurayoqmi kanan. Hinaspapas noqa Señor Diosman ofrendata ofrecewaspaykichisqa aman k'anankichishchu levaduratapas hinallataq mieltapas.

¹² Aswanmi levadurataqa hinallataq mieltapas primer kaq cosechasqaykichismanta *primicia ofrendata noqa Señor Diosman apamuwankichis. Ichaqa aman altarmanqa churankichishchu altarpi k'ananaykichispaq mishk'illaña q'apariq ofrendata hinaqa.

¹³ Cosecha kawsaykunamanta ofrenda apamuwasqaykimanqa, llapallanmanmi kachita churanki. Aman ima ofrenda apamuwasqaykimanpas pacto ruwasqanchis kachiqa faltanqachu. Llapallan ofrendakunaqa kachiyoqmi kanan.

¹⁴ Sichus cosecha kawsaymanta primer kaq cosechasqanta noqa Señor Diosman primicia nisqa ofrendata apamuwanqa chayqa, chay primer kaq cosechasqantan ninapi hank'asqata apamuwanan. Saynallataqmi apamuwanallantaq shaqta kutarisqallata primicia ofrendantapas.

¹⁵ Chay ofrendapa hawanmanmi hich'aykunki aceiteta. Saynallataqmi churallankitaq inciensotapas. Chayqa cosecha kawsaykunamanta kaq ofrendan.

¹⁶ Hinaqtinmi chay hank'asqa ofrendamanta hinallataq shaqtalla kutasqa ofrendamantapas wakillantan sacerdoteqa k'ananqa, aceitetawan hinallataq inciensotawan kushkata. Chay ofrendaqa yuyarinapaq ofrendan. Hinaspapas chay ofrendaqa altarpi k'anaspa noqa Señor Diosman ofrecewasqaykichis ofrendan.