Jonás 2 - Ñawpaq Testamento Apurímac Llaqtanchispaq Este nisqa Lawpaq

Jonás mañakusqanmanta

¹ Jonasmi hatunkaray challwapa wiksanpi kashaspa Señor Diosmanta mañakuran khaynata:

² —Señor Diosnilláy, noqaqa ancha ñak'ariyniypin waqyakamurayki. Hinaqtinmi uyarimuwaranki. Noqaqa wañuy pacha ukhunmantaraqmi waqyakamurayki. Chaymi qanqa chay waqyakusqayta uyariykuwaranki.

³ Lamar qochapa ukhu-ukhunmanraqmi wikch'uykuwaranki. Noqataqa anchata p'itaq unuraqmi millp'uykuwaran. Hatunkaray lamar qochapi kaq olakunan hawayta pasawaran.

⁴ Hinaqtinmi noqaqa piensarani khaynata: “Qanpa ñawpaqniykimanta wikch'usqa kashaspayri, ¿ch'uya *temploykitari rikuruymanraqchú?”, nispay.

⁵ Noqataqa unun lliwta p'ampawaran. Noqaqa lamar qochapa ukhu-ukhunpiraqmi tarikurani. Lamar qochapi kaq verde qorakunan umaypi warkuyukuran.

⁶ Noqaqa orqopa ukhu cimentacionninkamaraqmi chinkaykurani. Noqataqa allpa pachan millp'uruwaran. Kay allpa pachaqa cerrojowan hinan wiñaypaq wishq'aykuwaran. Ichaqa qanmi Señor Diosnilláy, wañunaymanta libraykuwaranki.

⁷ Señor Diosnilláy, wañuypa patallanpiña kashaspaymi, qanmanta yuyarirani. Noqapa mañakusqaymi qanpa ñawpaqniykiman hinallataq ch'uya temploykiman chayamuran.

⁸ Falso dioskunata yupaychaq runakunaqa Señor Diospa khuyakuynintan qonqanku.

⁹ Ichaqa noqaqa qanta yupaychaspaymi, *sacrificio ofrendakunata ofrecemusqayki. Imapas prometekusqaytaqa cumplisaqpunin. Qanllan salvawaqniykuqa kanki, nispa.

¹⁰ Hinaqtinmi Señor Dios kamachiqtin, chay challwaqa lamar qochapa patanpi allpaman Jonasta aqtumuran.