Ester 8 - Ñawpaq Testamento Apurímac Llaqtanchispaq Este nisqa Lawpaq

Rey Asuero Judá nacionniyoq runakunapa favorninpi decretota qosqanmanta

¹ *Rey Asueroqa chay kikin p'unchawmi Judá *nacionniyoq runakunapa enemigon Amanpa wasinta hinallataq kapuqninkunatapas *reina Esterman qoran. Reina Esterqa Mardoqueopa primon kasqantan rey Asueroman willaran. Chaymi Mardoqueoqa reypa kasqanman riran.

² Hinaqtinmi rey Asueroqa Amanmanta qechusqan anillota orqokuspa Mardoqueoman qoran. Chaymantan Esterqa Mardoqueota churaran, Amanpa tukuy ima kaqninkunamanta mayordomon kananpaq.

³ Chaymantan reina Esterqa reypa ñawpaqninpi anchata waqayuspa qonqorikuran. Hinaspan ruegakuran, Judá nacionniyoq runakunapa contranpi Agagpa mirayninmanta kaq yana alma Amanpa qosqan decreto anulasqa kananpaq, saynapi chay decreto amaña cumplikunanpaq.

⁴ Hinaqtinmi rey Asueroqa qorimanta varanta Ester lawman haywariran. Chaymi Esterqa sayariran. Hinaspan reypa ñawpaqninpi sayaykuspa,

⁵ khaynata niran: —Reynilláy, sichus favorniykita mereceni, mañakusqaypas qanpaq allin kaqtinqa, agradoykipaq kaytiyqa hinallataq cheqaqtapuni munakuwanki chayqa, mañakuykin huk decretota ruwaspa enteron gobiernasqayki *provinciakunaman apachinaykipaq, saynapi Agagpa mirayninmanta kaq Hamedata sutiyoq runapa wawan Amanpa kamachisqan decreto anulasqa kananpaq. Amanqa enteron gobiernasqayki nacionpi provinciakunamanmi huk decretota apachiran, saynapi llapallan Judá nacionniyoq runakuna wañuchisqa kanankupaq.

⁶ Noqari, ¿imaynataq qawayman llaqtamasiykuna ancha ñak'ariypi kaqtinkurí? ¿Imaynataq hawkalla kayman llapallan familiaykunata wañuchiqtinkurí? nispa.

⁷ Hinaqtinmi rey Asueroqa Esterman hinallataq Judá nacionniyoq Mardoqueomanwan khaynata contestaran: —Amanpa wasintapas hinallataq tukuy kaqninkunatapas reina Estermanmi qoniña. Saynallataqmi Amantapas llapallan Judá nacionniyoq runakunata wañuchiy munasqanmanta seq'ochispa wañuchiniña.

⁸ Saynaqa kunanyá, noqapa sutiypi llapallan llaqtamasiykichis Judá nacionniyoq runakunapa favorninpi huk decretota qankunapa piensasqaykichisman hina escribiychis. Noqa reypa sutiypi escribisqa hinallataq anilloywan sellasqa decretotaqa manan pipas anulayta atinmanchu, nispa.

⁹ Hinaqtinmi kasqan ratolla Esterqa Mardoqueopiwan kinsa kaq Siván nisqa killapa ishkay chunka kinsayoq p'unchawninpi reypa secretarionkunata waqyachimuranku huk decretota escribinankupaq. Chay secretariokunan Mardoqueopa kamachisqanman hina escribiranku. Hinaspan chay escribisqanku kamachikuy decretota apachiranku Judá nacionniyoq runakunaman, gobernadorkunaman, llaqtapi kamachiqkunaman. Chaykunataqa apachiranku pachak ishkay chunka qanchisniyoq provinciakunapi kamachiq autoridadkunamanmi, India nacionmanta qallarispa asta Etiopía nacionkama. Chay kamachikuykunataqa apachiranku sapankama provinciapi imayna escribisqankuman hina hinallataq sapankama llaqtakunapa imayna rimasqankuman hinan. Saynallatataqmi apachiranku Judá nacionniyoq runakunamanpas escribisqanku idiomapi hinallataq hebreo rimaypi rimayninkuman hina escribisqata.

¹⁰ Chay kamachikuy decretokunataqa Mardoqueon rey Asueropa sutinpi escribispa, reypa anillonwan sellaran. Hinaspan chay kamachikuy decretokunataqa apurayllaman apachiranku cartakunata apaq runakunawan. Paykunan reypa caballonkunamanta allinta p'itaq caballokunapi aparanku.

¹¹ Chay kamachikuy decretopin rey Asueroqa Judá nacionniyoq runakunata autorizaran, tiyasqanku llapallan llaqtakunapi huñunakuspanku, wañuchisqa kanankumanta defendekunankupaq. Saynallataqmi reyqa autorizaran mayqen llaqtamantapas otaq mayqen kaq provinciakunamantapas armasqa runakuna paykunata, warminkuta hinallataq wawankunatapas wañuchinankupaq hamuqtinkuqa, chay enemigonku runakunata lliwta wañuchinankupaq. Saynallataqmi autorizaran chay runakunapa ima kapuqninkutapas qechuspa dueñochakunankupaq.

¹² Chay kamachikuy decretoqa rey Asueropa gobiernasqan llapallan provinciakunapin huk p'unchawllapi cumplisqa kananpaq qosqa karan. Chay p'unchawqa Adar nisqanku chunka ishkayniyoq killapa chunka kinsayoq p'unchawninmi karan.

¹³ Chay kamachikuy decretopa copiankunaqa sapankama provinciakunapin Judá nacionniyoq runakunaman willasqa karan, llapallan runakuna yachanankupaq, hinaspa chay p'unchawpi llapallan Judá nacionniyoq runakuna enemigonkupa contranpi preparasqa kaspanku vengakunankupaq.

¹⁴ Hinaqtinmi reypa kamachisqanman hina chay kamachikuy decretota apaq runakunaqa apurayllamanña lloqsiranku, reypa caballonkunamanta allinta p'itaq caballokunapi. Saynallataqmi chay kamachikuy decretoqa Susa llaqtapipas willasqa karan.

¹⁵ Chaymantan Mardoqueoqa reypa palacionmanta lloqsimuran, reykunapa p'achakunan azulniyoq hinallataq yuraqniyoq p'achawan p'achasqa, umanpi qorimanta hatun coronayoq hinallataq fino linomanta ruwasqa morado capayoq ima. Saynata rikuspankun, Susa llaqtapi tiyaq llapallan runakunaqa anchata kusikuspanku qaparirankuraq.

¹⁶ Chay p'unchawmi llapallan Judá nacionniyoq runakunapaqqa huk k'anchay hina ancha kusikuy p'unchaw karan. Chaymi paykunaqa anchatapuni kusikuranku.

¹⁷ Reypa kamachisqan decreto Judá nacionniyoq runakunapa tiyasqan llaqtakunaman hinallataq provinciakunamanpas chayaqtinmi, Judá nacionniyoq runakunaqa anchata kusikuranku. Hinaspan paykunaqa convidokunata hinallataq fiestakunata ruwaranku. Chayta rikuspankun huk law nacionniyoq ashka runakunapas Judá nacionniyoqman tukupuranku paykunata manchakusqankurayku.