Ester 9 - Ñawpaq Testamento Apurímac Llaqtanchispaq Este nisqa Lawpaq

Judá nacionniyoq runakuna enemigonkunata vencesqankumanta

¹ Chunka ishkayniyoq *Adar nisqa killapa chunka kinsayoq p'unchawninpin *rey Asueropa kamachisqan decretoman hina, Judá *nacionniyoq llapallan runakunataqa enemigonku runakuna wañuchinanku karan. Ichaqa manan saynachu pasaran; aswanmi llapallan enemigonku runakunataqa Judá nacionniyoq runakuna dominaranku.

² Judá nacionniyoq runakunaqa rey Asueropa gobiernasqan llapallan provinciakunapin may tiyasqanku llaqtakunapi huñunakuranku. Hinaspan paykunaqa mana allin ruway munaq enemigonku runakunawan peleanankupaq listo karanku. Ichaqa manan ni pipas paykunapa contranpi peleaqqa sayarimurankuchu llapallan llaqtakunapi paykunata manchakusqankurayku.

³ Llapallan provinciakunapi autoridadkunaqa, gobiernaqkunaqa hinallataq reypa palacionpi kamachiq autoridadkunapas Judá nacionniyoq runakunapa favorninpin karanku, Mardoqueota manchakusqankurayku.

⁴ Mardoqueoqa reypa gobiernasqan palacionpin anchapas importante runaman tukuran. Chaymi paypa atiyninmantaqa llapallan provinciakunapi yacharanku. Hinaspapas sapa p'unchawmi Mardoqueoqa aswan más atiyniyoq runaman tukuran.

⁵ Judá nacionniyoq runakunaqa llapallan enemigonkutan *espadawan wañuchiranku. Paykunaqa munasqankuman hinan enemigonku runakunawanqa ruwaranku.

⁶ Saynallataqmi Judá nacionniyoq runakunaqa Persia nacionpa capitalnin Susa llaqtapipas pishqa pachak (500) enemigonku runakunata wañuchiranku.

⁷ Saynallataqmi paykunaqa wañuchillarankutaq kay runakunatapas: Parsandatata, Dalfonta, Aspatata,

⁸ Poratata, Adaliata, Aridatata,

⁹ Parmastata, Arisaita, Aridaita hinallataq Vaizatatapas.

¹⁰ Chay wañuchisqanku chunkantin runakunaqa Judá nacionniyoq runakunapa enemigon Amanpa wawankunan karanku. Amanqa Hamedapa wawanmi karan. Ichaqa Judá nacionniyoq runakunaqa manan qechurankuchu chay wañuchisqanku runakunapa kapuqninkunataqa.

¹¹ Chay wañuchisqanku p'unchawpin rey Asueropa tiyasqan Susa llaqtapi runakunata wañuchisqankumanta reyman willaranku.

¹² Hinaqtinmi reyqa *reina Esterta khaynata niran: —Kay tiyasqay Susa llaqtapin Judá nacionniyoq runakunaqa pishqa pachak (500) runakunata wañurachinku. Saynallataqmi paykunaqa Amanpa wawankunatapas chunkantinta wañurachillankutaq. ¡Huk lawkunapiqa hayk'ataraqchá wañurachinkupas! Kunanri, ¿imatawantaq mañakuwankirí? ¿Imatawanraqtaq qanpaq ruwanaytari munankí? Imapas mañakuwasqaykiqa ruwasqan kanqa, nispa.

¹³ Chaymi reina Esterqa khaynata valekuran: —Reynilláy, sichus qanman allin parecesunki chayqa, decreto qosqaykiman hinayá paqarin p'unchawpas Susa llaqtapi enemigoyku runakunata wañuchichunku. Saynallataqyá kay Susa llaqtapi Amanpa chunkantin wawankunapa wañusqa cuerponkutapas warkumuchunku, nispa.

¹⁴ Hinaqtinmi rey Asueroqa Susa llaqtapi saynata ruwanankupaq kamachiran. Chaymi reypa kamachisqan decretoman hina Amanpa wawankunapa chunkantin wañusqa cuerponkunatapas warkuranku.

¹⁵ Susa llaqtapi kaq Judá nacionniyoq runakunaqa Adar nisqa killapa chunka tawayoq p'unchawninpin kaqmanta huñunakuranku. Hinaspan Susa llaqtapi tiyaq enemigonku runakunata kinsa pachakta (300) wañuchiranku. Ichaqa manan paykunaqa qechurankuchu chay wañuchisqanku runakunapa imapas kapuqninkutaqa.

¹⁶ Rey Asueropa gobiernasqan provinciakunapi tiyaq Judá nacionniyoq runakunapas chunka kinsayoq kaq p'unchawpin huñunakuranku defendekunankupaq. Hinaspan qanchis chunka pishqayoq waranqa (75,000) enemigonku runakunata wañuchiranku. Ichaqa manan qechurankuchu chay wañuchisqanku runakunapa imapas kapuqninkutaqa.

¹⁷ Tukuy chaykunaqa pasaran Adar nisqa killapa chunka kinsayoq p'unchawninpin. Ichaqa chay killapa chunka tawayoq paqarisnintin p'unchawninpitaqmi samaranku. Hinaspan paykunaqa chay p'unchawpi hatun convidota ruwaspanku, anchata kusikuranku.

¹⁸ Ichaqa Susa llaqtapi tiyaq Judá nacionniyoq runakunataqmi peleaspa defendekunankupaq huñunakuranku chay Adar nisqa killapa chunka kinsayoq p'unchawninpi hinallataq chunka tawayoq kaq p'unchawninpipas. Ichaqa paykunaqa chay killapa chunka pishqayoq p'unchawninpi samaspankun, huk hatun convidota ruwaranku. Hinaspan anchata kusikuranku.

¹⁹ Chayraykun mana murallasqa llaqtachakunapi tiyaq Judá nacionniyoq runakunapas Adar nisqa killapa chunka tawayoq p'unchawninpi kusikuywan huk hatun convidota ruwanku. Chay fiestapin regalokunatapas vecinonkuwan regalanakunku.

Purim nisqanku fiestamanta

²⁰ Mardoqueoqa tukuy chaykuna pasasqanmantan escribiran. Hinaspan cartakunata escribispa, apachiran rey Asueropa gobiernasqan llapallan provinciakunapi tiyaq Judá nacionniyoq runakunaman. Payqa llapanmanmi apachiran, cercapi tiyaq runakunamanpas hinallataq karupi tiyaq runakunamanpas.

²¹ Mardoqueoqa chay cartapin kamachiran, Adar nisqa killapa chunka tawayoq p'unchawninpi hinallataq chunka pishqayoq p'unchawninpi sapa watan fiestata ruwanankupaq.

²² Saynataqa kamachiran kaykunata yuyarinankupaqmi: chay p'unchawkunapi enemigonku runakuna paykunata wañuchinan kashaqtin librakusqankumanta, llakisqa kasqankumanta hinallataq waqayninkupas kusikuyman tukusqanmantawan ima. Saynallataqmi kamachillarantaq, chay p'unchawkunapi kusikunankupaq, huk hatun banqueteta ruwanankupaq, vecinonkuwan regalokunata qonakunankupaq hinallataq wakchakunamanpas ima kaqninkutapas qoykunankupaq.

²³ Saynapin Judá nacionniyoq runakunaqa Mardoqueopa kamachisqanman hina chay fiesta ruwasqankuta huk costumbreman tukuchiranku.

²⁴ Agagpa mirayninmanta Hamedatapa wawan Amanqa ñawpaqtaraqmi tantearan, Judá nacionniyoq runakunata wañuchinanpaq. Chay Amanqa “Pur” nisqanku rumichapin suerteta qawaran, ima p'unchawpis Judá nacionniyoq runakunata wañuchinan karan chayta yachananpaq.

²⁵ Ichaqa reina Estermi Amanpa mana allinkuna ruwayta piensasqanmanta rey Asueroman willaran. Hinaqtinmi reyqa huk cartapi kamachiran, imaynatas Aman tantearan Judá nacionniyoq runakunata wañuchinanpaq, chay hinallatataq Amanta hinallataq wawankunatapas wañuchispanku, cuerponkunata k'aspikunapi warkunankupaq.

²⁶ Chayraykun chay fiesta ruwasqanku p'unchawkunataqa Purim nisqa fiestawan suticharanku, chay Amán “Pur” nisqa rumichapi suerteta qawasqankurayku. Chaymi Judá nacionniyoq runakunaqa Mardoqueopa escribisqan cartaman hina, kikinkupuni rikusqankuman hina hinallataq ancha sasachakuy p'unchawkunata pasasqankuman hina,

²⁷ comprometekuranku, chay ishkaynin p'unchaw fiestata ruwanankupaq. Saynallataqmi paykunaqa comprometekullarankutaq paykunapas, mirayninkupas hinallataq Judá nacionniyoq runakunaman tukupuq runakunapas, chay ishkaynin p'unchaw fiestata ama qonqaspanku ruwanankupaq. Chaytaqa chay cartapi escribisqanku fechaman hinan watan-watan ruwananku karan.

²⁸ Saynapin Judá nacionniyoq runakunapa mirayninkunaqa hinallataq llapallan familiankunapas, llapallan provinciakunapi hinallataq llapallan llaqtachakunapipas, chay ishkaynin p'unchawta yuyarinku. Chayraykun Judá nacionniyoq runakunaqa hinallataq mirayninkunapas mana qonqaspanku, chay Purim nisqanku fiestata yuyarispa ruwanku.

²⁹ Hinaqtinmi Abihailpa ususin reina Esterqa Judá nacionniyoq primon Mardoqueopiwan autoridad kasqankuman hina ishkay kaq cartata escribiranku. Chay cartataqa Purim nisqanku fiestata imaynata ruwanankupaqmi escribiranku.

³⁰ Hinaspan chay cartakunata apachiranku rey Asueropa gobiernasqan pachak ishkay chunka qanchisniyoq provinciakunapi tiyaq Judá nacionniyoq llapallan runakunaman. Chay cartapiqa khuyakuy rimaykunawan hinallataq hawkalla kawsanankupaq cheqaq rimaykunawanmi escribisqa karan.

³¹ Chay cartakunatan Judá nacionniyoq Mardoqueoqa reina Esterpiwan llapallan provinciakunapi tiyaq Judá nacionniyoq runakunaman apachiranku, saynapi chay cartapi nisqanman hina, chay Purim nisqa fiestata paykuna hinallataq mirayninkunapas ruwanankupaq. Saynallataqmi chay cartapiqa escribisqa kallarantaq imaynata ayunanankumanta hinallataq waqanankumantapas.

³² Saynapin reina Esterpa Purim nisqa fiestata ruwanankupaq kamachisqanqa confirmasqa karan. Hinaspapas tukuy chaykunaqa huk libropin escribisqa karan.