Ester 7 - Ñawpaq Testamento Apurímac Llaqtanchispaq Este nisqa Lawpaq

Amanta warkuspa wañuchisqankumanta

¹ *Rey Asueron Amanpiwan reina Esterpa banquete ruwasqanman riran.

² Chay ishkay kaq p'unchaw banquetepi vinota tomashaspankun, rey Asueroqa reina Esterta khaynata tapuran: —Reina Ester, ¿imatataq qanpaq ruwanaytari munankí? Noqaqa imapas mañakuwasqaykitan qosqayki. Gobiernasqay nacionpa kushkantaña mañakuwanki chaypas, noqaqa qosqaykin, nispa.

³ Chaymi reina Esterqa khaynata contestaran: —Reynilláy, sichus favorniykita mereceni chayqa hinallataq qanpa agradoykipaq hina kaqtinqa, kay ruegakusqaytayá uyariykuway. Noqatapas hinallataq llaqtamasiy runakunatapas khuyapayaykuwaykuyá, saynapi ama wañuchisqa kanaykupaq.

⁴ Noqaqa llaqtamasiy runakunapiwan wañuchisqa kanaykupaqmi vendesqa hina kashayku, saynapi llapallayku chinkachisqa kanaykupaq. Sichus noqayku esclavo hinalla servinaykupaq vendesqa kaykuman chayqa, noqaqa upallallachá kayman. Sayna ancha sasachakuypi mana kaspaykuqa, manachá yanqapuniqa umaykitaqa nanachiykimanchu, nispa.

⁵ Hinaqtinmi rey Asueroqa reina Esterta khaynata tapuran: —¿Pitaq chay yana alma runarí? ¿Maypitaq chay mana allinkunata ruway munaq runari kashan? nispa.

⁶ Hinaqtinmi Esterqa khaynata contestaran: —Chay enemigoyku runaqa hinallataq contraykupi mana allinkunata ruway munaq runaqa, kay yana alma Amanmi, nispa. Chaymi Amanqa anchata mancharikuran reypa hinallataq reinapa ñawpaqninpi.

⁷ Hinaqtinmi rey Asueroqa vino tomasqantapas dejaspa, ancha phiñasqallaña hatariran. Hinaspan lloqsiran palacio wasimanta jardinman. Amanqa cuentatan qokuran wañuchisqa kananpaq reypa piensasqanta. Chaymi Amanqa kaqllapi qepakuspa, reina Esterman ashuykuran ruegakunanpaq, saynapi ama wañuchisqa kananpaq.

⁸ Rey Asueroqa palaciopa jardinninmantan banquete ruwasqanku cuartoman kutiyamuran. Hinaspan Amantaqa rikuran reina Esterpa ladonpi (ruegakunanpaq) k'umulayashaqta. Reina Estertaqmi sofá nisqa asientopi qeshqanpa k'umpalayashasqa. Chaymi rey Asueroqa qaparispa khaynata niran: —¡Palacio wasiypiraqtaqchu reina Estertapas abusayta munashanki! nispa. Saynata rey niqtinmi, Amanpa uyanta taparanku.

⁹ Hinaqtinmi reypa serviqnin Harbona sutiyoq *eunuco runaqa khaynata niran: —Amanpa wasinpin kashan ishkay chunka ishkayniyoq metrota mediq hatun k'aspi. Chaytaqa kikin Amanmi ruwachiran, reypa favorninpi rimariq Mardoqueota chaypi warkuchinanpaq, nispa. Chaymi reyqa khaynata kamachiran: —Chaypi chay Amanta warkumuychis, nispa.

¹⁰ Saynapin Amantaqa warkuranku Mardoqueopaq ruwachisqan hatun k'aspipi. Chayñan reypa phiñakuynin thañiykuran.